Oh Trần Quốc Thịnh ndrel Trần Hoàng Duy, gŭ ta Ấp Nhì, xã Mỹ Long Nam, nkuăl Cầu Ngang, n’gor Trà Vinh tă bah jê̆ hŏ rêh kon đơi. Me khân păng hăn kan ngai, jêh ri gŭ sai êng, yơn lah nau rêh mro mô ueh, lơi khân păng gŭ ma u lĕ ranh. 3 u sau khân păng rêh tâm nau rnôk geh sa, rnôk ji ngot ri ma mô geh n’hâm hăn nti. Lap lah, năm 2019 rmôt tahen biên phòng Trà Vinh hŏ ntrŭnh ƀư nau kan “Kon rong Biên phòng” ri ma kơl an bar oh hăn rêh nsum tâm Đồn biên phòng Mỹ Long ndrel geh nau kơl an bah n’gâng kan tâm dâng.

Trung uý Nguyễn Quốc Việt, tahen geh jao nau kan mât chăm, kơl an 2 mon mbơh, jêh rnôk geh tahen vơt sĭt, nau rêh bah 2 mon hŏ rgâl ngăn. Knŭng jêh du năm ƀư kon rong biên phòng, ntơm bah kon se mô lăng blau nau nti, jêh nê hŏ nti blau, săk kŏ têh đŏng:

‘Đah săk gâp ri mon Duy geh rêh nsum tâm tahen, mom gĭt nau ngăn, rnôk hăn ri mbơh, rnôk sĭt ri nkoch, mbơh ngơi ueh, mâp bu têh blau mbah đŏng... Mpeh mông ri, ôi 5h tahen kah, ri mon Duy kŏ kah bĭch. Mon Duy ŭch jêh aơ têh hăn tahen, phung hên nsôih kơl an gay ma mon geh tŏng nau dơi gay ma lăp tahen”.

Mon Trần Hoàng Duy năm aơ jrâu 6, mra rêh nsum đah tahen biên phòng ân tât rnôk jrâu 9 kơt nô păng đŏng. Mon nkoch, lăp rêh tâm đồn biên phòng, nau ngêt sa, hăn nti, bĭch dâm ri tĭng mông, geh ăp kônh ntĭm mbơh rjăp ri ma nau dơi ntĭm nti ueh lơn bah năp nê. Gâp ŭch jêh aơ jêng cán bộ tahen biên phòng kơt ăp kônh đŏng:

"Ta aơ ôi 5h dâk hăn nti, ndrel mông oi ơm ri ăp kônh âm 15 rbăn, hôm kêng măng ri ân đŏng 10 rbăn. Kêng măng sông piăng, pâl thể thao đah ăp kônh. Gâp ŭch ngăn đah ăp kônh. Gâp nsôih ntĭm nti ân blau gay ma jehe aơ geh lăp hăn tahen, geh pah kan tâm tahen”.

Êng oh Trần Quốc Thịnh, năm e hŏ lôch nti jrâu 9 ndrel geh sĭt rêh đah rnăk vâl, geh leo tâm bôk nau kan “Kơl nhoat jâng oh hăn nti” đah rnoh kơl an 500 rbăn/khay. Êng nê, gay pơk trong nơih ueh lơn jêh rnôk geh sĭt ma rnăk vâl, ăp cán bộ, tahen bah Đồn Biên phòng Mỹ Long hôm bonh đă, rgum têm tơm prăk geh 27 rkeh gay ma pă ân oh, ndrel pă săm ƀŭt ndrel ndơ dŏng nti. Trung tá Phan Thanh Sang, Chính trị viên Đồn Biên phòng Mỹ Long mbơh, jêh rnôk lôch nar rong, ăp oh geh kơl an “Kơl nhoat jâng oh hăn nti” gay ma lŏ kơl an ndrel tĭng hăn nti. Ndri ma, hên mra nsôih lôch n’hâm, bonh đă, nsum ty kơl an lôch n’hâm:

‘Đồn ƀư nau kan aơ ntơm năm 2019. Êng gay ma rong ân 2 mon ri bonh đă ăp rmôt bu kơl an, ăp cán bộ tahen bah rmôt ndrel ăp ntŭk kan tahen êng êng. Tal 3 đŏng lah n’hao tơm prăk ƀư kan tuch tăm, mhâm ƀư ân ntop, pơk trong nơih ân ăp mon ueh ngăn”.

 Êp nau kan “Kon rong tahen biên phòng”, ăp cán bộ, tahen Đồn biên phòng Mỹ Long, n’gor Trà Vinh hôm ndơn mât 10 kon se ach o tâm nkuăl nơm ƀư bah Bôk nau kan “Kơl nhoat jâng oh hăn nti”. Tĭng nê, ăp oh kơl an 500 rbăn/khay ân nau kan ntĭm nti jŏ tât jrâu 12. Ntơm bah kan aơ kơl an âk kon se hăn nti mô lăng blau gay ma nti ân blau.

Ntơm năm 2016 tât rnôk aơ, Tahen biên phòng Trà Vinh mât nau kơl an ân 34 kon se ach o đah rnoh prăk rlau 1,4 rmen. Tơm prăk aơ yor ăp rmôt kan kơl an, rgop kơl cán bộ, tahen tâm lam rmôt ndrel tơm prăk n’hao ntop nau kan bah rmôt nơm. Ntơm bah nau kan aơ, ăp đồn biên phòng tâm lam dak hŏ kơl an, chiăr nti ma rhiăng kon se geh nau rêh jêr jŏt tâm nkuăl n’har bri đah nau ŭch ntĭm nti, gay jêh aơ jêng nŭih geh nau dơi./.