Lah rnoi K’ Dong, tâm ƀon Đắk Wang, xã Sa Long, nkual Ngọc Hồi, n’gor Kon Tum, rnôk 19 năm Y Trang geh công ty 732 ndơn lăp kan công nhân. Jêh nti nau kor rtăk cao si, Y Trang geh ndơn 3 ha mât chăm. Rlau 10 năm pah kan, rnôk aơ nau rêh Y Trang hŏ tŏng ăp. Bar tŏ mro păng geh rnê lah 1 tâm 4 nŭih bah công ty râng rlong nŭih kan blau bah binh đoàn. Y Trang mbơh, êng 3 ha cao su ndơn mât, ur sai yuh hôm ƀư du ha cà phê. Rnơm tâm nŭih pah kan ri ma yuh geh mât chăm mir cà phê geh săk rnglay:

 ‘Rnôk geh lăp ƀư công nhân cah Công ty 732, công ty pơk jrâu nti kor rtăk cao su. Jêh rnôk jêng thợ, gâp ndơn mât mir tăm. Jêng công nhân bah công ty gâp geh prăk, đăp mpăn ân nau rêh. Đah ăp rnăk mâp nau jêr, Công ty kơl an ndơ sa gay ma mô geh pah pât sa tâm ăp khay dŭt. Rđil ma ăp nŭih tâm ƀon mô ƀư công nhân ri nau rêh bah hên geh tŏng ăp lơn ngăn”.

Rnăk wa Nguyễn Công Hoàn, ƀon tơm ta Thái Bình tât xã Đắk Kan, nkuăl Ngọc Hồi, n’gor Kon Tum ƀư nau kan đah 2 mpang ty dơm. Geh nau kơl an bah Công ty 732, rnăk wa ăp nhoat hun hao, ndâk ngih vâl nâp ueh. Ur păng ƀư công nhân bah Công ty 732, rnôk aơ ndơn mât 5,5 ha cao su. Rnăk wa hôm geh êng du ha cao su ndrel du ha cà phê. Rnôk aơ, wa Nguyễn Công Hoàn lah Kruanh Hội đồng mât nau tâm boh nau kan tuch tăm Đắk Kan, đah 400 nŭih, tâm nê geh 80 ha lŏ dak. Lŏ aơ kŏ lah bah Công ty 732 khai hoang jêh ri pă gay ma tuch tăm:

‘Tâm Ngọc Hồi phên hên geh âk ngăn rnoi mpôl đê̆ mpeh Bắc, Nam tât gŭ. Tâm xã Đắk Kan âk ngăn rnoi mpôl đê̆ tâm nkuăl, ri mra geh công ty kơl an. Ntơm nau nkra trong, ngih vâl tâm thôn ƀon, kơl an kônh wa rklaih ach o, pă kan pah ân druh ndăm, oh kon rnoi mpôl đê̆. Ri ma văng sa bah xã Đắk Kan hun hao tâm ban. Geh kơt nê lah rnơm nau kơl an bah công ty 732"”

Công ty Trách nhiệm hữu hạn du ntŭk kan 732 mât 2.330 ha cao su, rlau 80 ha ba dak, du ngih máy nkra rtăk cao su cốm đah nau dăng 5000 tấn rtăk rih/năm. Nau geh rtăk ăp năm mro geh ndrel rlet nau Binh đoàn jao. Công ty hŏ pă kan pah đăp mpăn ân 1.500 nŭih kan, tâm nê n’gul lah rnoi mpôl đê̆. Công ty kŏ nkoch mbơh, bonh đă ƀon lan ƀư rjăp tĭng nau ntrŭnh bah Đảng, pháp luật bah Ngih dak. Công ty hôm ntuh kơl ndâk ngih rƀŭn, ngih săm ƀŭt, ngih nti kon se, ntŭk pâl, khám, săm ji, pă dak si ân kônh wa. Đại tá Hà Văn Nam, Bí thư Đảng uỷ, Groi Giám đốc Công ty 732 ngơi:

‘Công ty 732 ƀư nau kan tâm mpeh ba lơ Tây Nguyên. Ƀư nau kan tâm 4 xã, 2 nkuăl Ngọc Hồi ndrel Sa Thầy bah n’gor Kon Tum; ƀư nau kan hun hao văng sa rêh jeng đăp mpăn rnă njrăng tâm nkuăl. Công ty vay kơl an, pơk trong pah kan ân nŭih rnoi mpôl đê̆, ngăn lah ƀon lan tâm ntŭk rnôk aơ công ty nglăp pah kan geh 50%. Nau geh bah nŭih kan geh bơi tât 9 rkeh/khay. Công ty hŏ ƀư ueh nau kan kơl an mô knŭng ta công nhân ma n’ăp ƀon lan tâm nkuăl, ngăn lah ăp rnăk geh nau rêh jêr jŏt năn kơl an, pơk trong ân ƀon lan đăp mpăn. Công ty kơl an ndâk nau tâm rnglăp ma gưl uỷ, n’gâng kan ndrel ƀon lan bah nkuăl. Ngăn lah tâm rgop ma rmôt tahen tâm nkuăl hăn mêt uănh, nkân njrăng tâm nkuăl n’har bri. Mô geh nŭih luh, lăp tih dôih”.

Đah ăp nau tă dơi geh, Công ty 732 hŏ geh Kruanh dak pă nau dơi Nŭih janh dăng pah kan tâm rnôk rgâl mhe. Âk rmôt, âk nŭih bah công ty hŏ ndơn geh nklâm ndơ khlay bah N’gâng kan, ntŭk kan ndrel Binh đoàn. Yơn đah cán bộ, công nhân bah Công ty 732 ăp nŭih hŏ pah kan tâm dăch đah nkuăl neh “du tong ndrau djar pe dak ndel tăng” aơ, nau nkhôm prêh ngăn lah nau rnơm, lah ntŭk nsing nâp an ƀon lan ăp rnoi tâm nkuăl neh bah neh dak./.