Ăp nar dăch tết, xã Trường Sơn, nkuăl Quảng Ninh, n’gor Quảng Bình lĕ jêng rhơn, ntoh n’gôr lơn. Tahen n’har bri làng Mô ta nkuăl Quảng Ninh lĕ geh ƀư nklâm bánh chưng pă an ƀon lan ta ƀon Ploang, xã Trường Sơn, nkuăl Quảng Ninh. Ƀon lan ndrel đah ăp tahen n’har bri tâm nđŭr mpeh văn hóa njroh mprơ, nău pâl rlưn way ơm ƀư an nău răm rhơn vơt tết tât năm mhe sĭt lơ ma ueh răm rhơn lơn.

Di rơh aơ, tahen n’har bri  làng Mô ndrel đah ăp ntŭk kan pă ndơ tết an ƀon lan ta ƀon Ploang n’hanh bản Rìn Rìn, pă an ăp oh kon hc ao răm, pă 5  ngih ach o kol ueh an ntŭk rêh jêng, koh sŏk mô sŏk prăk n’hanh ƀư uănh săm ji, pă dak dơm dak si, pă mŭng bĭch an ƀon lan n’har bri. Wa Hồ Văn Thông, ta bản Ploang, xã Trường Sơn, nkuăl Quảng Ninh rhơn nkoch.

Năm mhe n’har bri- Răm nuih n’hâm ƀon lan”, dŭt ueh, dŭt rhơn, ƀon lan ŭch ngăn. Tâm nău rêh bâh gâp, năm aơ geh tât râng bôk nău rhơn kơt aơ đah tahen n’hanh ƀon lan. Ăp nău kan njroh mprơ , ƀon lan njrơh mprơ geh tâm ngơi n’hanh dơn ndơ kơl an, ăp nuĭh geh ndơ nsĭt ta jay da dê”.

Du năm mhe tay hŏ tât ta nkual ƀon lan n’har bri Dân Hóa, nkuăl Minh Hóa, n’gor Quảng Bình. Cán bộ, tahen pôih tahen n’har bri lam ntur neh Cha Lo ndrel đah ăp ntŭk kan pah kan ta ntŭk lĕ geh mbơh ƀư bôk nău kan “Năm mhe n’har bri- răm nuih n’hâm ƀon lan”, ngăch mât kơl Tết an ƀon lan ach o rêh  ba dâng jâng yôk Giăng Màn. Bôk nău kan geh âk nău kan khlăy kơt lah mpoh nhang kahgĭt lah ueh ăp tahen khĭt tâm lơh kăl e, tâm nđŭr njroh mprơ, tâm rlong nklâm bánh chưng, pă ndơ an ăp rnăk dơi kơl. wa Đinh Thị Mùi, ta bản Bãi Dinh, xã Dân Hóa, nkuăl Minh Hóa rhơn ngăn.

Bôk nău kan “năm mhe n’har bri- Răm nuih n’hâm ƀon lan”, nuĭh ƀon lan hên dŭt rhơn ngăn. Yor lah, mpôl hên lah ăp rnăk ach o ta xã n’har bri, nkual njônh ngai aƀaơ geh dơn ndơ kơl an. Tât tay, mpôl hên bra nsrôih pah kan jan sa gay ma wăng sa rnăk vâl hun hao lơn, gay ma mô geh kâp knơm ta ngih dak, ta ăp n’gâng kan tay”.

 Bôk nău kan “Năm mhe n’har bri- răm nuih n’hâm ƀon lan” geh ƀư ăp năm ta năp Tết Nguyên đán n’hanh tâm ban ta lĕ rngôch ăp xã n’har bri, njêng du nău vơt rhơn năm mhe ta ăp ƀon lan. Bâh bôk nău kan aơ, ƀon lan cán bộ tahen ta n’har bri, ndrel mpơl nău tâm rnglăp, nău mĭn rlet rlău nău jêr jŏt n’hanh nău knơm geh âk nău dơi tâm năm mhe Quý Mão 2023.

Đại tá Trịnh Thanh Bình, kruanh leo kan tahen n’har bri Quảng Bình an gĭt, ta năp tết Nguyên đá, tahen n’har bri leo kan n’hanh kuăl jă ăp ntŭk kan nuĭh kan ndrel kơl ndơ gay ma geh rbăn nklâm ndơ, kơl an ƀon lan ta n’har bri Quảng Bình vơt du yan năm mhe ueh răm, đăp mpăn.

Bôk nău kan geh âk nău kan khlăy, na nê̆ n’hanh pă âk nklâm ndơ bâh ăp nuĭh lŏng nuih n’hâm gay ma ƀon lan geh nău rêh đăp mpăn hơm răm lơn, mât đăp mpăn Tết hơm răm. Njêng nău mĭn kan ueh an ƀon lan, tahen ta nkual n’har bri vơt tết ueh răm, rgum nsum, njêng nău nsrôih nău kan gay ma hun hao wăng sa rêh jêng ndrel đah mât nău ƀư tơm rnă njrăng ta n’har bri ngih dak”.

Ta năp nĕ, ta xã Hồng Văn, nkuăl A Lưới, n’gor Thừa Thiên Huế, n’gâng kan Tư lệnh tahen n’har bri, Trung ương Hội liên hiệp bu ur Việt Nam tâm rgop đah n’gor Ủy, UBND n’gor Thừa Thiên Huế geh ƀư bôk nău kan “Năm mhe n’har bri- răm nuih n’hâm ƀon lan” vơt Tết Nguyên đán Quý Mão 2023. Ta aơ lĕ geh ƀư ăp nău kan kơt: Sa nkra, pă jao ngih tâm rnglăp an nuĭh ach o n’har bri”; tât khâl, pă ndơ an nuĭh ach o, rnăk pah kan cách mạng, tât khâl, rhơn têt n’gâng kan, ƀon lan, kon hoc, tahen mât uănh, mât n’har bri, tâm nđur nghệ thuật, pă ndơ an kon hoc n’hanh rnăk vâl jêr jŏt ta nkuăl A Lưới, uănh săm ji, pă dak si mô sŏk prăk an ƀon lan, ăp nău kan văn hóa, thể thao, pâl rlưn. Bôk nău kan lĕ ntêm an 10 mblâm ngih dak ueh răm an nuĭh ach o n’har bri”, 15 mblâm ndrôk ntil, 500 nklâm ndơ tết.