Wa Nguyễn Đình Trường, Tổng Giám đốc Công ty kchoh Việt Tiến, Groi Kruanh rmôt ƀư nau kan tăch rgâl mpeh tahen ơm Việt Nam hŏ ƀư jêh nau kan ndrel mro n’hao nau dơi ueh ơm gay ma ntĭm nti nŭih mom, ntĭm nau nsôih, n’hâm tâm lơh ma ăp rơh che, mbŏ ndâk ơm, nti ân rơh mom, nthoi nau kan mât neh dak. Ndri ma, năm kan tât, đah 1/3 nŭih kan mhe geh lăp ndrel geh đă tâm Rnâng kan, ndrel nau rđau kan bah Rnâng kan mhe, wa Nguyễn Đình Trường rnơm lah, ăp nkô̆ nau năm kan tal 7 mra geh dơi ƀư tam:

‘Ƀư tĭng nau rđau bah Tổng Bí thư Nguyễn Phú Trọng, Rmôt tahen ơm Việt Nam geh 5 nau kan. Tâm 5 nau kan nê ri geh 2 nau ƀư ân geh rgâl mhe. Nau kan bôk năp, ân geh ndâk ntŭk kan chính trị nâp, kloh, ƀư tơm, mât n’gâng kan ntơm bah tâm dâng hao gŏ lơ. Nau kan tal bar lah nsôih râng ƀư văng sa jut n’huch ach o ndrel râng ueh tâm nau kan yor Đảng ndrel Ngih dak rgŏ jă. Aơ lah nau kan geh nau dơi ngăn gay ma ndâk rmôt kan nar lơn ma hun hao”.

            Du nau kan khlay geh ăp gưl kan bah rmôt tahen ơm tâm lam dak nsôih ƀư nê lah kơl an ăp tahen ơm ƀư sâm geh, hun hao văng sa. Wa Trần Bá Đông, Kruanh rmôt tahen ơm Phường Đông Tảo, nkuăl ƀon têh Hưng Yên, n’gor Hưng Yên mbơh, đah 3 rmôt kan yor tahen ơm ƀư tơm, nau kơl an ăp nŭih tahen ơm ƀư sâm geh dơi geh ƀư tâm âk năm rlau aơ. Rnôk aơ 100% rmôt tahen ơm mô geh nŭih ach o, 85% lah rnăk sâm geh ndrel 15% rnoh rnăk geh nau mbơm. Wa Trần Bá Đông ŭch:

            ‘Tơm prăk ro hên tâm nkuăl tĭng nau ntrŭnh bah Ngih dak hôm, ngân hàng chính sách mra kơl an tĭng nau ntrŭnh. Rnôk aơ hên ŭch klơ kơl an mhâm ƀư ân geh nau ntrŭnh tâm di, ăp nkô̆ nau, bôk nau kơl an ân hân rklaih ach o. Phung hên rnơm, ŭch ngăn tâm nau rđau kan bah ăp nŭih tâm Rnâng kan rđau kan rơh tal 7 aơ ndrel ŭch đah nau kan, nau gơih bah tahen Wa Hồ ri ăp nŭih rđau kan mra ƀư ueh nau dơi, nau rđau kan Hội ân tâm ban, hun hao”.

            Hôm wa Dương Xuân Hảo, Chánh Văn phòng rmôt tahen ơm n’gor Ninh Bình ntoh nau nsôih, tâm năm kan mhe aơ mra ƀư ueh ăp nau tâm kơl ƀư sâm eh bah ăp rmôt tahen ơm:

            ‘Rmôt tahen ơm n’gor Ninh Bình tâm năm kan tât mra nsôih pơk trong dơi ngăn, ueh ngăn mpeh tơm prăk gay ân ăp nŭih geh nau dơi gay hun hao văng sa ndrel pơk trong ueh ngăn lah prăk manh tâm ăp nhân hàng chính sách xã hội ndrel ngân hàng êng. Pơk trong mpeh nau kơl an tâm bonh đă, tâm kơl tâm ntŭk lah ntă dê nŭih geh nau dơi lơn ri kơl an mpeh nau kan mât chăm, tâm kơl an mpeh nau blau pah kan jan sa, tâm kơl ndrăng nơm ân geh hun hao lơn”.

            Ăp nau ntrŭnh bah Đại hội lah nau kan khlay tâm nau pah kan ndrel nau hun hao bah ăp rmôt tâm 5 năm tât. Jêh rnôk Đại hội, ăp gưl kan hội ƀư ueh nau ntrŭnh, ăp nau ntrŭnh bah Đại hội, nkoch mbơh jru lơn tât cán bộ, hội viên mpeh nau dơi bah Đại hội, ndal ndâk njêng, ntrŭnh ƀư nau kan, nau nchrăp, leo nau ntrŭnh tâm nau kan ngăn bah hội, ntrŭt dăng nau tâm rlong, ntĭm nti ndrel ƀư tĭng nau mĭn, nau rêh, nau kan Hồ Chí Minh.

Ƀư ueh ăp nau dơi, nau kan, rgop nau ndâk njêng ndrel mât ân nâp neh dak, tâm di đah nau rnơm bah Đảng, Ngih dak ndrel ƀon lan. Ntoh nau tâm nar Đại hội, Thượng tướng Bế Xuân Trường, Kruanh rmôt tahen ơm Việt Nam gưl VII, năm kan 2022-2027, ngơi:

            ‘Phung hên ton bah năp rmôt tahen ơm tâm lam dak mro tâm rnglăp, tâm ban, tâm dăch dơh nsum, ndâk njêng rmôt geh nau nâp mpeh chính trị ngăn ngên, mro rnơm tâm nau rđau kan bah Đảng, Ngih dak, ƀư ueh nau kan đah Đảng, đah neh dak, đah ƀon lan ndrel kơn rơh xã hội chủ nghĩa, mro ntoh n’hao nuih n’hâm kan bah nơm. Rgâl mhe nkô̆ nau kan, nau ƀư, nau pah kan ân ueh, ân gơih, nchrăp lor, blau mhe tâm nau rđau đă ndrel đă ƀư ueh nau kan, ndâk rmôt kan kloh, nâp ăp ntil, ƀư ueh ăp nau kan geh jao”./.