Ndrel ma ăp cán bộ Rnâng kan rđau tahen nkuăl ƀon têh Sơn La tât khâl rnăk oh Chiêu Thanh Trúc, rnoi Thái, kon se nti jrâu 5, ta ƀon Nà Ngùa, tâm tổ 2, Phường Chiềng An, nkuăl ƀon têh Sơn La, n’gor Sơn La. Rnăk oh Trúc lah rnăk ach o, me mbŏ mô geh kan pah. Rlau ma nê, Bŏ oh Trúc geh nau kuet jâk, ri ma hăn săm mro, rnăk lơn ma jêr đŏng.

Gĭt dôi nau nê, Đảng uỷ, Rnâng kan rđau tahen nkuăl ƀon têh Sơn La hŏ tât mâp băl mpôl oh, nkre mâp Ban Giám hiệu Ngih săm ƀŭt Tiểu học Lò Văn Giá-ntŭk oh dôl geh kơl an hăn nti. Mô geh sâm n’hâm bah me mbŏ, nai nti ndrel ăp cán bộ, tahen Rnâng kan rđau tahen nkuăl ƀon têh, ăp năm rlau aơ, Trúc mro nti blau ngăn ndrel Sau gĭt nau bah Wa Hồ. Oh Chiêu Thanh Trúc, ngơi:

‘Geh nau kơl an bah ăp kônh tahen, gâp rhơn ngăn ndrel geh kơl an âk đŏng ân me mbŏ gâp, gâp nsôih nti ân ueh, ân blau ngăn gay ma ƀư ân tâm di nuih n’hâm bah ăp kônh tahen ndrel ăp nai ntĭm nti tâm ngih săm ƀŭt”.

Ntrŭnh bôk nau kan “Kơl an kon se hăn nti” tât rnôk aơ, Rnâng kan rđau tahen nkuăl ƀon têh Sơn La hŏ ndơn mât bôk ân 5 oh kon se geh nau rêh jêr jŏt bah ngih săm ƀŭt Tiểu học Lò Văn Giá, nkuăl ƀon têh Sơn La đah rnoh kơl 250 rbăn/khay/oh tâm 5 năm mro. Êng nê, hôm kơl ndơ dŏng nti ân ăp oh tâm năm nti mhe.

Trung tá Khuất Minh Tuấn, Chính trị viên Phó, Rnâng kan rđau tahen nkual ƀon têh Sơn Lah, mbơh: Rnoh prăk mô âk, yơn aơ lah ndơ ma ăp cán bộ, tahen ŭch rgop nau kơl an ân ăp kon se mâp nau jêr tâm nau kan hăn nti, jêng nŭih blau ân ƀon tơm, neh dak:

‘Tâm rơh tât, Đảng uỷ, Rnâng kan rđau tahen nkuăl ƀon têh phung hên nchrăp mra lŏ ntrŭnh ƀư ân geh ăk tam ăp nau ntrŭnh, nau kơl an bah Đảng ndrel Ngih dak, ngăn lah đah nau rđau kan ngăn bah rmôt kan bah ntŭk hê, nsôih nkoch mbơh n’hao nau gĭt ân cán bộ tahen tâm rmôt mpeh nau ŭch, nau khlay bah bôk nau kan aơ, nkre tâm grop ngăn đah gưl uỷ, n’gâng kan tâm nkuăl kơp, uănh tât ăp nŭih, tă bah nê ăp nau kan geh bonh đă, kơl an ân năn đah kon se geh nau rêh jêr jŏt”.

Ntơm bah nau ndơn kơl an ăp kon se geh nau rêh jêr jŏt bah Rnâng kan rđau nau kan tahen nkuăl ƀon têh, âk ntŭk kan, rmôt kan, êng nŭih bah nkuăl ƀon têh Sơn La hŏ ndơn mât bôk, kơl an “ăp mlâm n’ha mô lăng ueh”. Tât rnôk aơ, rnoh geh rlau 110 kon se geh nau rêh jêr jŏt tâm nkuăl geh ndơn kơl hăn nti. Wa Hà Trung Chiến, Bí thư Thành uỷ Sơn La mbơh: Đah nau leo ntrong tâm âk nau kan bah nau rêh, ngăn lah nau kan kơl an tâm nau rêh, ăp cán bộ, tahen bah Rnâng kan rđau tahen Nkuăl ƀon têh Sơn La ƀư ueh nau kan đah ƀon lan, tâm di ma nau rnơm bah ăp rnoi mpôl bah nkuăl ƀon têh Sơn La:

‘Rnâng kan Thành uỷ rnê prêh ngăn nau ŭch săch nau kan ndrel nau ƀư bah Rnâng kan rđau kan tahen nkuăl ƀon têh, nau kan aơ mô knŭng kơl an ăp rnăk, ăp kon se geh nau rêh jêr jŏt geh nau dơi hăn nti ueh lơn tâm nau rêh, ma geh nau dơi hăn nti, ma hôm geh nau kơl an jru, rêng tâm lam ntrong kan chính trị gay ma ăp ntŭk kan, rmôt kan ndrel hăn nsum ƀư ueh nau kơl an tâm nau rêh bah nkuăl”.

“Hăn ndrel ƀư nau kơl an ndrel kơl n’hao nhoat jâng hăn nti”, mô knŭng lah nau kan ueh ma jêng nau kan ngăn, nhêl tâm Rnâng kan rđau kan tahen nkuăl ƀon têh Sơn La, ntop nau ueh lơn mpeh rup gui ndrel tahen Wa Hồ.

Aơ kŏ lah nau pơk bôk ngăn gay Rnâng kan rđau kan nkuăl ƀon têh nsôih ndâk “Rmôt kan bonh đă ueh”, lŏ ƀư nâp nuih n’hâm bah ƀon lan, ƀư ueh lơn tay n’hâm dăng rgum nsum bah ƀon lan tâm nau ƀư ăp rmôt kan nau kan chính trị n’hao nau kan nâp nâl lơn tâm nau kan neh dak, tahen bah nkuăl, rgop nau ndâk njêng nkuăl ƀon têh Sơn La hun hao ndrih, ngăch, nâp nâl, ueh mhe./.