Du kêng măng tâm ƀon Stor. Tâm ngih mhe nkra ueh, tahen ơm sôt rmanh Đinh Yom mbơh nkoch tât rup gui bah Wa Hồ ndrel Anh hùng Núp geh păng yông tâm ntŭk ueh ngăn. Wa nkoch tât ăp năm khay tâm lơh janh dăng, tĭng Anh hùng Núp hăn lơh phung rlăng, geh nau kan hăn ntĭm tong, njŭn phe, ndrak nsiu ân cách mạng. Tâm ăp rnôk tâm lơh nê, wa Đinh Yom geh âk ngăn ntŭk sôt rmanh, ndrel yŭ lơn lah âk tŏ saơ tahen nsum ma păng lĕ khĭt:

            ‘Kăl e nơh, gâp râng tâm lơh cách mạng ntơm năm 1965, hăn lơh phung rlăng Mỹ, gâp ndrel du đê̆ nŭih êng đŏng geh rmanh. Rnôk gâp geh rmanh, xã nơm rnôk nê lah xã Tây Nam ơm. Tât năm 1968 gâp ƀư xã đội trưởng, lŏ hăn tâm lơh đŏng. Jêh rnôk rklaih năm 75, gaoa ndrel ma tahen lŏ hăn lơh phung Fulro...ndrel n’gâng kan leo tât nau rêh đăp mpăn ân ƀon lan”.

            Luh tahen năm 1999, sĭt tâm ƀon nơm, rêh tâm ƀon Stor, ƀon mro geh nkah ma moh săk bah Anh hùng Núp, tahen ơm Đinh Yom ndrel gưl uỷ, n’gâng kan nsôih nkoch trêng nau ntrŭnh bah Đảng ndrel Ngih dak, bonh đă ƀon lan gŭ âm đăp mpăn, khai hoang lŏ, ntĭm kônh wa tuch tăm, mât rong, tăm ba dak.

            Ngăn lah ntơm rnôk geh săch ƀư bu ranh ƀon năm 2000, bu ranh Đinh Yom mro nkah nau ntĭnh bah Anh hùng Núp lah “mô ân nau rêh kônh wa ach o, rluk mâl”, đah nau ƀư lah nŭih “mât uănh nau ƀon” bu ranh Đinh Yom hŏ bonh đă ƀon lan tâm rnglăp, hun hao văng sa, ndâk njêng ƀon lan, mât chăm kon, sau hăn nti...Ăp nau kan bah bu ranh Đinh Yom rgop nau ƀư rgâl nau mĭn bah ƀon Stor, geh kônh wa ŭch rŏng ndrel ƀư tĭng ăp nau ntrŭnh, ntrong kan bah Đảng, pháp luật bah Ngih dak nchrăp geh kônh wa kơl an. Bu ranh Đinh Yom, nkoch:

            ‘Ntơm bah ntơm tât rnôk aơ, lah rƀŭn ƀon lan, gâp mro nkah kônh wa ƀon lan, bôk năp lah ƀư n’gâng n’gar, mât trong hăn tâm ƀon ân kloh ueh. Jêh nê, ndrel cán bộ thôn, xã kơt lah Kruanh, Bí thư, Kruanh mặt trận hăn bonh đă ƀon lan, bonh đă kônh wa nsôih pah kan gay jut n’huch ach o, tăm ba, tăm mbo, ndâk nau rêh mhe”.

            Geh tahen ơm sôt rmanh-Bu ranh Đinh Yom nsôih nkoch trêng, bonh đă, nŭih ƀon lan ta aơ rgâl nau mĭn, nau kan ndrel blau kơt tĭng nau kan blau mhe tâm nau mât rong, ruch tăm...ndrel tâm rnglăp, nsum ty ndâk njêng ƀon stor jêng ƀon văn hoá gưl n’gor ndrel nsôih geh jêng ƀon lan mhe tâm năm 2024...Nau rgâl ueh aơ hŏ geh nau rgop bah mô êng tahen ơm, bu ranh Đinh Yom kơt nau wa Đinh bư, Bí thư Đảng uỷ xã Tơ Tung, nkuăl Kbang, n’gor Gia Lai, lah rjăp:

            ‘Bu ranh Yom lah nŭih tă râng hăn lơh phung rlăng ndrel ma Anh hùng Núp, tât rnôk aơ săk ranh, hôm lah nŭih tahen ơm ndrel geh rnôk ƀư bu ranh ƀon, lah nŭih bu rnơm. Bu ranh mro lah nŭih leo trong lor ƀư ăp nau kan. Bah năp nơh rnôk hôm râng nau kan tâm xã, mro joi ntĭm ƀon lan hun hao văng sa rnăk vâl, bonh đă kon sau hăn nti. Bu ranh rêh ueh ndrel geh nau jăp. Rnôk aơ rang, n’hâmmô dăng yơm păng hôm nkah nau wa Núp ntĭm, ân kơl an ƀon lan nơm, ntĭm nti kon sau nau ueh nau di, hăn nti ân blau, tă bah nê nŭih ƀon lan kơt tĭng ndrel dôl nsôih ndâk ƀon Stor jêng ƀon lan mhe”.

            Ntơm bah ngih geh ƀom ndrak phung rlăng lơh, geh nau kơl an ntuh kơl bah Đảng, Ngih dak ndrel nau tâm rnglăp, nsu nsôih rlet nau jêr bah ƀon lan, ƀon Anh hùng Núp bol ma ê geh điện, trong, ngih săm ƀŭt geh ntuh kơl ƀư ndâk nâp, kloh, nau rêh nuih n’hâm, drăp ndơ hun hao ăp nhoat. Rlau 100 rnăk tâm ƀon rnôk aơ knŭng 13 rnăk ach o ndrel hŏ jut lĕ ngih truh sat, ăp rnăk kŏ geh ndeh hon đa, tivi...Nau rêh hun hao, nau rnơm bah Đảng, Ngih dak, nar lơn nâp nâl./.