Nău nkoch tâm gŭ ur sai mô hŏ tŏng năm deh bol mhe yơn mô hŏ bah duh hô ta nkuâl Đức Cơ, n’gor Gia Lai an tay âk nău rŭ hôch an rnăk wâl n’hanh lam rêh jêng kon nuĭh. Ta năp nău ngăn geh nê Đức Cơ hŏ nsrôih tĭng ƀư ăp kôp âk trong nkra gay ntrôl rŭch nkô̆ nău dja.

Tâm jay rkêp rkơp, oh H’Chu 16 năm deh ta ƀon Chan, xã n’har bri Ia Pnon ndêt ndot sŭnh ŭnh n’gon piăng mô săk dak đah bar pe lha biăp n’hanh ka khô kâp sai sĭt. Sŭnh ŭnh ndrel đah hit blêu blêu mô tŏng njâr duh rnôk khay mih dôl tât. Mô geh nău kan, H’Chu rêh nsing tâm nău kan rgoh n’gơ bah sai. Nău rêh bah H’Chu tŭp tâm trong dŭt. Tă bah hôm jê̆ mô hŏ geh ndơ ma luh gŭ êng jêng bar hê ur sai mom dja nha hôm gŭ nsum n’hanh me bơ̆, ntơm bah aơ me bơ̆ hôm mbăk tay bar bâr sa jêng nău ach o mƀui tĭng mbro.

Tâm rnôk nê nô nti jrô 9, lôch geh ntreo ntlơi nti gâp saơ ăp băl hăn tât nhih nti gâp saơ rngot, mpŏng lah ăp băl mô gŭ ur sai ơm kơt he

 Tâm ban kơt H’chu, oh Rơ Lan H’Hương ta xã Ia Krieng, nkuâl Đức Cơ nchrăp ƀư me ta 17 năm deh. Tâm rnôk ăp băl dôl hôm nti ri oh H’Hương dơn gĭt ndăch ndăch wăr jay kâp nar deh dơm. Uănh muh măt bah H’Hương, lĕ dĭng nuĭh saơ ji nuih n’hâm yor oh hôm dŭt jê̆ gay ƀư me. Me bơ̆ oh nkoch: Rnôk hôm jê̆ gâp gŭ sai bu klô, me bơ̆ rngot n’hanh lah mpăng. Yơn rnôk păng geh ntreo pha lah dơm yơn mô hŏ nănh nđăp kâp tŏng năm deh mơ dơi ƀư.

Nkuâl Đức Cơ aƀaơ geh bơi 19.500 rnăk đah nklăp 82 rbăn nuĭh, tâm nê geh âk ƀon lan rnoi mpôl đê̆ âk bơi 43 %. Tĭng nchih rgum bah năm 2021 tât aƀaơ, lam nkuâl geh bơi 200 nuĭh tâm bĭch ur sai mô tŏng năm deh, tâm bĭch ur sai dăch kêng ndŭl mham. Nkô̆ tơm ƀư jêng nău tâm bĭch ur sai mô tŏng năm deh, tâm bĭch ur sai dăch kêng ndŭl mham lah mô geh nău mât uănh bah me bơ̆ đah oh kon, jêng tât geh nău ntlơi nti tâm dŏng ơm, bah meng nê lah nău hun hao bah mạng xã hội, nău lăp văn hóa bah dih, rlong gŭ nsum mô ơm geh nău gĭt mât săk bu ur jêng khuch tât kon se nti jêng tât geh nău bŭn ntrel ân tât rlu nti gay tâm nđăp jêng tât geh nău mô hŏ tŏng năm tâm gŭ ur sai. Măt êng, pah kan nkoch trêng, đăm gĭt, ntĭm nti pháp luật ta ntŭk hôm mpăng đêt, nău rêh bah ƀon lan rnoi mpôl đê̆ hôm dêh đêt rđĭl đah nău geh nsum jêng tât trong ƀư nkoch trêng mô geh nău tam. Rnoh âk tâm bĭch ur sai mô tŏng năm deh, tâm bĭch ur sai dăch kêng ndŭl mham âk jêng tât nău ach o hao âk đŏng, lơn lah đah ăp rnăk rnoi mpôl đê̆, yor lam nkuâl Đức Cơ aƀaơ geh bơi 3.000 rnăk ach o ri geh tât 2.600 rnăk ach o lah rnăk nuĭh rnoi mpôl đê̆. N’hanh nuĭh tâm gŭ ur sai mô tŏng năm deh n’hanh dăch kêng ndŭl mham lơn geh âk ta rnăk rnoi mpôl đê̆. Wa Siu Luynh, groi Kruanh UBND nkuâl Đức Cơ nkoch:

Mpôl hên hŏ rđău đă ăp jrô kan kơt jrô kan rnoi mpôl đê̆, jrô kan lao động kan nsum đah bu ur n’hao dăng ƀư nkoch trêng sĭt mpeh tâm dâng, ăp thôn ƀon n’hanh nuĭh râng tâm ăp câu lạc bộ bah druh ndăm lah ntơm bah 16 năm deh lơn lah nkoch trêng đah ăp mon său, ăp kon se geh tât tâm gŭ ur sai mô tŏng năm deh, ndop ăp bôk nău kan, ăp trong nchrăp kan gay n’hao nău gĭt êng.

Đah nău nsrôih tĭng ƀư geh nău tam Đề án hŭch bah ir geh nău tâm bĭch ur sai mô tŏng năm deh, tâm bĭch ur sai dăch kêng ndŭl mham tâm nkual rnoi mpôl đê̆ lvang năm 2021- 2025, nkuâl Đức Cơ hŏ nkoch trêng, mbơh gĭt mpeh tâm bĭch ur sai mô tŏng năm deh, tâm bĭch ur sai dăch kêng ndŭl mham n’hanh ăp siƀŭt geh tât ƀon lan ăp rnoi mpôl đê̆ ta ntŭk. 34 rơh nkoch trêng ta ăp xã, thị trấn hŏ wăch rgum rlău 1600 tơ̆ nuĭh râng, phăt 630 ndrôm siƀŭt, 10 video nkoch trêng nău tât khuch bah nău tâm bĭch ur sai mô tŏng năm deh, tâm bĭch ur sai dăch kêng ndŭl mham an cán bộ, thôn ƀon, tổ dân phố n’hanh UBND ăp xã, thị trấn; ƀư bơi 50 jrô kơi năp nti đah rlău 1.000 nuĭh nti râng mpeh pah kan njrăng n’gang tâm bĭch ur sai mô tŏng năm deh, tâm bĭch ur sai dăch kêng ndŭl mham. Oh Nguyễn Hà Cẩm Vy, kon se nti jrô 9 Nhih nti THCS nội trú nkuâl Đức Cơ ntơm bah nar râng ăp rơh kơi năp nti mpeh nău gĭt êng tât khuch bah nău tâm bĭch ur sai mô tŏng năm deh, tâm bĭch ur sai dăch kêng ndŭl mham.

Râng tâm ăp rơh nti bah dih mông nkoch trêng mpeh tâm bĭch ur sai mô tŏng năm deh, tâm bĭch ur sai dăch kêng ndŭl mham ri gâp saơ mô hŏ dơi tâm gŭ ur sai ơm n’hanh ân mbrôn suan kơt nti gay rhŏ dŏng an nău rêh bah he jêh aơ tay, lôch rnôk hŏ geh nău kan đăp mpăn ri gâp mơ mĭn tât gŭ ur sai n’hanh rnôk hăn tât ƀon lan gâp ân nkoch trêng đah ăp băl ndrel du rơh đah he lah he mô hŏ dơi tâm gŭ ur sai ơm n’hanh an gĭt dơi ăp nău tât khuch jêh aơ tay  n’hanh nkoch trêng đah ăp băl lah he ân mbrôn suan kơt nti gay rhŏ dŏng an nău rêh jêh aơ tay hŏ geh nău kan đăp mpăn ri mơ dơi geh ur joi sai.

Nơm geh nsrôih an ƀư ăp trong nkra jêng nău tâm bĭch ur sai mô tŏng năm deh, tâm bĭch ur sai dăch kêng ndŭl mham hŭch mbrơi tĭng ăp năm. Lah kơt năm 2021 lah 82 nuĭh tâm gŭ ur sai mô tŏng năm deh, 1 hê gŭ ur sai tâm dăch ndŭl mham, ri tât năm 2023 hŏ hŭch hôm 22 nuĭh tâm gŭ ur sai mô tŏng năm deh n’hanh mô hôm geh nău tâm gŭ ur sai dăch kêng ndŭl mham. Năm 2023, nkuâl Đức Cơ ndop tay đề án hŭch bah geh nău tâm bĭch ur sai mô tŏng năm deh, tâm bĭch ur sai dăch kêng ndŭl mham tâm nkual ƀon lan rnoi mpôl đê̆ đah nkô̆ bah bôk nău  kan gưl neh dak hun hao wăng sa rêh jêng kon nuĭh nkual rnoi mpôl đê̆ n’hanh mpeh yôk yang. Wa Siu Luynh, groi Kruanh UBND nkuâl Đức Cơ an gĭt:

Geh tât bôk nău kan hun hao nkual rnoi mpôl đê̆, mpôl hên hŏ jao an ăp nhih pah kan rnoi mpôl đê̆ n’hanh na nê̆ lah jrô kan nsum đah ăp nhih pah kan đơn vị, lơn lah ăp xã, leo ƀư nkoch trêng an ƀon lan, aƀaơ hŏ an ƀư du đêt ntŭk kơt ta xã Gia Tấc, Gia kra n’hanh du đêt xã êng ƀa ƀă. Lôch an ƀư saơ dơi nău nsrôih tĭng ƀư bah nuĭh ƀon lan.

Đah ăp trong nkra lĕ n’hâm suan, nuĭh rnoi mpôl đê̆ ta nkuâl Đức Cơ, n’gor Gia Lai dôl tĭng kơn n’hao nău gĭt rgâl êng nău kan, n’hao nău dơi tât đah nău lư n’hanh rgum nău tât râng bah nsum mpôl lam ƀon lan, nkre ntik dơi suan dăng rgum bah ăp gưl, ăp n’gâng kan ƀon lan tâm nău jut jăng ăp rluk mâl ơm tâm bĭch ur sai, rdâk njêng nău rêh kloh rsang rhơn răm, đăp mpăn./.