Kruanh Quốc hội Vương Đình Huệ lah rjăp ăp nau ntrŭnh bah Quốc hội kŏ leo nŭih ƀon lan ndrel ntŭk kan tăch rgâl tâm ntŭk kan tơm. Công nhân ndrel nŭih pah kan lah nŭih khay ngăn tâm nau tâm boh tâm ban, đăp mpăn ndrel geh nau ueh, lah nŭih ntrơn rgâl bah dĭng lĕ ăp luật tâm ntrong kan pháp luật. Nau kan Quốc hội, Uỷ ban Rnâng kan Quốc hội, ăp ntŭk kan bah Quốc hội, ăp ntŭk kan, ntŭk ƀư nau kan geh rnôk tâm mâp, djăt nau mĭn, nau ŭch bah nŭih pah kan gay ma nar lơn ƀư jêh ntrong kan pháp luật dŭt n’hâm khlay:

 ‘Phung hên uănh aơ lah nau tâm mâp cử tri tĭng nkô̆ khlay, gay dơi geh rơh tâm mâp djăt ndrel tâm nchră đah ăp cán bộ công đoàn, đoàn viên công đoàn, nŭih pah kan ntoh măt ân rmôt nŭih pah kan âk mpưm geh nklăp 50 rkeh nŭih tâm lam dak, aơ lah rmôt pah kan, ê nkra, njêng luh drăp ndơ ân ƀon lan ndrel rgop nau khlay bah nau hun hao văng sa, rêh jêng bah neh dak, nkre aơ kŏ lah nŭih geh nau khuch bah nau ntrơn rgâl ăp luật tâm ntrong kan pháp luật Việt Nam”.

Tâm nchră, nau kan ngih gŭ tâm công nhân lah ngoai tâm ăp nkô̆ nau âk mpưm tâm ăp nkô̆ nau âk mpưm nŭih pah kan geh nau dơi. Nô Nguyễn Việt Anh, đoàn viên Tổng công ty Cổ phần Bưu chính Viettel tâm rmôt kan bưu chính viễn thông tahen ân lah:

‘Kăl e, ngih gŭ nsum aka ngăn, geh ntŭk geh nkual công nghiệp, geh ntŭk công nhân ri ntŭk nê geh ntŭk bu gŭ nsum. Yơn tât rnôk aơ, neh dak nơm hŏ geh âk lơn, yơn âk nkuăl công nghiệp, công nhân geh tât ma rhiăng, ma rbăn công nhân. Lah uănh tâm ngih chung cư ri rnôk aơ ê geh tŏng dơi ôh ngih chung cư. Ri ma khuch tât nŭih pah kan”.

 Ơh nau ôp mpeh nkô̆ aơ, Kruanh Quốc hội Vương Đình Huệ mbơh, aơ lah nau kan hôm nkol đah công nghiệp mhe, nau kan mhe. Ntŭk geh kan pah, nkual công nghiệp âk, yơn lŏ mô geh chung cư gay ma gŭ:

‘Lah nau kan hun hao ntŭk ƀư kan tâm đô thị ngăch lơn, tâm nrôk đô thị lŏ geh nau mbrơi, ri mra geh nau nkol lah mô geh nau dơi mpeh ngih gŭ. Yơn rlŏ ma nê,lah nơm hăn nchuăt ngăch lơn đô thị ngăch lơn bah năp ri păng mra geh ăp ngih ma mô geh nŭih gŭ, lôch ƀư ma mô geh nŭih rvăt. Ri ma nau kan aơ păng hôm geh tât nau rgum. Rnôk aơ, Chính phủ, Thủ tướng Chính phủ dôl ma rđau ngăn nau ndâk nau nchrăp kan. Nau kan rgum đô thị, rgum ƀon lan, mhâm ƀư nau kan gay geh rgum ân tâm di geh dơi bar nau kan aơ”.

 Kŏ tâm rnôk tâm nchră aơ đŏng, nŭih pah kan kŏ ndŏ luh nau ôp ân rđau kan Quốc hội, chính phủ, ăp n’gâng kan bah rmôt nau kan geh tât nau đăp mpăn ndơ sa, ăp nau kan geh tât nau rêh drăp ndơ, nuih n’hâm bah nŭih kan mât neh dak ndrel rgâl mhe hành chính, ăp nau kan kơl an nŭih pah kan, mpeh nau dơi bah nŭih pah kan, mông sa rnôk dôl pah kan. Nŭih tơm bah uỷ ban kơl an bah Quốc hội, Kruanh Uỷ ban Khoa học ndrel công nghệ, Kruanh Uỷ ban pháp luật, N’gâng kan dak si, N’gâng kan ntĭm nti hŏ ơh ăp nau ôp bah nŭih pah kan.

Ntoh nau tâm nar tâm nchră, Kruanh Quốc hội Vương Đình Huệ lah, ăp nau rgop bah đoàn viên, nŭih pah kan hŏ mbơh tâm di ngăn nau rêh, nau kan, nau mĭn, nau ŭch rŏng, nau kơl an bah đoàn viên, nŭih pah kan lam dak ndrel ăp nau nkol tâm rnôk ƀư nau kan, pháp luật ƀư rmôt đoàn viên, công nhân, viên chức, nŭih pah kan hôm geh nau rvê, nau ji nuih, nau kan kơt kan pah, nau geh jêng, nau kan, nau kơl an geh ngih gŭ, nau kơl an bảo hiểm xã hội, bảo hiểm y tế, nau kan ăp ntŭk du ntil kan:

‘Nau dơi bah tâm nchră mra geh lŏ ƀư rjăp nuih n’hâm ntrơn rgâl mhe, pah kan ngăn bah Quốc hội yor nau geh dơi bah ƀon lan, bah giai cấp công nhân, nkre lah rjăp nau nchrăp, nsôih bah ntŭk kan Công đoàn Việt Nam tâm rnôk râng ndâk njêng Đảng, ndâk njêng n’gâng kan. Nơm ân geh rnơm lah, đah nau rđau kan tâm di, nau kan ang ngăn bah Đảng, nau tâm rgop ngăn, tâm ban ndrel nau lăp kan rjăp, nchrăp bah ăp gưl, ăp ntŭk kan ndrel lam ntỏng kan chính trị, nau kơl an, tâm ban nuih n’hâm, nau nsôih ndrel nau kơl bah ƀon lan, nŭih kan, ndrel ma nsum mpôl ntŭk pah kan, ngăn lah nơm mra geh rlet rlau nau jêr, nau ntul rlong”.

Ta rnôk tâm nchră, Kruanh Quốc hội Vương Đình Huệ, ăp Groi Kruanh Quốc hội hŏ pă ân 20 đoàn viên công đoàn geh nau blau, đoàn viên, nŭih pah kan geh nau rêh jêr jot./.