Ăp nau nchră lah rjăp “Tahen Wa Hồ” kơp dơn tâm nau geh bah giai cấp, nuih n’hâm ntrŏng dŭt n’hâm đah Đảng, Ngih dak bah tahen nơm, lah nau khlay tơm bah tahen ƀon lan Việt Nam. Nau ueh ang “Tahen Wa Hồ” lah du ntrong kan tơm, geh nau khlay bah nŭih tahen cách mạng, nê lah tâm moh nau tât, tahen kŏ ƀư nau kan ân Đảng, ân ƀon lan, mra tâm lơh tât khĭt săk yor nau đăp mpăn dah rŏng bah neh dak, yor chủ nghĩa xã hội. Ăp nau khlay nê geh njêng ndrel hun hao tâm rnôk ndâk njêng, tâm lơh ndrel têh jêng bah tahen ƀon lan Việt Nam. Tĭng Tiến sĩ Hoàng Chí Bảo, Uỷ viên Hội đồng lý luận Trung ương mbơh tât săk ntơ “Tahen Wa Hồ”:

‘Tahen wa Hồ” hŏ jêng nŭih mô knŭng bah nau mĭn njêng khoa học, ma hôm lah nŭih gay geh ndrĭng nau, njroh mprơ, nau tơm bah văn học, nghệ thuật êp nkô̆ nau tơm khlay aơ tâm moh nau dơi geh. Tahen Wa Hồ rgum âk tâm nê lah nau ueh, nau rêh, nau kan bah tahen ƀon lan nơm. Nkoch tât du nau ueh mpeh văn hoá Việt Nam tâm rnôk rơh Hồ Chí Minh, ma tâm nê văn hoá tahen, văn hoá tahen nơm”.

Ntoh nau tâm nar rƀŭn, Trung tướng Trịnh Văn Quyết, Groi Kruanh N’gâng kan chính trị, tahen ƀon lan Việt Nam lah rjăp: Nau nkhôm prêh khlay “Tahen Wa Hồ” geh ƀon lan rnơm, ŭch, pă ân tahen nơm ntơm bah nau tâm lơh mprơh Pháp. Tam moh nau kan, bol ma jêr, bol ma roh săk nơm, yơn cán bộ tahen lam ƀon lan tâm rơh rlau aơ mro ƀư ueh tay rup gui bah tahen Wa Hồ, lơn ma jêr, lơn ma mpoh ang. Bah năp nau ntuh rlong rnôk aơ nau ueh aơ lơn ma ân geh ƀư rjăp:

 “Tâm rnôk mhe, nau kan ndâk njêng tahen, ƀư nâp neh dak, mât nâp neh dak đah ăp nau đă nar lơn ma prêh. Tâm rnôk nê, ăp phung rlăng dôl ma lŏ ntrŭt dăng nau “dah ma njêng nau êng”, “ntrŭt dăng “nau dah rŏng njêng” “dah rŏng geh” tâm ntrong kan, “bah dih chính trị đăp mpăn” tahen, nklă êng ntrong, nau ntrŭnh bah Đảng, nau ntrŭnh pháp luật bah Ngih dak ndrel nau ơm bah tahen ƀon lan Việt Nam janh dăng, nau prêh ueh “Tahen Wa Hồ”. Rlau ma ăp rnôk, rnoh khlay bah “Tahen Wa Hồ” mro geh mât nâp ndrel ƀư ueh rjăp lơn, gay tŏng dơi nau ŭch, nau kan tâm rnôk mhe”.

Bah năp nau ntul rlong “dah ma njêng êng nau đăp mpăn” rnôk aơ, âk nau đă ăp nau ndâk nau kan mpŏng ŭch ƀư nau kan, ƀư kơt nau “Tahen Wa Hồ” tâm rnok mhe. Tâm nê, geh nau n’hao nau rđau kan ngăn, sŏng mpeh ăp ding bah Đảng, ntrŭt dăng nau ndâk ntŭk ntu văn hoá tâm tahen, mât nâp ƀư tĭng nau ueh prêh Tahen Wa Hồ, nsôih ƀư nâp rdâng lơh nau geh njêng êng.

Nau tâm nchră đah âk nau kan gay ƀư kloh ăp nkô̆ nau kan tơm bah “Tahen Wa Hồ” lah ntrong gay Quân uỷ Trung ương, N’gâng kan neh dak, N’gâng kan chính trị ndrel gưl uỷ, rđau kan ăp gưl năn nau ntrŭnh, ntrong rđau kan, rđau đă lam tahen ân geh mât, ƀư ueh nau kan văn hoá “Tahen Wa Hồ” tâm rnôk mhe, ƀư ân dơi nau kan ndâk njêng tahen, ƀư nâp neh dak, mâ nâp neh dak. Nkre lah nau geh nâp nau kan cách mạng gay cán bộ, đảng viên tâm tahen ân geh ang êng, nkra êng, nsôih chiăr nti, n’hao nau blau rêh cách mạng, rêng nau khlay văn hoá “Tahen wa Hồ” tâm rơh mhe.

Rnoh khlay văn hoá “Tahen Wa Hồ” lah nau rgum ăp nau khlay ueh bah văn hoá tahen Việt Nam, geh ăp rơh cán bọ, tahen bah tahen ƀon lan Việt Nam djăt, kơt, bun dăp tâm nâm nau rđau kan, ƀư, ntĭm nti, chiăr nti bah Đảng nơm ndrel Kruanh Hồ Chí Minh. Ƀư ueh ndrel ƀư ân nau khlay văn hoá “Tahen Wa Hồ” geh mât nâp ndrel mô rlu mpoh ang, rgop nau ndâk tahen ƀon lan Việt Nam nâp mpeh chính trị, ƀư nau tơm gay n’hao nau rgum rgum, n’hâm tâm lơh, ƀư jêh nau kan ma Đảng, Ngih dak ndrel ƀon lan jao đă./.