UBND n’gor Dak Lk mhe ƀư rƀŭn nchră uănh lah nu nău mbơh ƀư ăp bôk nău kan rƀŏng tĭng lam dak lvang 2021-2023, mkra nău kan khlay tâm lvang 2023-2025 n’hanh nchrŏng trong mbơh ƀư tâm lvang 2026-2030. Ƀư tĭng 3 bôk nău kan rƀŏng tĭng lam dak (thôn ƀon mhe, n’hŭch ach o nâp nâl n’hanh hun hao wăng sa-rêh jêng nkual rnoi mpôl đêt n’hanh nkual yôk), Dak Lak lĕ dơi jao bơi 2.320 rmen prăk. Tâm nĕ, bôk nău kan hun hao wăng sa-rêh jêng nkual rnoi mpôl đêt n’hanh nkual yôk geh dŭt âk, đah rnoh prăk rlău 1.000 rmen prăk; bôk nău kan n’hŭch ach o nâp nâl lĕ jao rlău 382 rmen prăk; Bôk nău kan ndâk njêng thôn ƀon mhe lĕ jao rlău 927 rmen prăk. Rlău ma tơm prăk ngih dak, Dak Lak lĕ rgŏ jă geh nklăp 1.542 rmen prăk tâm 3 năm 2021-2023 gay ƀư tĭng bôk nău kan rƀŏng tĭng lam dak ndâk njêng ƀon lan mhe.

Wa Phạm Ngọc Nghị, Kruanh UBND n’gor, Kruanh ban ntĭm rđău bôk nău kan rƀŏng tĭng lam dak n’gor Dak Lak mĭn lah, năm tât, n’gor mbra nsrôih dôh rklaih jêr jŏt, gay ăp bôk nău kan mât uĕh săk rnglăy âk ngăn. Tâm nĕ, nău neh gŭ neh tuch tăm tâm nkual rnoi mpôl đêt mbra dơi kơl lor, đăp mpăn an kônh wa rnoi mpôl đêt đăp mpăn nău rêh:

“Aƀaơ tĭng nău mbơh ri nklăp 23% ƀon lan rnoi mpôl đêt hôm e ach o ta dĭng lĕ ƀon lan rnoi mpôl đêt, yơn 65% ƀon lan rnoi mpôl đêt tâm dĭng lĕ rnoh ach o bah n’gor, du rnoh dŭt đêt. Ach o ri hôm e âk nkô̆ nău ma lor lah bu hôm e lah mô tŏng neh tuch tăm, neh gŭ, mô tŏng ăp ndơ gay ƀư lan ƀư nkra njêng geh nău rêh. He dôl rgum an bôk nău kan nkual yôk ri kơl lor bah n’gor ủy, Ủy ban hôm e lah neh tuch tăm, neh gŭ an ƀon lan. He dơi ƀư âk nău êng ma ƀon lan mô tŏng neh tuch tăm, mô tŏng neh gŭ, mô tŏng ăp ndơ gay nkra njêng gay rêh ri pơng mô geh nkô̆ nău”.

Mhe rlău, ta nkual ƀon têh Pleiku, ƀư rƀŭn nchră uănh lah săk rnglăy ƀư tĭng Ntĭm đă bah Ban thường vụ N’gor ủy Gia Lai mpeh n’hao nău rđău kan bah ăp gưl ủy mpeh ndâk njêng thôn ƀon mhe tâm nkual rnoi mpôl đêt. Tĭng nău mbơh, 5 năm bah năp, ăp ntŭk tâm n’gor lĕ rgŏ jă rlău 1.500 rmen prăk gay mbơh ƀư ndâk njêng thôn ƀon mhe tâm nkual rnoi mpôl đêt. Tâm nĕ, tơm prăk ngih dak bơi 1.300 rmen prăk, prăk doanh nghiệp ntop kơl bơi 24 rmen prăk, prăk ƀon lan rgop rlău 153 rmen prăk, prăk manh 43,5 rmen prăk. Jêh 5 năm, aƀaơ lam n’gor geh 110 thôn, ƀon nkual rnoi mpôl đêt tâm di thôn ƀon mhe, nău rêh bah kônh wa nar lơ dơi hao.

Yơn lah nău ƀư tĭng 3 bôk nău kan rƀŏng tĭng lam dak ta ăp n’gor Tây Nguyên hôm e âk jêr jŏt; du đêt nău nchrăp ƀư, nkô̆ nău mô hŏ dơi ƀư n’hanh pă an prăk yor mô geh trong ntĭm tŏng ăp bah Trung ương. Trong kan uănh nđôi, năl rnoh ndơ ƀư kơp ntŭk kơp, năl nău nchrăp ƀư ntuh kơl hôm e âk vĭ vĕ. Wa Trương Thế Vinh, cán bộ pah kan rnoi mpôl đêt ta nkuăl Ia Grai, n’gor Gia Lai an lah, cán bộ bah dâng dôl ngăn ngên mâp jêr jŏt rnôk ƀư bôk nău kan.

“Geh âk sam ƀŭt bah n’gor mô ngăch nkôp đah rnôk mbơh ƀư bôk nău kan, lơn lah ta bah dâng mô hŏ geh trong ntĭm na nê̆. Lơn lah Nău nchrăp ƀư 1 ntop kơl jay gŭ, neh gŭ, neh tuch tăm tĭng nău ntrŭnh 04 bah Thủ tướng Chính phủ ri ntop kơl neh gŭ đah rnoh 44 rkeh prăk/rnăk n’ahnh neh tuch tăm 22 rkeh prăk du rnăk ri jêr dơi ƀư. Neh tuch tăm an kônh wa ri uănh lah dŭt âk, đah rnoh prăk ntop kơl kơt bah lơ n’hanh prăk an manh kơt nĕ kônh wa mô dơi rwăt tŏng rnoh neh gay tuch tăm, ƀư jay”.

Ta Kon Tum, mhe aơ, rlău 1.000 đoàn viên druh ndăm n’gor Kon Tum lĕ râng bôk nău kan tâm mâp, tâm nchră đah Kruanh UBND n’gor, đah bkô̆ nău “Mât uĕh ƀư tơm bah druh ndăm tâm nău ƀư tĭng ăp bôk nău kan rƀŏng tĭng lam dak ta n’gor Kon Tum”. Kruanh UBND n’gor Kon Tum Lê Ngọc Tuấn mĭn lah, aơ lah ăp nkô̆ nău khlay rƀŏng tĭng an druh ndăm tâm nău ƀư tĭng ăp bôk nău kan khlay rgop ƀư dơi nău kan wăng sa-rêh jêng năm 2023 bah n’gor. Gay druh ndăm Kon Tum rgop âk lơn tay tâm nău ƀư tĭng ăp bôk nău kan lam dak, Kruanh UBND n’gor Kon Tum Lê Ngọc Tuấn, nkoch:

“Ban Thường vụ N’gor đoàn, ăp Nkuăl đoàn, Thành đoàn mbơh ƀư uĕh ăp ntrong leo nău ƀư cách mạng đăp mpăn lam hvi, nău rƀŏng, nău săk rnglăy, nâp nâl, nău mĭn ƀư mhe. Tâm nĕ rgum tâm nău kơt nkoch trêng mpeh ndâk njêng thôn ƀon mhe, n’hŭch rnoh rnăk druh ndăm ach o, râng ndâk njêng nkra trong kơt ntung n’hanh trong thôn ƀon. Ndâk njêng ăp ntrong kan tâm rgop kan ndrel hun hao wăng sa bah druh ndăm”.