Nkuăl têh Buôn Hồ, n’gor Dak Lak geh rlău 100 rbăn nuĭh, đah 25 rnoi nuĭh gŭ rêh ndrel, tâm nĕ geh bơi 31% lah nuĭh rnoi mpôl đêt. Ƀư tĭng trong kan rnoi nuĭh n’hanh nău kơl rnoi mpôl đêt, tâm 5 năm bah năp, nkual têh Buôn Hồ lĕ ƀư 20 rơh mbơh ntĭm, nkoch tơih naư kan, hăn pah kan dak bah dih đah bơi 3.000 nuĭh râng, tâm nĕ n’gul lah nuĭh rnoi mpôl đêt. Ƀư 27 jrô ntĭm nti nău kan an bơi 1.000 nuĭh pah kan thôn ƀon lah nuĭh rnoi mpôl đêt tâm rnăk ach o, rnăk êp ach o geh nău ŭch nti nău kan. Ăp năm bah năp, nkual ƀon têh Buôn Hồ dơi tâm pă bơi 20 rmen prăk gay ƀư tĭng ăp nău nchrăp ntuh kơl, ndâk ƀư ntung trong an ăp ƀon, mkra an neh gŭ, jay gŭ, neh tuch tăm, dak dŏng an ăp ƀon jêr jŏt n’hanh ntop kơl nti nău kan an druh ndăm.

Ntung trong soih luh nkual têh dơi nâp nâl; lĕ rngôch nuĭh ƀon lan dơi dŏng điện n’hanh dak kloh uĕh. Trong kan mât ndrăy n’hanh mât uĕh văn hóa dơi uănh mĭn tât ntuh kơl. Trong kan ndâk njêng trong chính trị hăn ndrel đah ntĭm nti, ntop tay ndâk njêng rmôt cán bộ lah nuĭh rnoi mpôl đêt uănh tât khlay. Wa Y Cing Mlô, Groi kruanh UBND nkual têh Buôn Hồ an gĭt: nkual têh rgŏ jă ăp nuĭh bah trung ương tât ƀon lan gay rgum ntuh kơl hun hao wăng sa-rêh jêng an ăp ntŭk nkual rnoi mpôl đêt.

Tâm năm tât UBND nkual têh rgum mbơh ƀư du đêt nău kan khlay, ăp nău kơl bah Đảng, pháp luật bah Ngih dak geh tât trong kan rnoi mpôl đêt n’hanh nău kơl rnoi mpôl đêt tâm lvang aƀaơ, ntuh kơl ntung trong, wăng sa rêh jêng gay n’hao rnoh nău rêh bah nuĭh ƀon lan. Rgum hun hao wăng sa rêh jêng, ntĭm an nuĭh ƀon lan kơt dŏng ăp khoa học kỹ thuật mhe gay n’hao săk rnglăy, uĕh kah ndơ. N’hao đăp mpăn rnă njrăng chính trị, đăp mpăn nău rêh jêng.

Dơi n’gor Kon Tum săch ƀư lor, nkuăl n’har bri Sa Thầy lĕ ƀư lôch uĕh Đại hội đại biểu ăp rnoi mpôl đêt rơh tal 4 năm 2024. Nkuăl n’har bri Sa Thầy, n’gor Kon Tum geh rnoh nuĭh rlău 54.000 nuĭh ƀon lan, tâm nĕ rnoi mpôl đêt geh rlău 57%, nkuăl geh 11 xă, nkuăl têh đah 64 thôn ƀon, tâm nĕ geh 45 thôn ƀon rnoi mpôl đêt. Tĭng bôk nău kan ƀư n’hanh Nsrôih nău đă Đại hội đại biểu ăp rnoi mpôl đêt rơh tal 3 n’gluh an, 5 năm bah năp ăp rnoi mpôl đêt tâm nkual lĕ tâm rnglăp, nsrôih rgop ntrôl wăng sa-rêh jêng hun hao.

Tât aƀaơ, lĕ rngôch ntung trong bah nkuăl tât ăp xă n’hanh 64 thôn, ƀon lĕ dơi nâp nâl, đăp mpăn hăn n song 2 yan mih, wai; lĕ rngôch ăp rnăk tâm nkuăl lĕ dơi dŏng điện lam dak; lĕ rngôch ăp xă, nkuăl têh geh ngih dak si tâm di; nkuăl geh 5 xă tâm di thôn ƀon mhe n’hanh 1 xă tâm di xă thôn ƀon mhe n’hao prêh; 7 thôn, ƀon dơi kơp dơn thôn, ƀon mhe ta nkual rnoi mpôl đêt, Ntoh măt rnoi nuĭh dŭt đêt nuĭh Rơ Măm tât râng đại hội, nô A Thái, Bí thư Chi bộ, Kruanh thôn ƀon Le, xă Mô Rai, an gĭt:

Râng Đại hội đại biểu ăp rnoi mpôl đêt nkuăl Sa Thầy rơh tal 5 năm 2024 gâp dŭt lap. Đah nău ƀư lah Bí thư chi bộ, kruanh thôn gâp hăn lor tâm nău kan rgŏ jă kônh wa hun hao wăng sa, nkra njêng gay rgâl nău rêh. Lơn lah ƀư tĭng n’glôn jêh mrô 8 bah n’gor ủy ƀư rgâl nău mĭn, trong ƀư đah ƀon lan rnoi mpôl đêt n’hanh jŭt jăng ăp nău rluk mâl. Râng đại hội gâp nti âk nău blău ơm, ntrong kan bah ăp ƀon, ăp thôn, ăp xă êng mpeh rgŏ jă kônh wa n’hanh kơt dŏng tâm nău rêh.

Ta Đại hội đại biểu ăp rnoi mpôl đêt nkuăl Sa Thầy rơh tal 4, ăp đại biểu ndrel uănh lah tay săk rnglăy ƀư tĭng trong kan rnoi mpôl đêt n’hanh Nău nsrôih đă Đại hội rơh tal 3; nsơr ty mbơh an Nău nsrôih đă Đại hội rơh tal 4 đah nău ŭch ndâk njêng tay tâm rnglăp ăp rnoi nuĭh; n’hao uĕh nuĭh kan nuĭh rnoi mpôl đêt; rgŏ jă, joi ƀư n’hanh dŏng geh săk rnglăy ăp tơm prăk, nău geh n’hanh nău dơh bah nkuăl; mât ndrăy n’hanh ƀư uĕh văn hóa way ơm ăp rnoi mpôl đêt... Đại hội săch 22 đại biểu hăn râng Đại hội đại biểu ăp rnoi mpôl đêt n’gor Kon Tum rơh tal 4 năm 2024.