Tâm nĕ, Dak Lak lah ngoăy tâm 22 ntŭk geh Tổng liên đoàn Lao động Việt Nam săch ƀư bôk nău kan “Chợ tết Công đoàn năm 2023”. Hôm ta nkuăl ƀon têh Hồ Chí Minh mbra mât chăm kơl an rlău 30 rbăn nuĭh pah kan bâh ăp trong kan kơt: “Nar tâm mâp nuĭh pah kan”, “rơh tăch ndơ tâm rnglăp”, “tết  rgum nsum”.

Ta Dak Lak, bâh lơ 6 tât 8/1, Tổng Liên đoàn lao động Việt Nam tâm rgop đah Liên đoàn lao động n’gor Dak Lak ƀư bôk nău kan “Chợ tết Công đoàn năm 2023”. Aơ lah nău kan dŭt khlăy ntop mât chăm nău rêh nuĭh pah kan, nuĭh pah kan geh nău rêh jêr jŏt, rnăk ach o, gay ma mô geh du hê nuĭh nklơi tay ba kơi rnôk tết tât, năm mhe sĭt. Njôt ta ti âk ntil drăp ndơ mhe geh rvăt ta rơh “Chợ tết công đoàn năm 2023” nô Nguyễn Hữu Lâm Sơn, nuĭh pah kan công ty Thép Asean, nkual công nghiệp Hòa Phú an gĭt:

“Gâp geh pă an 2 phiếu 150 rbăn prăk rĭ hăn rvăt rmĭt aơ, du nklâm ndơ rĭ geh rvăt 1 mblâm phích dak, ngi n’hanh du mblâm aơ”.

 Rơh bôk năp tât râng rơh tăch ndơ “Tết công đoàn”, yuh Nguyễn Thị Phượng, nuĭh pah kan ta công ty ntŭk gŭ rêh nkuăl ƀon têh n’gor Dak Lak an lah, nău pah kan aơ lĕ kơl an ăp đoàn viên công đoàn n’hanh nuĭh pah kan geh rơh rvăt năp âk ntil ndơ tết đah rnoh thuk.

“Năm aơ lah rơh bôk năp gâp tât ta aơ dơn nklâm ndơ aơ, gâp saơ dŭt rhơn ngăn n’hanh dŭt nđơr. Ăp nklâm ndơ aơ kơl an rnăk vâl gâp geh vơt tết ueh răm đăp mpăn”.

Ntŭk tăch ndơ tết Công đoàn 2023 n’gor Dak Lak geh ƀư bâh nar 6 tât 8/1/2023, geh 40 ndrơng ndơ, tăch ăp ntil ndơ, nău kơl dŏng tơm khlay tâm rnăk vâl đah rnoh thuk mô lah mô sŏk prăk an rlău 3 rbăn nuĭh pah kan. Ndrel đah nĕ, Liên đoàn lao động n’gor Dak Lak lĕ pă an 400 nklâm ndơ an nuĭh pah kan. Nkre lah ƀư ăp nău kan văn hóa, njroh mprơ, pâl rlưn, ăp nău kan mbơh tơih mpeh pháp luật, uănh săm ji, pă dak si mô sŏk prăk an nuĭh pah kan. Wa Nguyễn Công Bảo, kruanh liên đoàn lao động n’gor Dak Lak an gĭt.

“Ntŭk tăch ndơ công đoàn nău ngăn lah trong kan mât chăm kơl an nuĭh pah kan. Aơ lah rơh bôk năp Công đoàn n’gor geh leo ƀư ntŭk tăch ndơ tết Công đoàn, bôk năp mpôl hên dŭt mĭn rvê, yơn đah nău kơl an bâh Tổng liên đoàn , nău mât kơl ntĭm đă bâh n’gor ủy, tâm rgop kan bâh Ủy ban n’hanh ăp n’gâng kan geh tât n’hanh ngăn lah nău nsrôih bâh ăp oh yuh công đoàn ăp gâl kan mpôl hên lĕ geh mbơh tơih ngăch ndăn , rgŏ jă bơi tât 40 ntŭk tât râng tăch ăp ntil ndơ”.

Đăk Lăk lah ngoăy tâm 22 ntŭk geh Tổng liên đoàn lao động Việt Nam săch ƀư bôk nău kan  “Ntŭk tăch ndơ tết công đoàn năm 2023”. Tĭng nău mbơh bâh wa Trần Thị Thanh Hà, Ủy viên đoàn chủ tịch, kruanh rnâng kan mât uănh nău pah kan, Tổng liên đoàn lao động Việt Nam, aơ lah nău kan khlăy na nê̆ bâh ntŭk kan công đoàn ntop kơl gay ma an rnăk vâl ăp nuĭh pah kan geh nău rêh jêr jŏt geh vơt năm mhe, vơt tết ueh răm, đăp mpăn, hơm răm.

“Ăp rơh tăch ndơ tết công đoàn năm aơ geh ƀư đah nău têh âk bâh 30 tât 120 ndrơng ndơ an ăp ntŭk, ta nĕ geh ăp ndrơng ndơ mô sŏk prăk n’hanh ngăn lah Tổng liên đoàn lao động Việt Nam geh bâh 2.500 tât 3 rbăn vocher an du rơh tăch ndơ n’hanh du rnoh pă an kơt nĕ lah 300 rbăn prăk gay ma nuĭh pah kan mbra dơi dŏng gay ma rvăt ăp ntil ndơ n’hanh ngăn lah mpôl hên geh rgum dŭt âk ăp ndrơng ndơ bâh trung ương n’hanh ăp ntŭk kan nsĭt tât ăp ntil ndơ khlăy ueh đah rnoh hŭch bâh 10 tât v50-70% gay ma nuĭh pah kan geh du tết ueh răm đăp mpăn lơn”

Ta nkual nkret njêng Linh Trung 1, nkuăl ƀon têh Hồ Chí Minh, Công đoàn ăp nkual nkret njêng lĕ geh ƀư bôk nău kan “Nar tâm mâp tâm rnglăp- Tết đoàn viên” năm 2023, gay ma mât kơl nău rêh an bar pe jât nuĭh pah kan geh nău rêh jêr jŏt. Nar tâm mâp geh ƀư âk nău kan ntoh n’gôr na nê̆. Kơp dơn geh âk rnoh phiếu rvăt ndơ mô gay ma rgâl âk ntil ndơ ngêt sông, ndơ dŏng, ndơ dŏng kơl an rnăk vâl nău ŭch dŏng rnăk vâl n’hanh rơh tết. Rlău ma nĕ, bôk nău kan lĕ pă vé ndeh păr, vé tàu, ndeh, ndơ tết  an nuĭh kan geh nău rêh jêr jŏt. Nuĭh pah kan Nguyễn Thị Thiết ta công ty Freetrend, ƀon tơm Quảng trị geh pă vé tàu sĭt ƀon tơm an lĕ ma rnăk vâl, rhơn an gĭt.

“Aơ lah rơh bôk năp oh geh dơn ndơ kơl sĭt ƀon tơm sa tết lôch 3 năm pah kan. Đah rnoh vé kơl an aơ oh rvăt bah dih lĕ rlău 2 rkeh prăk hôm, aƀaơ geh pă an nkrem rnoh prăk ăn nsong. Mô dơn êng gâp ma lĕ rnăk vâl 4 nuĭh geh pă vé sĭt ƀon tơm vơt tết da dê”.

Tĭng nău nchrăp Công đoàn nkual nkret njêng-nkual công nghiệp nkuăl ƀon têh Hồ Chí Minh mât kơl an rlău 30 rbăn đoàn viên nuĭh kan bâh ăp trong kan kơt: Nar tâm mâp ƀon lan, rơh tăch ndơ tâm kơl, tết rgum nsum, tâm mâp nuĭh pah kan ta ntŭk gŭ, pă an vé ndeh păr, vé tàu, ndeh, koh sŏk mô sŏk prăk, pă an chữ thư pháp, tâm rlong mprơ karaoke...đah lĕ rnoh prăk rlău 20 rmen prăk.

VOV