Kêng măng 17/5, Thủ tướng Chính phủ Phạm Minh Chính ƀư tơm rơh hop mpeh nô nău an tĭng ƀư Đề án “Ntuh kơl rdâk njêng dŭt đêt 01 rkeh jay gŭ thuk prăk  an ăp nuĭh geh wăng sa đêt, công nhân nkual công nghiệp lvang năm 2021-2030”.

Rơh hop gay nchră trong droh rklaih jêr jŏt, kŏ kol mpeh jay gŭ thuk prăk, nô nău an ƀư lôch jêh tĭng ƀư Đề án dja. Mpeh lôch jêh an tĭng ƀư jay thuk prăk ntơm bah năm 2021 tât aƀaơ lôch rgum mbơh bah ăp n’gor lam dak geh 503 jay gŭ thuk prăk hŏ dơi an ƀư đah rnoh âk 418.200 rnăk, tâm nê rnoh âk ntŭk ƀư lôch jêh lah 75 ntŭk. Rnoh âk trong nchrăp kan hŏ ntơm rdâk njêng lah 128 trong nchrăp đah rnoh âk 115.379 rnăk; Rnoh âk trong nchrăp kan dơi dơn geh trong nchrăp kan ntuh kơl lah rlău 300 ntŭk nchrăp. Lah ta rơh hop, Thủ tướng Phạm Minh Chính lah rjăp, hun hao jay thuk prăk lah nkô̆ khlay bah ăp trong kơl hun hao wăng sa- rêh jêng kon nuĭh, lam trong kan chính trị, ăp gưl, ăp n’gâng kan ân ntrŏng nău dơn kan ƀư njêng jay gŭ thuk prăk lah nău dơn kan chính trị khlay bah n’gor, đơn vị gay rgum lơn đŏng, lĕ n’hâm suan lơn đŏng, nsrôih ƀư ân lôch jêh rnoh âk geh jay gŭ thuk prăk ta n’gor hŏ ndơ̆ luh.