Ôi 8/1, ta n'gor Phú Yên, Thủ tướng Chính phủ Phạm Minh Chính hŏ geh rơh nkoch bri đah công nhân n'hanh nuĭh kan tâm bôk nău kan "Tết njôm wăr- Năm mhe krêp dêh"  năm 2023. Bôk nău kan tă bah Tổng Liên đoàn Lao động Việt Nam, Tỉnh ủy Phú Yên n'hanh Ủy ban Trung ương Mặt trận Tổ quốc Việt Nam ƀư.

Tâm rnôk lam dak khuh n'gôr wơt năm mhe 2023 n'hanh Xuân Quý Mão bơi tât, Thủ tướng Phạm Minh Chính rhơn rnôk râng bôk nău kan "Tết njôm wăr- Năm mhe krêp dêh" năm 2023 đah công nhân, nuĭh kan ta n'gor Phú Yên - nkual neh ơm geh nău way ơm cách mạng. Thủ tướng lah rjăp, aơ lah nău kan ngăn ngăn, geh nkô̆ hôr khlay đah nuĭh kan nkhêp geh Tết tât, Năm mhe sĭt tă bah công đoàn ăp gưl ƀư.

Thủ tướng an gĭt, công nhân aƀaơ âk nklăp 14% rnoh nuĭh, 27% mpôl nuĭh kan tâm nău rêh, ăp năm njêng luh rlău 65% rnoh khlay ăp ndơ geh ƀư tâm nău rêh n'hanh rlău 70% rnoh khlay sŏk geh an ngân sách ngih dak, nău gĭt blău nti, nău way kan, ngăch dâk kan công nghiệp, nău tĭng jăp êng nău kan dơi rgâl uĕh n'hanh lăp rgum lam ntŭr neh. Rnoh công nhân geh nău gĭt blău nti têh âk, rƀah gĭt rgâl mhe Khoa học công nghệ hao âk. Lơn lah, Thủ tướng rhơn rngot dơi gĭt, rnôk nuh srê COVID-19 ntoh, lĕ rngôch yuh nô công nhân hŏ dŭt nsrôih, tâm pă đah ăp jêr jŏt bah doanh nghiệp, nsrôih ndrel lam dak njrăng, n'gang nuh srê. Rgâl jêng kơt ơm mhe, yuh nô công nhân hŏ lăp kan dĭl, pah kan mô gŭ rlu ndăng măng nar gay ăp ndơ geh ƀư “made in Viet Nam” geh tăch lam dak n'hanh lam ntŭr neh.

"Gâp nsing nơm an lah, mông nar răm mƀak dja mbra tĭng jâng yuh nô công nhân, nuĭh kan sĭt đah rnăk wâl, sĭt ăp mpeh ƀon tơm gay ndrel ƀư jêng du Tết bêng ăp nău tâm rŏng n'hanh rhơn răm. Hôm ăp nuĭh mô geh ndơ sĭt ƀon tơm mbra dơi geh wơt du Tết rhơn mƀak, ăp tŏng, gay lĕ rngôch geh Tết răm mƀak ma mô geh du hê ndul êng bah kơi”.

Thủ tướng lah rjăp, tết way ơm rnoi nuĭh geh nkô̆ hôr khlay mha êng tâm nău rêh nuih n'hâm, lah rnôk gay ăp nuĭh kon neh Việt rƀŏng sĭt tu tơm, yău ye, gay dơi rgum mâp, njôm wăr bah meng rnăk wâl, njêng nuih n'hâm rhơn nđơr, geh tay suan ntrôl uĕh gay lăp năm mhe đah âk nău nsĭng nơm, nău mpŏng, rƀŏng tât ăp ntil uĕh lăng lơn. Nău mât chăm Tết geh nkô̆ khlay rŏng nuĭh âk, mpơl nuih n'hâm tâm rnglăp, tâm têk ndrêng nsum bah rnoi nuĭh he.

Thủ tướng gĭt wât, tâm pă âk đah ăp jêr jŏt, ŏ r'ah bah công nhân n'hanh nuĭh kan tâm bah ri aơ. Let năp tay, Chính phủ mbra rđău đă ăp n'gâng kan, ăp n'gor uănh khlay, an tơm ndơ tâm di gay nkra ăp nkô̆ nău tơm gay rgâl geh nău rêh bah oh yuh công nhân, nuĭh kan. Tâm nê rgum an ƀư lĕ n'hâm suan Đề án rdâk njêng 1 rkeh jay gŭ thuk prăk; nkre, ndăn geh trong nkra na nê̆, ngăn ngăn ƀư jay gŭ an công nhân. Nău ŭch lah gay công nhân, nuĭh kan dơi geh dŏng ngăn nău geh hun hao bah neh dak; gay ăp rnôk Tết tât, Năm mhe sĭt lah ăp mông nar rgum nsum, njôm wăr rhơn răm bah oh yuh công nhân, nuĭh kan đah rnăk wâl dêh rŏng bah he.  

Aơ mbra lah tơm ƀư an nuih n'hâm dăng lơn gay lôch Tết, yuh nô plơ̆ pah kan tay đah nuih n'hâm nsan mhe, nsrôih ƀư lôch jêh ăp rnoh tât kan, nău dơn kan, rgop hun hao doanh nghiệp, hun hao neh dak yor nău ŭch ƀon lan geh ndrŏng, ƀon lan geh nău tâm ban, gĭt blău rsang rnglăy, gay ăp nuĭh ƀon lan geh nău rêh nar lơn ma uĕh lăng. Gâp dăn njuăl nău mbah rhơn năm mhe đah ăp nău tâm rŏng lĕ nuih n'hâm tât lam oh yuh công nhân, nuĭh kan lam dak. Mbah rhơn ăp rnăk wâl công nhân, nuĭh kan geh du năm Tết răm mƀak, njôm wăr, ăp bêng nău tâm rŏng n'hanh rhơn nđơr".

Ntơh măt kruanh rđău kan Đảng, Ngih dak, Thủ tướng njuăl nău ôp khâl n'hanh nău mbah rhơn năm mhe uĕh lăng, têh ndrŏng n'hanh mpư rnê, nchih nkah n'hanh mbah rhơn ăp nău dơi ma mpôl kan Công đoàn, công nhân nuĭh kan lam dak lah nsum, yuh nô công nhân n'gor Phú Yên lah êng hŏ dơi geh tâm ăp năm rlău aơ, rgop khlay tâm nău dơi nsum bah lam dak. Ta bôk nău kan Thủ tướng Chính phủ Phạm Minh Chính n'hanh kruanh Tổng Liên đoàn Lao động Việt Nam, n'gor Phú Yên n'hanh Ủy ban Trung ương Mặt trận Tổ Quốc Việt Nam hŏ pă an 220 nklâm ndơ Tết an đoàn viên, công nhân, nuĭh kan ngăch prăl n'hanh geh nău rêh jêr jŏt, đah lĕ rngôch rnoh khlay nklăp 288 rkeh prăk./.

VOV1/Nuĭh rblang: Điểu Thân