Ta Sóc Trăng, bah tơm prăk gưl neh dak hun hao wăng sa- rêh jêng kon nuĭh nkual rnoi mpôl đê̆, lvang năm 2021 - 2025 n’hanh trong rƀŏng tât năm 2030, n’gor hŏ ntrôl ngăch tĭng ƀư n’hanh ntuh kơl âk nău kan khlay. Buăt nthoi ntŭk ntô ndơ dŏng tĭng kơn ƀư lôch jêh ăp tŏng ndơ dŏng nkual rnoi mpôl đê̆ săk ntơr tay n’hanh nta trong dơh an ƀon lan hun hao wăng sa, n’hao nău geh, đăp mpăn nău rêh. Nău nchih bah phóng viên Thạch Hồng:

        Trong hăn tât thôn ƀon ta ấp Sóc Bưng, xã Thạnh Phú, nkuâl Mỹ Xuyên dơi tuh ma bê tông đah rnoh jong bơi 500m, hvi 3m, n’glăp dŏng bah kêng dŭt năm 2022 hŏ nta trong dơh an rhiăng ƀon lan rnoi Khmer rsong hăn soih uĕh. Wa Lý Văn Nâu, ta ấp Sóc Bưng rhơn nđơr nkoch:

Rnôk mô hŏ geh trong lơk dja ri nuĭh ƀon lan rsong hăn dŭt jêr jŏt, trong djơh, mbĭr bŏk, khan mô dơi hăn, nuĭh tăch rgâl ndơ mô dơi rsong hăn. Aƀaơ hŏ geh trong hăn hôm, nuĭh joi rvăt hăn tât mir dĭl, oh kon hăn nti dơh ntơ, nuĭh ƀon lan mpôl hên dŭt lah uĕh Đảng, Ngih dak hŏ ƀư an trong lơk dja.

        Mô dơn ntuh kơl ƀư ntung trong tâm thôn ƀon, năm e nơh, chợ xã Thạnh Phú dơi rdâk ƀư mhe đah lĕ rngôch rnoh prăk ƀư 1 rmen prăk gay rgâl an chợ ơm hŏ jŭr djơh, kơl kônh wa tăch rgâl ndơ dơh ngăch n’hanh khuh n’gôr lơn. Wa Phú Việt Bền, Groi Kruanh UBND xã Thạnh Phú nkoch gĭt, xã geh rlău 57% rnoh nuĭh lah ƀon lan rnoi Khmer, nơm dơi geh nău ntuh kơl ndơ dŏng ăp tŏng, nău rêh kônh wa geh âk rgâl săk ntơ mhe.

Uănh nsum kônh wa ta xã dơi dŏng bôk nău kan dja dŭt rhơn nđơr. Ri đah n’gâng kan ta ntŭk nkoch trêng rgŏ jă kônh wa nsrôih mât uĕh nău geh, nsrôih mât dŏng ndơ jŏ jong. Tâm let năp tay đah n’gâng kan ta ntŭk dŭt ŭch geh nău mât ŭanh ntuh kơl tay bah bôk nău kan, nhih dak he gay rhŏ dŏng an kônh wa tuch tăm, tăch rgâl tâm ban kơt n’hao nău rêh, nuih n’hâm an kônh wa dơi uĕh lơn đŏng.

        Kêng dŭt năm e nơh, rlău 200 rnăk ƀon lan xã Liêu Tú, nkuâl Trần Đề dŭt rhơn nđơr rnôk ntung Ta Ốc đah rnoh jong 20m, hvi 3,4m geh lĕ rngôch tơm prăk ntuh kơl rlău 1,3 rmen prăk n’glăp dŏng. Wa Tăng Rô Qui Sa, du hê nuĭh ƀon lan ta ntŭk nkoch, ntơm nơh, ntung ơm dơn hvi 1m dơm tă bah  nuĭh ƀon lan ƀư êng, yor huêt ir jêng kon se hăn nti tâm khay mih hŏ âk tơ̆ geh tât rmanh, kônh wa rdeng ndơ tuch tăm jêr jŏt. Ntơm bah rnôk ƀư lôch jêh Ta Ốc, ƀon lan geh âk trong dơh an hun hao wăng sa:  

Lôch rnôk ngih dak ƀư ntung hvi rlău 3m dja ri kônh wa ta aơ dŭt rhơn, nđơr yor dŭt dơh an kônh wa tâm ban kơt oh kon hăn tât nhih nti đŏng. Nklăp rlău 200 rnăk đŏng lan way hăn rlău ntung dja jêng kônh wa dŭt rhơn.

        Bôk nău kan gưl neh dak hun hao wăng sa- rêh jêng kon nuĭh nkual ƀon lan rnoi mpôl đê̆ lah trong nchrăp di bah Đảng, Ngih dak. Bôk nău kan rgum 118 trong kơl đah 10 trong nchrăp kan, 14 ntŭk kan jê̆, 36 nkô̆ ndop kơl, tâm nê geh âk trong kơl rgum ntuh kơl ndơ dŏng khlay an nău  kan tuch tăm n’hanh nău rêh ƀon lan nkual rnoi mpôl đê̆.

        Wa Trần Khắc Trung, Groi Kruanh Ban Dân tộc n’gor Sóc Trăng an gĭt, n’gor geh rlău 35% lah ƀon lan nkual rnoi mpôl đê̆, tâm nê, rlău 30% rnoi nuĭh Khmer. Bôk nău kan hŏ rgop tĭng kơn ƀư lôch jêh buăt nthoi ndơ dŏng nkual tâm ƀon lan, nta trong dơh an ƀon lan nkual rnoi mpôl đê̆ ta ntŭk hun hao, tuch tăm mât rong, rgâl geh wăng sa, n’hao nău rêh drăp ndơ nuih n’hâm an ƀon lan nkual rnoi mpôl đê̆ lah nsum n’hanh rnoi nuĭh Khmer lah êng.

        Ntơm bah năm 2021- 2023, lĕ rngôch tơm prăk ntuh kơl ntung trong ndơ dŏng dơi tâm pă an n’gor rlău 267 rmen prăk, tâm nê ngân sách Trung ương rlău 236 rmen prăk. Kơp tât aƀaơ, n’gor hŏ an ƀư ntuh kơl mhe 113 ntung trong hăn tâm ƀon lan, ndơ dŏng ta ntŭk chợ tăch ndơ, nkual rgum ƀon…, nkra têh uĕh tay rlău 50 ntŭk ntô ndơ dŏng nkual ƀon lan nkual rnoi mpôl đê̆ dŭt jêr jŏt mha êng. Wa Trần Khắc Trung, an gĭt tay:

Đăp mpăn dŏng geh nău tam tơm prăk ntuh kơl ntŭk ntô ndơ dŏng ri  n’gor mbra rgum ntuh kơl tay tĭng trong tor gĭt lor, trong nchrăp ntuh kơl  jong dah găp lvang năm 2021-2025 hŏ ndơ̆ luh, lơn lah nău ntĭk têh uĕh tay n’hanh n’hao nău tam nău ndop ăp tơm prăk dŏng bah bôk nău kan gưl neh dak hun hao wăng sa- rêh jêng kon nuĭh nkual rnoi mpôl đê̆ đah ăp bôk nău kan gưl neh dak mpeh rdâk njêng ƀon lan mhe, n’hŭch ach o jŏ jong, ăp trong nchrăp trong kơl geh tât an ƀư ta n’gor, lơn lah nău rgum geh nău tam tơm prăk bah lam rêh jêng kon nuĭh.

        N’gor Sóc Trăng n’gluh tât năm 2025, bôk năp ƀư lôch jêh buăt nthoi ntung trong ndơ dŏng kan an hun hao wăng sa- rêh jêng ƀon lan nkual rnoi mpôl đê̆ gay tŏng geh an hun hao wăng sa- rêh jêng kon nuĭh, n’hao geh nău rêh bah ƀon lan nkual rnoi mpôl đê̆ lah nsum n’hanh ƀon lan rnoi Khmer lah êng./.