Rơh rƀŭn nchră geh nău tât râng kan bâh rlău 270 đại biểu lah rnâng kan Hội đồng nhân dân 63 n’gor, nkuăl ƀon têh bâh lam dak. Kruanh Quốc hội Vương Đình Huệ leo rơh rƀŭn nchră.

Ntoh ngơi ta rơh rƀŭn nchră, kruanh Hội đồng nhân dân nkuăl ƀon têh Hà Nội Nguyễn Ngọc Tuấn, rnâng kan Hội đồng nhân dân nkuăl ƀon têh lĕ way mĭn uănh, geh gĭt ăp nău tă kan, nău kan an geh săk rnglăy bâh Quốc hội, Ủy ban rnâng kan Quốc hội, uănh kơt trong kan bâh du đê̆ n’gor, nkuăl ƀon têh gay ma geh nău rgâl mhe, rgâl mhe nău pah kan uănh nđôi ƀư tĭng trong leo kan, kloh rjăp, na nê̆, răng dăng, khoa học, săk rnglăy, ƀư tĭng ăp nău ntrŭnh bâh luật n’hanh nău ngăn bâh nkuăl ƀon têh gay ma doh rklaih ăp nău tât.

 “Hà Nội lĕ geh ntrŭnh mbơh mpeh ăp trong kan tơm tâm nău ƀư tĭng nglôch lôch uănh nđôi nău kan, aơ lah nău ngăn geh ngluh bmơh gay ma uănh n’hêl nău kan ndơ̆ an ntŭk kan têh kơt lah ôp nău, Ủy ban kiểm tra n’hanh ăp ntŭk kan uănh nđôi, rmal nău tât đah ăp nău ƀư tih hô. Nău ƀư tĭng ăp nău nglôch lôch nău kan uănh nđôi lah nău mpŏng kan gay ma ntŭk kan geh uănh n’hêl, uănh năl cán bộ n’hanh uănh năl nău tâm rlong, nkhôm rnê.

Mĭn rvê mpeh nău tâm mâp ƀon lan hôm nha geh âk nău mô tâm di, tâm ntrŭp, ƀư kơt ơm, Bí thư n’gor ủy Long An, kruanh HĐND Nguyễn Văn Được geh mbơh tơih nău ngăn ta rơh tâm mâp ƀon lan nĕ lah: ntơm nơh, nău leo ƀư ăp rơh tâm mâp bâh ăp đại biểu Quốc hội, đại biểu HĐND ăp n’gor, nkuăl, xã ƀư êng. Nău aơ geh ƀư mpŭng lir.

“Năm kan aơ, rnâng kan Hội đồng nhân dân n’gor Long An ntrŭnh mbơh ƀư ndrel ăp rơh tâm mâp ƀon lan. Kơt nĕ, mbra geh doh rklaih rnoh prăk kan n’hanh bah ir hoach roh mông nar. Nău aơ lĕ geh ƀon lan tâm n’gor tâm ban ŭch da dê”.

Groi kruanh HĐND nkuăl ƀon têh Đà Nẵng Nguyễn Thị Anh rĭ an gĭt, nkuăl ƀon têh Đà Nẵng lĕ geh ƀư rlong nău kan leo ƀư n’gâng kan nkuăl ƀon têh tĭng Nghị quyết bâh Quốc hội, tĭng nĕ, 8 quận n’hanh 45 phường mô hôm geh ƀư Hội đồng nhân dân. Yor nĕ, nău kan tâm mâp ƀon lan tâm nău rlong ƀư tĭng trong n’gâng kan nkuăl ƀon têh lĕ geh rgâl mhe n’hanh n’hao mhe.

 “Nău kan tâm mâp ƀon lan tâm nău rlong ƀư trong kan n’gângkan nkuăl ƀon têh lĕ geh rgâl mhe. Ntoh lư ngăn lah rnâng kan HĐND nkuăl ƀon têh ƀư geh săk rnglăy 3 bôk nău kan HĐND đah ƀon lan. Bâh nĕ, âk nău kan ntoh luh, ăp nău ntoh lư ta nkuăl ƀon têh ngăchgeh saơ ngăch doh rklaih, ndâk nkra ơm, an tâm di đah nău ŭch, nău rŏng tâm di bâh ƀon lan”.

Ntoh ngơi ta rơh rƀŭn nchră, kruanh Quốc hội Vương Đình Huệ lah na nê̆, năm 2022, Quốc hội, UBTVQH, ăp ntŭk kan bâh Quốc hội, HĐND ăp gâl nsrôih rgâl mhe, n’hao nău ueh, săk rnglăy pah kan lĕ mpeh nău kan lập pháp, uănh nđôi, ntrŭnh mbơh ăp nău khlăy bâh neh dak n’hanh bâh lĕ ăp ntŭk. Năm 2023, kruanh Quốc hội Vương Đình Huệ dăn đă HĐND ăp n’gor, nkuăl ƀon têh ƀư tĭng ueh jăp 6 nău kan tơm khlăy, tâm nĕ, mĭn uănh, rgâl nkra, ntop tay gay ma ƀư tĭng an tâm di ăp nău ntrŭnh mhe bâh Đảng, ngih dak, ngăn lah ăp Nghị quyết bâh n’gâng kan chính trị mpeh hun hao wăng sa- rêh jêng ăp nkual.

Rdâk njêng n’hanh leo ƀư bôk nău kan uănh nđôi năm 2023 tâm di, na nê̆ n’hanh săk rnglăy, ƀư ueh jăp nău kan uănh nđôi nău dơi kan ta ntŭk, njrăng rdâng sa nkhiăn, sa ƀer, mpŭng lir. Ngăn lah, năm 2023, Quốc hội n’hanh HĐND mbra geh ƀư sŏk phiếu knơm đah ăp nuĭh yor Quốc hội, HĐND săch mô lah an dŏng kan. N’gâng kan chính trị mhe ntrŭnh nău ntrŭnh mbrô 96 mpeh nău kan sŏk phiếu knơm đah ăp nău kan, nuĭh leo kan, mât uănh tâm trong kan chính trị.

 “Dăn đă HĐND leo ƀư ueh nău ntrŭnh mbrô 96, ăp ntil săm ƀŭt ntrŭnh bâh Quốc hội, UBTVQH đah nău gĭt vât mpeh sŏk nău knơm lah nău kan tơm khlăy bâh nău kan tơm, bâh nĕ, rdâk njêng nău nchrăp kan n’hanh ăp trong kan an tâm di, na nê̆ gay ma ƀư tĭng răng dăng, der ndra ƀư an geh dơm”.

HĐND an geh mât nău kan tơm khlăy tâm trong rgâl mhe nău mât uănh ta ntŭk tĭng trong ueh mhek săk rnglăy, săk tam, rgum mât uănh an hun hao, mât đăp mpăn ryơk đah Hiến pháp n’hanh pháp luật, n’hao nău ƀư kloh ueh, dơn kan mbơh rblang n’hanh tât râng kan bâh nuĭh ƀon lan, ntop rdâk njêng bâh nău kan hành chính kơl an ƀon lan, ƀon lan ƀư tơm, pháp quyền, way kan, ueh mhe, khoa học, kloh rjăp, mbơh tơih na nê̆, geh n’hjao tay nău mĭn kan kơl an ƀon lan n’hanh njêng ntŭk pah kan dơh nơih an doanh nghiệp pah kan jan sa tăch rgâl.