Ntơm bah năm aơ, Mpôl pah kan bah Trung ương yor wa Bùi Thị Minh Hòai, Bí thư Trung ương Đảng, Kruanh Bân Dân vận Trung ương ƀư kruanh mpôl kan lĕ tât khâl n’hanh an ndơ phung pah kan ta n’gor Dak Lak. Wa Bùi Thị Minh Hòai lah rjăp, Dak Lak lah n’gor nklang nkual Tây Nguyên, ăp doanh nghiệp ta n’gor dŭt âk lah doanh nghiệp têh n’hanh dah găp, nău rêh bah dŭt âk phung pah kan uănh nsum hôm e âk jêr jŏt. Yor nê, nău mĭn uănh an nuĭh pah kan lah nău kan dŭt n’hâm khlay bah ăp gưl, ăp nău kan. Wa Bùi Thị Minh Hoài đă, tâm năm tât, ăp gưl n’gâng kan ƀon lan bah Dak Lak an n’guh ăp trong ƀư na nê̆, săk rnglăy gay ƀư uĕh lơn tay trong kan mĭn uănh nău rêh an nuĭh pah kan, đăp mpăn nău rêh jêng, n’hŭch ach o nâp nâl. "Gâp đă ăp gưl ủy, n’gâng kan ƀon lan, liên đoàn lao động ndrel ăp gư ƀa ƀơ gĭt nu nău mpeh naư rêh, nău ŭch bah nuĭh pah kan an geh trong mkra ntop kơl ngăch gay đăp mpăn an phung nuĭh pah kan dơi geh ăp nău kơl rêh jêng bah Đảng n’hanh ngih dak. Lơn lah uănh tât mĭn an drăp ndơ nuih n’hâm an nuĭh pah kan hăn ndrel đah rmôt kan công đoàn Việt Nam".

 Pah kan mât kơl an đoàn viên công đoàn, ngăn lah ăp đoàn viên geh nău rêh jêr jŏt, nuĭh ji geh nău rêh ach o, nuĭh geh nău sôt rmanh rnôk pah kan, tâm ba năp nơh, Liên đoàn lao động ăp gâl kan ta n’gor Dak Lăk lĕ geh âk nău pah kan tâm ôp khâl, rgŏ jă, pă ndơ, ngăn lah, bôk nău kan ngih jay gŭ an công đoàn lĕ geh mbơh ƀư tâm ban, dơn geh nău tâm ban, nău kơl an bâh ăp gâl ủy, n’gâng kan, ntŭk kan, mpôl kan ta ntŭk, ăp ntŭk kan, doanh nghiệp n’hanh nău tâm knơm kơl kan bâh âk cán bộ, đoàn viên, nuĭh pah kan. Tĭng nĕ, tâm 5 ba năp, lam n’gor lĕ rgŏ jă geh rlău 23 rmen prăk an đoàn viên geh nău rêh jêr jŏt mpeh ngih jay gŭ, rdâk njêng, nkra mhe jay gŭ,  nkra mhe bơi tât 600 ngih jay gŭ ngih răm công đoàn, an nuĭh kan geh nău rêh jêr jŏt. ăp mblâm ngih jay, geh pă an mô dơn kơl mpeh nău rŏng, nău tâm kơl bâh ntŭk kan Công đoàn đah đoàn viên, nuĭh kan geh nău rêh jêr jŏt mô geh ngih jay gŭ, nta nău dơh nơih knơm n’hanh nău tâm rgop dăch bên bâh đoàn viên, nuĭh kan đah ntŭk kan Công đoàn ma hôm nha ntop ƀư nău kơl kan rnă njrăng ntŭk rêh jêng bâh n’gor.

Lah ngoăy tâm âk nuĭh kan geh kơl ƀư ngih jay gŭ tâm năm 2023, yuh H’Phúc niê, nuĭh kan ta Nông trường 19/8, công ty cổ phần cao su Dak Lak, lĕ geh ƀư tĭng nău ŭch rŏng rdâk ƀư ngih ueh răm an rnăk vâl. Tĭng nĕ, ta dŭt năm 2023, yuh geh kơl an 40 rkeh prăk bâh công đoàn ntŭk kan ba dâng Công ty gay ma rdâk ƀư ngih Mái ấm công đoàn. Rnăk vâl yuh lĕ rgum, manh tay gay ma ƀư ngih jay geh rnoh neh 45 mét vuông ta nkual neh mê̆ bơ̆ an, đah lĕ rnoh prăk bơi tât 100 rkeh prăk. Tâm ngih mhe ƀư bol ma jê̆ yơn geh tŏng ăp, yuh H’Phúc dŭt rhơn ngơi. “Gâp dŭt rhơn yor dơn geh nău kơl mât uănh bâh công đoàn ntŭk kan ba dâng bâh công ty, lĕ kơl an rnăk vâl ƀư ngih jay aơ, kơl an ur sai gâp đăp mpăn lơn mpeh ntŭk gŭ. Bâh aƀaơ ur sai hên nsrôih pah kan, ntop kan âk lơn tay an công ty”.

 Wa Vũ Thu Hà, , Groi Kruanh UBND Nkual ƀon têh Hà Nội lah rjăp: Nkual ƀon têh Hà Nội mĭn trong kan đăp mpăn pah kan lah nău kan ƀa ƀơ. Ăp nău ƀư rƀŏng tĭng khay ƀư đăp mpăn pah kan lĕ dơi mbơh ƀư lĕ rngôch bah nkual ƀon têh tât gưl bah dâng, rgop khlay an hun hao wăng sa n’hanh đăp mpăn nău rêh jêng bah thủ đô. An lah, bah meng ăp săk rnglăy dơi geh ta nkual ƀon têh hôm e du đêt ntŭk kan doanh nghiệp ndơ ndâk ƀư mô hŏ uănh tât âk trong kan đăp mpăn nkual ƀon têh hôm e geh 296 nău rmanh pah kan ƀư 300 nuĭh pah kan geh rmanh. Yor nê, Wa Vũ Thị Hà đă ăp n’gâng kan, ban, nău kan nkual ƀon têh, N’gâng kan ƀon lan, công đoàn ăp gưl, lơn lah ăp doanh nghiệp, ntuk nkra njêng tăch rgâl, phung pah kan, nuĭh kan an rgum ƀư ăp nău kan way kan mpeh đăp mpăn pah kan n’hanh nău ƀư nsum mpôl geh râng bah doanh nghiệp, nuĭh pah kan, ƀư ăp nău kan mbơh ntĭm ntop kơl doanh nghiệp, rgâl nău pah kan an nuĭh kan: " Ƀư tĭng trong kan uănh nđôi, groi uănh trong kan đăp mpăn pah kan, mpeh răk pah kan, njrăng n’gang rtoh ŭnh sa ta ntŭk kan, doanh nghiệp, ƀư n’gul gâl, n’glôch jêh, uănh lah, rhoăt nău blău ơm tâm trong kan ntĭm rđău khay đăp mpăn pah kan, mbơh UBND nkual ƀon têh tĭng nău ntrŭnh, dăn đă ăp ntŭk kan, doanh nghiệp, ăp ntŭk nkra njêng, tăch rgâl tâm ăp ntil wăng sa gŭ ta nkual ƀon têh nchrăp ndâk ƀư, an trong nchrăp n’hao trong kan tâm rgop ndrel, rgâl nău dơi pah kan, mât uănh săk soan, n’hao nău rêh drăp ndơ, nuih n’hâm an phung nuĭh pah kan".

 Nô Trần Trung Hiếu, ƀon tơm ta Quảng Bình, lah nuĭh mât nuĭh kan n’hanh máy mok an công ty TNHH Tập Đoàn Sơn Hải, dôl ƀư rnoh kơl ntrŭp nău kan mbrô 3, nău nchrăp kan ƀư trong têh Khánh Hòa- Buôn Ma Thuột . Nô nkoch, ta rnoh kan aơ Tập đoàn Sơn hải pă an bơi tât 50 ndơ máy mok ndeh klư geh: ndeh rli neh ăp ntuil, may muk neh, may rli, ndeh ben, máy kuĭh lôk neh ma dak...n’hanh klâp ma 150 nuĭh kan, pă jêng âk mông kan tâm pleh pah kan lĕ măng nar. Ăp nuiĭh ƀĭt ndeh mô lah kỹ sư mât nău kan geh tập đoàn trok nkhôm prăk khay 25-30 rkeh prăk/khay; hôm nuĭh kan kơt lah thợ xây, hàn,. loih, khoan, n’gon mpai bâh 12 tât 17 rkeh prăk/khay. Rlău ma prăk khay, nuĭh kan hôm nha geh dơn prăk nkhôm mông nar ntop tay ta ăp nar rlu, nar lễ.

Di rơh nar lễ 30/4, nuĭh leo kan tập đoàn lĕ an rnoh nkhôm an ăp nuĭh kan lah 500 rbăn prăk, n’hanh lah pah kan nar rlu mbra geh dơn rnoh nkhôm lah 300% đah nar êng lah ƀư ta nar lah n’hanh 330% lah ƀư pah kan măng. Ăo lah rnoh geh kơp tĭng rnoh Luật pah kan aƀaơ ntrŭnh. Nô Trần Trung Hiếu an gĭt. “Nău rêh bâh nuĭh kan oh nô hên rĭ geh công ty kơl an da dê geh mât đăp mpăn mpeh ndơ sông dak ngêt kloh ueh, tŏng kah, rlu rlău rĭ geh ntŭk bĭch êng n’hanh geh ntrŭp điều hòa. Nău rêh mât đăp mpăn, oh nô hên pah kan dŭt gơih nđơr, gơih kan, mât đăp mpăn tâm di ueh rdâk njêng nău pah kan jan sa”.

 Rơh rlu lễ 30/4 n’hanh 1/5 năm aơ jŏ 5 nar nsĭt tay nău răm an âk nuĭh pah kan yơn ƀư mô đêt doanh nghiệp, lơn lah doanh nghiệp nkra njêng mâp jêr jŏt. Âk ntŭk kan ngăch an nuĭh pah kan ntop nar kan, trok mông pah kan jêh rlu lễ, geh ntŭk phung pah kan ŭch êng pah kan tâm ăp nar rlu lê gay đăp mpăn ngăch jao ndơ. Hôm ta Bình Dương, ntŭk geh âk nuĭh kan, wa Phan Lê Diễm Trang, Groi Kruanh Hiệp hội Dệt may Bình Dương mbơh: 60 doanh nghiệp nuĭh kan ndrel đah âk rbăn phung pah kan dôl mâp jêr jŏt tâm nău dăp rgum nkra njêng yor nar rlu ndal. Wa Trang an git, nkôp đah năm 2023, năm aơ, sam ƀŭt nchăm ndơ plơ̆ tay âk jêng doanh nghiệp lĕ ƀư trong nchrăp nkra njêng lĕ năm. Nău rlu lễ mô dơi mbơh ơm jêng khân pơng mâp jêr jŏt tâm dăp rgum phung pah kan. Lơn lah, năm aơ, ký ton đah nuĭh kan đêt khay, jêng an jao ndơ di nar jêng rnôk dơi dơn nău mbơh rlu lễ, doanh nghiệp an tâm nchră đah nuĭh kan ndrel rgâl nar jao ndơ. Âk nuĭh mô ŭch jêng đă an kan ntop tay, mô lah rgâl nar rlu êng an phung pah kan khân pơng đăp mpăn, răm m’ak pah kan. Wa Trang dăn đă: " Nău an nuĭh pah kan rlu jŏ lah dŭt uĕh, yơn geh nău dăp lor. Ntĭt nsa năm aơ ngih dak nchrăp an rlu jŏ ri jêng geh trong nchrăp lor bah năp 6 khay. Mô dơi knŭng mbơh du nar jêh nĕ lah an ntrŭt pâl nđaih n’hanha n nuĭh pah kan dơi rlu. Kơt nĕ, ăp nuĭh ƀư ngih măy nkra njêng kơt mpôl hên mô dơi ngăch ty. Tâm đêt nar, mpôl hên lĕ dăp hôm, ma lŏ geh rơh rlu kơt nĕ ri dŭt jêr jŏt an ăp ntŭk kan nkra njêng, mô knŭng tâm nău kan ka choh kho ao ma ăp nău kan nkra njêng êng dŏng âk nuĭh pah kan".