Rgâl mhe nau kan mêt uănh nar lơn ma ngăn, săk tam, tŏng dơi nau ŭch bah  cử tri, ƀon lan lah ngoai tâm 10 nau kan ntoh lư bah Quốc hội năm 2022. Đah âk nkô̆ nau mhe tâm nau ntrŭnh, uănh bah Quốc hội hŏ geh nau rgâl ueh tâm nau mêt uănh, kơt nau đă bah Kruanh Quốc hội Vương Đình Huệ lah rjăp “Mêt uănh tâm nuih n’hâm ndâk; đah “ndâk” ndrel “rdâng” ri ndâk lah nau tơm.

Năm 2022, đah nau ŭch ngăn, Quốc hội săch nau ôp ăp Kruanh n’gâng kan, ntŭk kan kơt: Tuch tăm ndrel hun hao ƀon lan, tơm prăk, ngân hàng, gung trong nchuăn rdeng, nội vụ, ntŭk nkoch mbơh nau ndrel thanh tra. Ăp nau jêr, nkol, mô nâp ndrel ê dơi tâm nau mât Ngih dak mro geh uănh kloh, mbơh âk ntil, âk ding tâm nau ôp ta ăp rơh rƀŭn Quốc hội. Nau pah nsum bah ăp ntoh măt Quốc hội ndrel nau ơh nau ôp bah ăp Kruanh n’gâng kan, ntŭk kan, nchră hăn tât lôch mpeh nau kan ƀư. Wa Trần Văn Lâm, rmôt kan ntoh măt Quốc hội n’gor Bắc Giang, ân lah:

‘Nau ôp rnôk aơ nar lơn ma geh tâm di ma nau kan lơn. Nau ơh bah Kruanh n’gâng kan ndrel bah Chính phủ mô geh nau der, mô geh teng trong ôh”.

 Nau dơi bah ăp rơh rƀŭn ôp nau mô di lah ăp nau ôp,  joi nau kan, tâm ăp nau ôp mô knŭng tâm kan, nau ơh tă geh gĭt, geh dơi, sŏng, ŭch rgâl mhe, mô lah mô geh nau der rnôk ndơn nau tih bah ăp Kruanh n’gâng kan, ntŭk kan. nau dơi lơn lah nŭih ôp ndrel ơh nau kŏ geh nsum bu nuih n’hâm ndâk gay ma joi ăp nau kan mât ngih dak hŏ, dôl ndrel mra ƀư.

 Lah kơt ăp rơh rƀŭn ôp ndrel ơh nau ôp, ăp ntoh măt Quốc hội ndrel Kruanh n’gâng kan bah Chính phủ hŏ ntoh nuih n’hâm sŏng, tâm di mpeh ăp nau hôm kol gay ma leo luh ntrong rklaih năn, nau săch ăp nkô̆ uănh, kơl joi jru lơn nau hom nkol, ê dơi, ê nâp tâm ăp nau kan mât Ngih dak. Rơh mêt uănh bah Quốc hội mpeh nau kan ƀư mpŭng lir tâm 2 ngih dak si bạch Mai ndrel Việt Đức ntŭk kan tal 2 lah du ntoh mhô ngăn. Jêh rnôk mêt uănh bah Quốc hội, Thủ tướng Chính phủ hŏ hăn mêt uănh 2 bôk nau kan aơ ndrel đă ndâk du rmôt kan nchră uănh dĭng lĕ nau ƀư nau kan ndrel nau đă n’hêl. Wa Nguyễn Anh Trí, ntoh măt Quốc hội nkuăl ƀon têh Hà Nội ndơn saơ aơ lah ntrong kan mhe tâm nau kan mêt uănh bah Quốc hội, “nkre ndâk nkre rdâng” đah nau kan uănh năl ntŭk gŭ ndrel nau  dơi bah ăp nau nkol nê:

‘Rmôt kan ntoh măt mêt uănh bah Quốc hội rƀŭn ndrel geh nau rgop. Jêh nê lah Thủ tướng Chính phủ leo bôk rmôt kan hăn tât nau kan gay ma rklaih. Nau nê ân saơ nau săk tam bah nau kan mêt uănh bah Quốc hội”.

Tâm năm 2022, 4 nkô̆ nau hŏ geh ƀư uănh, nê lah: nau rgum kan, ƀư nau têm nkrem, rdâng mpŭng lir, vơt ƀon lan, rklaih nau phong ndrel dăp rgum ntŭk kan hành chính gưl nkuăl, xã. Nuih n’hâm 5T: Tâm dăch nau ngăn, ŭch ma nau kan, sŏng dăng ndrel ƀư nau kan rjăp geh ntoh tâm ăp nau kan nkô̆ mêt uănh.

Rơh bôk năp, ăp rmôt kan mêt uănh jă râng bah ăp nŭih blau ndrel rđau kan du đê̆ ntŭk kan geh tât. Lah bah năp nơh, rmôt ntoh măt Quốc hội knŭng mêt uănh tâm nkuăl ma Rmôt kan mêt uănh bah Quốc hội ndrel Uỷ ban Rnâng kan Quốc hội mô ƀư mêt uănh ngăn ri rnôk aơ,ăp rmôt ntoh măt Quốc hhọi ƀư nau kan mêt uănh đah ăp nkô̆.

Ăp nau ê dơi geh ndơn gay ma rklaih, ăp nau ntrŭnh geh ƀư tâm ban, ndrel ăp nau ƀư tih geh nchŏng lih gay jao nau kan, nau rklaih...Ngăn lah kơt nau mêt uănh nau kơl, pháp luật mpeh nau vơt ƀon lan ndrel rklaih nau phong dôih, tĭng Groi Kruanh Rnâng kan Ban dân nguyện Lưu Bình Nhưỡng, bôk nau kan aơ ndơn geh nau kơl âk bah ƀon lan. Yor lah, mêt uănh mô êng lah hăn joi ntŭk tă geh tih ma lah gay ƀư nâp lơn, ueh lơn, lah geh saơ nau tih ri đă n’gâng kan rklaih tĭng nau ntrŭnh:

‘Nchră tât nau nâp lah nchră bah nau rgop bah cử tri ân ƀon lan. Kơt nê nsing tâm nau tă dơi geh gay ma nơm nchră uănh tay, nchră dơi nau nâp, nau kan bah cán bộ, ngăn lah ăp nŭih dâk bôk tâm nau kan vơt ƀon lan”.

Nau veh săk tam nau kan bah Quốc hội lah nau ŭch ndrel nau rnơm bah cử tri. Ndrel cử tri-ăp nŭih mro uănh rjăp nau kan bah Quốc hội, nchră nau kan mêt uănh bah Quốc hội hŏ rgâl mhe ngăn n;ăp ma nau mĭn ndrel nau kan. Aơ lah nau đă bah cử tri rnôk ndơn:

‘Quốc hội lŏ geh ăp nau rgâl mhe tĭng trong mêt uănh ƀon lan, dăch đah nau ngăn bah nau rêh. Ndri ma nau mêt uănh bah Quốc hội mô lah nau ôp bah Quốc hội lŏ ƀư bah Quốc hội gưl kan bah năp, yơn ƀư rnôk aơ ân nâp, rjăp ngăn lơn”.

Ăp nau rgâl mhe bah nau mêt uănh tâm di kơt Kruanh Quốc hội Vương Đình Huệ lah rjăp, mêt uănh ân nsing tâm nuih n’hâm ndâk, ân ƀư dơi ăp nau kan ueh, ntrong kan blau, mêt uănh yor nkô̆ nau njêng ân hun hao:

‘Mêt uănh ân geh nsing tâm nuih n’hâm ndâk njêng, đah ndâk ndrel rdâng ri ndâk lah nau tơm, jŏ jong, rdâng lah nau nsôih, rjăp ndrel ndal. Ndâk njêng pháp luật gay ma njêng nau hun hao. Nau kan mêt uănh kŏ yor nkô̆ nau hun hao. Quốc hội mro rgâl mhe săk nơm. Ndri ma, ăp ntŭk kan bah Quốc hội ân geh ƀư ueh nau kan mêt uănh, ăp ntoh măt Quốc hội ân geh ƀư êng nơm nau kan mêt uănh nau kan bah săk nơm tâm nau ƀư nau kan, nau dơi bah năp cử tri gay ngăn ngên pơk luh du rơh mhe geh âk nau dơi ueh tâm nau kan bah Quốc hội kơt nau rđau ndrel rơh rƀŭn bah đồng chí Tổng Bí thư Nguyễn Phú Trọng lah rjăp ta rơh rƀŭn tal bôk năp, Quốc hội gưl XV”.

Lah rjăp nau bah Kruanh Quốc hội Vương Đình Huệ tâm nau mêt uănh nau kan bah Quốc hội, mô knŭng nkah ăp nŭih ntoh măt Quốc hội, ăp ntŭk kan bah Quốc hội nau gĭt rjăp lơn tâm nau kan bah nơm. Mêt uănh gay ma “ndâk” ăp nau ueh, yor nkô̆ nau mhe, hun hao ân geh nau gơih, nau rjăp janh ndrel nsôih tĭng ƀư ân rjăp yor nau geh nsum bah cử tri ndrel ƀon lan, nau geh jêng nsum bah neh dak./.