Geh tâm rnôk ăp nar bôk năm mhe 2024, Tết năm mhe êp tât, rơh rƀŭn ndal tal 5 bah Quốc hội hŏ ân saơ kloh nau ŭch, nsum nsôih bah Quốc hội tâm nau hăn ndrel ma Chính phủ, rklaih nkre ăp nau nkol, nau ê dơi gay ma kơl an Luật ƀư ueh nau săk tam tâm nau kan ngăn, leo dŏng ăp tu tơm gay ndâk ân nau hun hao tâm năm 2024 kŏ kơt lah ăp năm ba kơi. Tâm rơh rƀŭn, ăp ntoh măt hŏ ntoh nau mĭn ndrel nau kan prêh, rgop nau ngăn gay ma năn doh rklaih ăp nau ntrŭnh khlay gay rklaih nau nkol mpeh ntrong kan. Wa Bùi Hoài Sơn, rmôt kan ntoh măt Quốc hội nkuăl ƀon têh Hà Nội, mbơh:

            ‘Phung he hŏ ƀư 5 rơh rƀŭn ndal. Jêh rnôk ăp nau ntrŭnh geh ntrŭnh ri he ân geh uănh rjăp ngăn gay ân nuih n’hâm bah Quốc hội-Nuih n’hâm rjăp, mro ƀư nau nchrăp lor tă bah ơm tă bah ngai ân geh tŏng dơi, njoăl tay ăp nau jêr ngăch bah nau rêh jêng ri kŏ dơi njoăl nkre tâm nau kan bah Chính phủ. Lah nơm ƀư dơi nau nê ri mra nsôih, nsôih bah Quốc hội geh rêng lam tâm nau rêh jêng”.

            Bar Luật ndrel nau ntrŭnh geh Quốc hội ân ƀư nchră luh tâm rơh rƀŭn ndal tal 5. Tâm nê, ngăn ngên geh njrăng uănh, Quốc hội hŏ nchră Luật neh ntu (rgâl nkra) ndrel Luật ăp ntŭk kan tơm prăk (rgâl nkra), đah âk ntoh măt Quốc hội ân ƀư.

            Luật neh ntu (rgâl nkra) geh nchră gay ơm đăp mpăn ntrong kan ntrŭnh rnoh neh tĭng ntŭk tăch; đăp mpăn nau dơi geh neh du trong tâm ban, tŏng ăp, kŏ kơt lah ăp nau dơi bah drăp ndơ mpeh neh ntu bah nŭih ƀon lan, ntŭk kan geh mât. Bah nê, ƀư ueh nau dơi khlay tâm nau rêh kŏ kơt lah hun hao nau rêh jêng, hun hao văng sa bah nŭih ƀon lan ndrel ntŭk kan du trong ueh ngăn. Nau đă luh lah Chính phủ ân geh ndal ƀư jêh nau ntrŭnh kan mpeh ăp nau ntrŭnh đă ntĭm nti n’hêl tĭng nau đă bah Luật gay đăp mpăn dơi geh rklaih ăp nau kol tâm nau kan neh ntu. Jêh rnôk Luật neh ntu (rgâl nkra) geh nchră, Kruanh n’gâng kan Tài Nguyên ndrel Môi trường Lê Minh ngân mbơh:

            ‘Rgâl tâm nau kan ƀư nkre nau kan ân jêh ăp nau ntrŭnh ntĭm mbơh ƀư tĭng Luật neh ntu ndrel ăp nau ntrŭnh geh tât quy phạm pháp luật ma geh dơi tâm nau dơi bah N’gâng kan phung hên mra ndal, rgum ƀư ăp rmôt ndrel lŏ ƀư ueh nuih n’hâm kan bah Luật neh ntu gay ma kơl tâm nchră mbơh ân Chính phủ, ntrŭnh năn ăp nau ntrŭnh ntĭm mbơh Luật neh ntu gay rnôk Luật geh nau tam ri đăp mpăn nau tâm ban đah ăp luật ndrel ăp nau ntrŭnh ntĭm ƀư, gay ngăn ngên lah leo Luật neh ntu lăp ngăn tâm nau rêh”.

            Đah Luật Ăp ntŭk kan tơm prăk (rgâl nkra) geh nchră mra doh rklaih dơi ăp nau jêr, nkol tâm nau rklaih nau kol rnoh rnon, ăp rnon geh tât trái phiếu, der nau ndăn nau geh dŏng rkăng, n’hao nau kloh, der nau lơh khuch tât trong ngân hàng, kơl an ntŭk kan tơm prăk geh pah kan kloh, săk tam, nâp nâl. Wa Hoàng văn Cường, Uỷ viên Uỷ ban tơm prăk, Ngân sách bah Quốc hội ŭch:

            ‘Luật ăp ntŭk kan tơm prăk (rgâl nkra) lah du Luật dŭt n’hâm jru mpeh nau kan. Nau ŭch bah nơm mpeh nau ntrơn rgâl bah ntrong kan ngân hàng bah ntrong kan tơm prăk lah dŭt têh, ngăn lah nau kan geh tât ntŭk kan ân manh prăk bah công nghệ tâm nau mât njrăng ngân hàng, kơt: mât nkân rnoh rnon, nkân rnoh geh dơi dŏng rkăng, khlay ngăn ân geh mât uănh dơi rnoh prăk”.

            Tâm rơh rƀŭn ndal tal 5, Quốc hội mra ân ƀư 8 nau kan dơi geh ƀư tâm bôk au kan bah neh dak. Aơ kŏ lah ăp nau kan ngăn gay ma năn doh rklaih ăp nau jêr, nau nkol gay ntrŭt dăng ngăch nau kan, đăp mpăn ƀư săk tam 3 bôk nau kan bah neh dak. Nau aơ geh nau khlay mpeh ndâk njêng ƀon lan mhe, n’huch ach o nâp nâl, hun hao văng sa, rêh jêng nkuăl rnoi mpôl đê̆ ndrel gôl yôk. Wa Nguyễn Quốc Luận, rmôt kan n’gor Yên Bái, ân lah:

            ‘Pă tơm prăk ân gưl nkuăl. Ƀư kơt nê mra kơl an ăp nkuăl, ngăn lah trong nkuăl doh rklaih dơi geh âk nau jêr, nau nkol, ngăn lah tâm nau pă tơm prăk, pơk nau nchrăp ân ăp nkuăl tâm nau ƀư bôk nau kan”.

            Geh tâm rnôk gleh nar, đah rnoh nau kan âk ndrel ngăn lah dôl geh khlay ndal, rơh rƀŭn ndal tal 5 hŏ ân saơ kloh nau kan, nau nchrăp rjăp bah Quốc hội gay njêng nau nsôih mhe ân nau hun hao văng sa, ntrŭt dăng nau hun hao ngăch, nâp nâl. Nuih n’hâm rgâl mhe, ngăn ngên yor ƀon lan bah nê nar lơn lah rjăp nau khlay, nau săk tam lơn./.