Bí thư Trung ương Đảng, Kruanh Uỷ ban Rnâng kan bah Trung ương MTTQ Việt Nam Đỗ Văn Chiến mbơh: Cử tri ndrel ƀon lan ntoh nau rnơm tâm nau tă geh khlay bah nau kan ndâk njêng Đảng lah nau kan njrăng, rdâng nau sa khâm, nau khuch geh rđau ƀư rjăp, ngơi hăn nsum ma nau kan, mô geh nau êng. Ăp nau đă bah cử tri ŭch geh ăp nau kan ân tâm di, nkre đăp mpăn nau dơi gay hun hao neh dak, đă djăt ăp nau đă bah ƀon lan đah nau nchrăp Luật neh ntu (rgâl nkra), nau nchrăp Luật tăch rgâl neh ntu (rgâl nkra), nau nchrăp Luật Ngih gŭ (rgâl nkra)...ma nau ngăn lah nau kơl an bah ăp bôk nau kan hun hao văng sa, rêh jêng:

 “Đah bôk nau kan hun hao văng sa, rêh jêng nkual rnoi mpôl đê̆ ndrel gôl yôk. Ăp bôk nau kan kơl an ngăn ân nŭih ƀon lan mpeh neh gŭ, neh tuch tăm, dak dŏng ngăn lah ân geh sŏk dŏng bah tơm prăk ƀư nau kan gay ma pă tâm nau ntuh kơl nsum. Kơt nê, ân geh ƀư tĭng nau ntuh kơl nsum ri mô dơi geh leo dŏng prăk. Tal bar lah rnôk aơ nkuăl jêr ngăn tâm nau kan rgop tơm prăk. Nau tâm rgop nsum tơm prăki ntuh kơl lah kơt nê, yơn mô geh nau rƀŏng ntĭm ƀư tâm rgop nsum nau ntuh kơl du trong sak tam ơm ri dĭng nkual hôm vĭ vĕ”.

 Ntơm bah nau ngăn bah ăp nkuăl bah ăp rmôt, cử tri đă Đảng ndrel Ngih dak rđau ăp ntŭk kan mĭn, ntrŭnh nau quy phạm pháp luật gay ma njrăng, rdâng nau kan du đê̆ nŭih cán bộ, công chức, viên chức, nŭih geh nau dơi tâm nsŭn nau kan, ƀư nkol, khuch tât nau kan tuch tăm, tăch rgâl bah rmôt kan ndrel nau rêh bah ƀon lan. Nau rgop mpeh nkô̆ nau aơ, Kruanh Uỷ ban văng sa bah Quốc hội Vũ Hồng Thanh nchŏng kloh:

‘Tâm nau mbơh bah mặt trận ri kŏ geh nau mĭn nklach nau kan, ntrŭt ntrôl nau kan bah nơm. Rnôk du nau kan bah năp nơh ri geh âk đŏng nŭih dơi mpeh nau tâm ban nau rklaih. Yơn rnôk aơ, knŭng ŭch geh du ntŭk kan mô tâm di plŏ tay dăn nau đă ndrel nau kan ƀư ri geh âk ngăn mông nar ƀư rnoh sŏk dŏng hao prêh”.

Groi Kruanh Rnâng kan Quốc hội Trần Thanh Mẫn nkah: nau mbơh ntoh nau ngơi bah cử tri ndrel ƀon lan, đă ntop tay ăp nkô̆ nau ƀư n’huch nau hun hao, mbrơi ân ƀư nau rgum, rgâl mhe hành chính, rgâl ntŭk ƀư nau kan ntuh kơl tăch rgâl gay ƀư jêh nau mbơh nâp ueh:

‘Bah nau tâm mâp ma cử tri gâp saơ ân nau kan hôm tih bah đăng kiểm ntrong kan bah lam dak ri tâm nau mbơh mhe ri leo lăp. Tal bar lah nau kan tăch rgâl, nchuăn rdeng ma tuý rnôk aơ mô hôm trong jâng ma hăn trong mpar dŭt n’hâm jêr saơ. Công an nkuăl ƀon têh Hồ Chí Minh hŏ leo mhal nau tih ndrel leo mhal âk nŭih geh nau tih ngăn”.

Uănh nau mbơh bah nau kan ƀon lan đă bah Quốc hội tâm khay 4/2023, Uỷ ban Rnâng kan Quốc hội kŏ mbơh kloh nau mêt uănh ân saơ, tâm 18 năm ntơm năm 2003 tât năm 2021, ntŭk kan bảo hiểm xã hội bah nkuăl hŏ sŏk tih prăk nchâp đă, hŏ geh rlau 4000 nŭih tơm ƀư nau kan tăch rgâl geh bu sŏk tih. Kruanh Ban Dân nguyện Dương Thanh Bình, mbơh:

‘Yor nau ƀư nau rgop bảo hiểm xã hội mô geh nchâp đă tâm di nau ntrŭnh bah pháp luật ri ma ăp nŭih tơm bah rnăk ƀư nau kan tăch rgâl, êng nŭih ê geh kơp tĭng năm rgop bảo hiểm xã hội nchâp đă gay geh kơl an nau kan bah nau rêh, bảo hiểm xã hội, ngăn lah geh âk nŭih rgop bảo hiểm xã hội geh bơi tât 20 năm nau aơ ƀư ân ƀon lan ji nuih. Du đê̆ nŭih hŏ ƀư săm ƀŭt phong, mô lah leo phong tĭng nau đă mĭn, kơp, nchră tât nau rklaih ân kloh nau đă bah ƀon lan”.

Kruanh Quốc hội Vương Đình Huệ kŏ nkah tât nau ueh, nau nkol mpeh nau kan prăk kaih, neh ntu geh ăp cử tri ntoh mbơh tâm ăp rnôk tâm mâp, đă Chính phủ ơm nchră uănh nau kan tâm năm 2023, mbơh kloh nkô̆ nau gay ma geh nau kan ân năn. Tâm nê, rđau ƀư nau kan tơm prăk geh nau dơi, geh nau tơm, rgum tâm nau rgâl mhe hành chính, rgâl mhe ntŭk ntu ntuh kơl tăch rgâl, ƀư rjăp nau nâp trong kan hành chính, công vụ. Nkre lah uănh, nchrăp nau kan rdâng, njrăng, rdâng, nkân ân săk tam nau kan đah srê Covid-19./.