Uỷ ban Rnâng kan Quốc hội hŏ djăt, rgâl nau nchrăp Luật njrăng rdâng ŭnh sa, mpuh n’hât ŭnh sa ndrel kơl an. Rđil đah nau nchrăp Luật mbơh ta rơh rƀŭn tal 7, nau nchrăp Luật rơh aơ ntrŭnh du nau êng mpeh nau njrăng ŭnh sa ngih gŭ; du nau êng mpeh nau njrăng rdâng đah ngih gŭ tâm rgop nsum ma nau kan tăch rgâl; ntop tay nau ntrŭnh đah 2 nau kan ngih gŭ aơ đăp mpăn nau đă tong nau dơi đăp mpăn njrăng, rdâng ŭnh sa, rklaih khuch. Yơn lah, tĭng Groi Kruanh Uỷ ban Pháp luật Nguyễn Trường Giang, ăp nau ntrŭnh aơ nsum nsum, jêr geh nau dơi đah ntŭk kan pháp luật ndrel nŭih ƀon lan:

‘Phung he ntrŭnh lah geh ndơ mbơh ŭnh sa, ntrong kan gay ma luh sial, ndơ luh hui bah n’huk, ndơ khih tĭng nau ntrŭnh. Nau kan mpeh ntŭk gŭ ntă dê nau ntrŭnh kơt aơ ri mô kloh. Tal bar, aơ lah nau kan ma rnôk aơ âk, ngăn lah tâm ăp dô thị, ăp ngih êp trong nkuăl têh kŏ geh nau tâm rgop nsum ma nau kan tăch rgâl. Lah mô geh ntrŭnh n’hêl ri ân jao ân Chính phủ mô lah Kruanh n’gâng kan Công an ntrŭnh”.

Ăp nŭih kan bah Uỷ Rnâng kan Quốc hội ngăn lah đah nau jêr tâm nau njrăng, rdâng ŭnh sa đah ăp ngih prêh dăp. Kruanh Uỷ ban Văn hoá ntĭm nti Nguyễn Đắc Vinh, đă:

‘Ngih prêh dăp ri prêh ngăn, rgum âk nŭih. Lah geh nau tât mpeh ŭnh sa ri jêr ngăn geh kơl an. Ndri ma ueh ngăn lah ân geh nau kan njrăng rdâng ri ueh ngăn. Yơn nau tal bar lah ăp nau kan ndrel ndơ dŏng gay mpuh n’hât ŭnh sa prêh dăp ri jêr lơn, ri ma ntrŭnh n’hêl nau kan aơ”.

Hôm đah Kruanh Quốc hội Trần Quang Phương ri lah rjăp:

‘Ăp dĭng lĕ ăp ntil ngih ân geh tâm di nau ntrŭnh, nau dơi. Yơn rnôk aơ ngih prêh dăp hôm lah nau kan ma geh uănh khlay ngăn, lah nau ntrŭnh mpeh nau njrăng rdâng ŭnh sa, mpuh n’hât ŭnh. Kơt lah geh âk ngih prêh drăp tâm trong hvêt, mô geh trong ân ndeh mpuh n’hât ŭnh lăp. Knŭng geh du đê̆ ngih rnôk aơ tĭng nau dơi kơp dơn ndâk đô thị ri geh”.

Kŏ tâm pơh rlau aơ, rnôk geh nau đă mpeh nau mbơh, djăt, rgâl nau nchrăp Luật soay rnoh hao khlay (rgâl nkra), Uỷ ban Rnâng kan ân lah, nau ntrơn soay phân poh ntơm mô geh ân jêng geh soay 5% ri ƀon lan geh nau khuch yor phân hao khlay, ƀư jêng rnoh ndơ tuch tăm. Kruanh Hội đồng Dân tộc Y’Thanh Hà Niê Kđăm lah kloh:

“10 năm aơ, rnoh phân mô huch. Tĭng nau mbơh rnoh phân poh nkra tay hao khlay yơn ngăn lah mô geh huch ndrel ƀon lan ân geh ndơn soay âk. Bu uănh khlay ngăn lah nau ueh jêng bah phân poh ma gâp ân lah, aơ lah nau kan ma Ngih dak tâm nau kan mât ân geh njrăng”.

Yơn lah, đah nau uănh năl bah rmôt kan tăch rgâl Công nghiệp Việt Nam, wa Đậu Anh Tuấn mbơh, nau ntrơn phân poh geh soay 5% mra mô ƀư ân prăk phân poh hao khlay tay:

‘Nau dăng nkra phân poh bah nơm âk ngăn, ri ma lah nơm nchâp rnoh soay 5% ri ngăn lah rvăt lăp kŏ ndơn 5% tâm rnoh ê nkra geh huch. Kơt ri lah phân poh tâm dak mô geh nau gay ma ân hao mô lah geh dơi nau tăch âk lơn. Aơ kŏ lah du nau jêr mĭn ri mhâm ƀư nơm nkre dơi nchrăp nau dơi gay ma nkra phân poh ndrel nkre mât dơi nau kan ê nkra phân poh tâm dak”.

Lôch nau tâm nar rƀŭn nkô̆ nau nchrăp pháp luật khay 8, Kruanh Quốc hội Trần Thanh Mẫn đă ăp ntŭk kan geh tât ƀư ân jêh 10 nau nchrăp nchră gay njoăl nau mbơh tât rơh rƀŭn ntoh măt Quốc hội ƀư nau kan, nchrăp geh tâm lơ 28-30/8. Kruanh Quốc hội kŏ mbơh, rơh rƀŭn tal 36 bah Uỷ ban Rnâng kan Quốc hội mra geh ƀư ntơm lơ 19-22/8, nkô̆ nau uănh khlay ngăn tâm rơh rƀŭn aơ lah Uỷ ban Rnâng kan Quốc hội đah 3 n’gâng kan:

‘Rơh rƀŭn tal 36, ôp nau ndrel ơh nau ôp bah ăp N’gâng kan, ntŭk kan. Rđau kan Quốc hội, Kruanh ndrel ăp Groi Kruanh hŏ ƀư tơm ăp ntŭk kan, n’gâng kan đah Chính phủ gay nchrăp ân rơh ôp nau ndrel ơh nau ôp aơ. Tâm nê, N’gâng kan tuch tăm ndrel hun hao ƀon lan, N’gâng kan Công thương, N’gâng kan Văn hoá, Thể thao ndrel pâl n’aih mra ơh nau ôp aơ”./.