Rơh ôp nau khuh n’gôr đah ăp nau rjăp nau kan kơt pă điện ân nau kan ê nkra ndrel dŏng. Wa Phạm Văn Hoà, rmôt kan bah Đồng Tháp ân lah, nau kơp rnoh kơt rnôk aơ ê geh tâm di đah nau ŭch bah bon lan, ngăn lah rnoh soay 10% VAT. Păng đă Kruanh N’gâng kan Công thương mbơh tât nau kan aơ. Kruanh n’gâng kan Nguyễn Hồng Diên, mbơh:

‘Bộ Công thương hŏ ƀư tơm nau rgâl, ntoh tay nau ntrŭnh mrô 28. Tĭng nê, tâm nau nchrăp mbơh Chính phủ ôi nar aơ ri huch ntơm 6 gưl, jur hôm 5 gưl. Gưl bôk năp ntơm 0 tât 50 kwh tât ntơm bah 0 tât 100 km mông. Kơt ri lah đă nau bah ntoh măt Phạm Văn Hoà hŏ geh djăt ndrel geh mbơh tât Chính phủ, tâm di kơt ma ntoh măt ŭch”.

Ơh nau ôp bah wa Dương Khắc Mai, rmôt kan bah n’gor Dak Nông mpeh nau đăp mpăn ŭnh nar ndrel nau ntrơn jêng nau kan rnoh ŭnh nar ndâk tay, Kruanh n’gâng kan Nguyễn Hồng Diên mbơh nau:

‘Việt Nam geh nau dơi mpeh ŭnh nar ndâk tay, điện măt nar. Yor geh ăp ntŭk geh sial kơt lah ih, kơt lah vâr. Yơn lah, tâm rnôk nau văng sa ƀư kan kơt rnôk aơ bah Việt Nam mô dơi n’hao rnoh ŭnh nar ndâk tay ma nau dơi kan ndrel văng sa bah Việt Nam. Ndri ma ŭnh nar ndâk tay prêh ir ri roh nau đăp mpăn tâm lam ntrong pă điện. Nau kan kơt ma nơm mra dơi n’hao rnoh ŭnh nar ndâk njêng lah ntuh kơl tâm trong têm điện; ntoh kơl tâm trong pă điện, ngăn lah trong điện blau mhe”.

Ôp nau Kruanh n’gâng kan tuch tăm ndrel hun hao ƀon lan Lê Minh Hoan mpeh nau kan tâm Lâm Đồng jêh rnôk chuh vắc xin pŭn ntô geh 6.631 mlâm ndrôk sŏk dak toh djroh ndrel 357 mlâm lĕ khĭt, wa Trịnh Tú Anh, rmôt kan bah n’gor Lâm Đồng đă:

‘Kruanh n’gâng kan mbơh nau n’hêl mpeh nau kan ê nkra vắc xin pŭn ntô ndrel nau kan mêt uănh nau nâp tam bah ntil vắc xin aơ đah ndrôk sŏk dak toh. Nkre đah ăp nau tât khuch hŏ geh ri đă ơm ƀư năl kloh nau kan ndrel mbơh luh ăp nau kan gay ma kơl an ƀon lan geh khuch, gay đăp mpăn nau rêh ân ƀon lan”.

Tĭng Kruanh n’gâng kan Lê Minh Hoan, rnôk aơ n’gâng kan rgum ăp rmôt Thú y ntơm bah 2 ntŭk kan mpeh bah dâng ndrel ăp nŭih ƀư nau kan ăp nar tâm n’gor gay ma uănh, săm ji ân ndrôk hôm rêh:

‘Hŏ lah nau khuch ri ân geh nau ntrŭnh kơl. Phung hên kŏ mra ndrel ma Lâm Đồng gay mbơh nkoch, nchrăp nau kan ân tâm di ân kônh wa nơm. Hên hŏ rđau ƀư tĭng 2 nkô̆ nau kơt ba kơi: Ngoai lah, dôl ma mêt uănh kloh đah săm ƀŭt kơp dơn đăp mpăn nau ê nkra, đăng ký leo dŏng, chuh vắc xin aơ. Gay dăch dŭt năl nkô̆ nau păng ntŭk geh, nơm rhuăt luh nau blau kan nsum ân ăp ntŭk kan tăch rgâl ndrel ma ăp ntŭk kan mât ngih dak tă bah Trung ương tât nkuăl, mô ân geh ăp nau kơt nê tay”.

Ntrong kan ƀư n’hao nau geh ndơ ân nau kan tuch tăm, rgop nau đăp mpăn nau tăch dak ba dih, n’hao nau geh ân ƀon lan geh âk nŭih kơl an. Kruanh n’gâng lan Lê Minh Hoan ân lah, gay hun hao nau ntơ ân geh Nau ntrŭnh bah Quốc hội jao ân Chính phủ ntrŭnh mpeh nau săk ntơ ndrel ân geh ntŭk tăm rgum gay njêng ăp ntil ndơ tuch tăm tâm ban mpeh rnoh:

‘Ŭch kơt nê, nơm ân geh ăp ntŭk tăm ndơ rgum, tŏng nau dơi bah ăp ntil ndơ tuch tăm tơm ngăn, geh dơi nau săk ntơ bah neh dak. Tal 3 lah ndrel đah ăp ntŭk ƀư nau kan aơ ndâk ăp nau kan n’hêl ngăn gay ma mât rup gui bah ndơ tuch tăm bah Việt Nam nơm tâm lam ntur neh. N’gâng tuch tăm ndrel hun hao ƀon lan ndrel đah N’gâng kan Công thương dôl đă đah Thủ tướng Chính phủ ndâk rmôt kan phe, ba neh dak. Jêh nê hên kŏ lŏ mĭn ƀư ăp ntil ndơ tuch tăm tơm ngăn kơt sầu riêng, cà phê, tiêu”.

Lôch nau ôp ndrel ơh nau ôp đah 3 nau kan: tuch tăm ndrel hun hao ƀon lan; Công thương, văn hoá, thể thao ndrel pâl n’aih, Groi Kruanh Quốc hội Nguyễn Đức Hải lah rjăp: rnôk ôp nau geh khuh n’gôr, nau kan rjăp, sŏng ndrel ndâk nkra. Uỷ ban Rnâng kan Quốc hội rnê prêh ăp Kruanh n’gâng kan, Kruanh ntŭk kan hŏ nchrăp ueh nkô̆ nau, rgum ơh ăp nau kan ma ăp ntoh măt Quốc hội uănh khlay, mbơh ăp tŏng mpeh ăp nau kan hôm kol, ê dơi. Nkre lah, kơp dơi nau nsôih bah ăp Kruanh n’gâng kan tâm nau ntrŭnh ƀư ăp nau ntrŭnh bah Uỷ ban Rnâng kan Quốc hội ndrel đă ăp nau kan hôm nkol tâm nau nơm ƀư kan./.