Nô Y Al Trei (Nuĭh Bu Nong) ta xã Yang Tao, nkuâl Lăk, n'gor Dak Lak way dơi nuĭh ƀon lan kuăl lah "cán bộ leo trong". Đah nău ƀư lah Groi bí thư Chi bộ, Kruanh buôn Bhôk, nô Y Al Trei way dơi nsrôih an ƀư nghị quyết ăp gưl tâm nău rêh.

Trong lăp tâm buôn Bhôk, xã Yang Tao, nkuâl Lăk kloh uĕh, bar ding trong dơi bât ma ăp mbor kao si. Măng, n'gâng mpoh ang trong ƀon nar lơn ma chrat ang lơn an buôn Bhôk. Nău rêh bah kônh wa tâm ƀon tĭng kơn hĭng săk ntơr uĕh đŏng, rnoh rnăk ach o năm 2022 hŭch 9 rnăk rđĭl đah năm 2021. Tĭng nô Y Al Trei, Groi bí thư chi bộ, kruanh buôn Bhôk, lĕ rngôch ăp nău rgâl dja lah geh ngăn tât bah Nghị quyết 02 n'hanh Nghị quyết 05 bah Đảng bộ nkuâl Lăk da dê, tâm di đah nău ŭch rŏng bah nuĭh ƀon lan:

"He jă kônh wa rgum hop gay nkoch trêng rgŏ jă ntĭm nti tĭng ƀư nău kan, trong ƀư bah Nghị quyết 02 lah moh ndơ, lôch nê hôm Nghị quyết 05 lah moh ndơ, yor Nghị quyết 02 lah păng kơt aơ gung trong geh tay ŭnh mpoh ang n'hanh bar ding trong kônh wa tăm kao si, n'hanh Nghị quyết 05 ntĭm nti kônh wa tăm tơm sa play, mât rong ndrôk, rpu. Lôch hop nkoch trêng bar, pe tơ̆ kơt nê̆, ri he hăn nkoch trêng rgŏ jă tĭng jay n'hanh he nkoch trêng ma công nghệ thông tin ma facebook, ma Zalo gay kônh wa rƀah gĭt kloh lơn".

Nghị quyết 02 n'hanh Nghị quyết 05 bah Ban chấp hành Đảng bộ nkuâl Lăk năm kan 2020-2025 dôl dơi an ƀư ăp kôp ta ăp xã tâm lam nkuâl. Tâm nê, Nghị quyết 02 mpeh rgum ăp tơm ndơ, gay rdâk njêng n'hanh hun hao nkuâl Lăk jêng ntŭk rgum pâl nđaih tơm bah n'gor tâm năm 2030. Nghị quyết 05 mpeh tĭng ƀư rgâl mbrô dăp rgum, si tăm ndơ mât lvang năm 2021-2025. Tĭng ƀư 2 Nghị quyết dja, buôn Bhôk hŏ an ƀư rlău 2.500 m trong điện mpoh ang, tăm 325 tơm kao si meng ăp trong me lăp tâm ƀon. Lĕ rngôch rnoh khlay 2 ndơ ƀư dja bơi 40 rkeh prăk an ƀon lan rgop êng. Buôn Bhôk dơi pă an rlău 1000 ntil tơm sa play ăp ntil kơl rnăk ach o tăm. Yuh H’Nguyệt Hatrơi, ta buôn Bhôk, an gĭt, mô dơn pă an kon si ntil, cán bộ ntrŭt nsôr tuch hôm hăn tât mir ntĭm nti trong tăm n'hanh mât chăm gay ntop geh tay wăng sa.

          "Gâp dăn lah uĕh Đảng, ngih dak hŏ kơl rnăk gâp ntil si tăm. Kruanh ƀon dŭt uănh khlay tât rnăk gâp đŏng. Gâp mbra nsrôih mât chăm gay tơm sa play hao jêng uĕh gay jêh aơ tay ntop nsĭt geh wăng sa gay geh prăk lăk an nău rêh".

Tĭng wa Nguyễn Văn Huyên, Bí thư đảng ủy xã Yang Tao, nkuâl Lắk, gay ăp trong nchrăp trong kơl bah Đảng lăp tâm nău rêh, dŭt khlay hôm lah cán bộ đŏng. Lơn lah đah nkual ƀon lan rnoi mpôl đê̆, lah cán bộ gĭt wât ƀon lan, rah rơch, ngăch prăl, blău ƀư njêng mhe mbra rgop ngăch ndơ̆ Nghị quyết bah Đảng tât đah ƀon lan.

"Aƀaơ ăp nuĭh đảng viên mom kơt nô Y Al Trei lah kruanh thôn da dê. Tâm rnôk tĭng groi nđôi nău kan băl dja way mât uĕh nău khlay dơn kan n'hanh tĭng ƀư jăp pah kan ta ntŭk. Mhe aơ nơh tĭng ƀư Nghị quyết 05 n'hanh Nghị quyết 02, rgum 2 Nghị quyết dja jŭr an ăp kruanh thôn ƀon n'hanh chi bộ rđău đă n'hanh rgum lĕ rngôch ăp tơm ndơ lôch nê jao an kruanh ƀon rgŏ jă kônh wa rgop prăk gay rdâk njêng tăm kao si lôch nê ƀư n'gâng điện mpoh ang trong, mhe aơ nơh ri buôn Bhôk ƀư dơi trong điện mpoh ang, ƀon lan ndrel tâm ban ŭch".

Ăp đảng viên nuĭh rnoi mpôl đê̆ ngăch prăl kơt nô Y Al Trei dôl rgum khlay tâm trong nkoch trêng, ndơ̆ gung trong trong nchrăp bah Đảng, trong kơl bah Ngih dak tât đah kônh wa, tĭng kơn kơl kônh wa rgâl bah nău mĭn tât nău kan gay rdâk njêng nău rêh ăp nar lơn ma uĕh lăng lơn./.