Trong Yên Ninh jong rlau rlau 100m, tâm ăp tổ dân phố 8,9,10 bah Phường Yên Ninh, nkuăl ƀon têh Yên Bái geh tât âk jêt ntŭk kan, rmôt kan ndrel ngih săm ƀŭt. Nkuăl aơ tâm mông ôi, dŭt mông dĭng nar, kêng măng vay geh kol trong, tih tâm ntŭk njưh ndeh ndrel tă geh tâm tom ndeh ta aơ. Tâm nau geh kơp uănh, nchră nau ngăn bah nkuăl, Công an Phường Yên Ninh, nkuăl ƀon têh Yên Bái hŏ râm nchră nau ma gưl uỷ, n’gâng kan bah nkuăl ndâk nau kan “Ntŭk mât njrăng êng bah mpông ngih săm ƀŭt Tiểu học ndrel Trung học cơ sở Yên Ninh” đah rmôt kan râng geh: dân quân tự vệ, mât tổ dân phố, mât tâm ăp ngih săm ƀŭt ndrel tâm nê rmôt công an lah tơm. Trung tá Phạm Việt Đức, Groi Kruanh Công an Phường Yên Ninh, nkuăl ƀon têh Yên Bái, mbơh:

            ‘Rmôt mât njrăng êng bah hên geh 8 nŭih. Ăp nar mra ntơm pah kan tâm mpông ngih săm ƀŭt bah năp rnôk ân kon se luh nti nklăp du mông ndrel rnôk ma ăp kon se lôch nti du mông, yor aơ lah rnôk ma me mbŏ kon se vơt kon se âk, ndrel kŏ lah rnôk ma kon se ăp ngih săm ƀŭt lôch-lah rnôk kol trong, ƀư roh đăp mpăn âk ngăn”.

            Ngih săm ƀŭt Trung học Cơ sở Quang Trung tâm trong Quang Trung, nkuăl ƀon têh Yên Bái geh rlau 1.400 kon se nti. Bol ma mpông bah năp măt trong, ăp jrâu hôm ba kơi sop 10% jong nklăp 70m. Ăp nar, rnôk lôch nti, âk rbăn kon se nti tă bah yôk ndrel ba dâng ndrel ma rhiăng me mbŏ kon se gŭ kâp vơt, geh nsum ma ndeh hăn ro tâm trong ri ma geh nau kol trong hô ngăn:

            Gay đăp mpăn hăn trong, êng nau nkoch trêng tât ăp me mbŏ kpn se nti, kon se nti ndrel ân kon se, nai nti ký ton nau mât đăp mpăn hăn trong tă bah bôk năm nti, ăp nar ngih săm ƀŭt mbơh pă nau kan Ban Giám hiệu tâm rgop ma nŭih mât njrăng đăp mpăn hăn trong tâm mpông ngih săm ƀŭt. Nai nti Nguyễn Thị Thuý Nga, Groi Hiệu trưởng ngih săm ƀŭt mbơh:

            ‘Ngih săm ƀŭt hŏ pă trong ân kon se hăn hao, jur tâm mpông ngih săm ƀŭt tĭng 2 ntrong, ngoai lah ân kon se hăn jâng, bar lah ân kon se têk ndeh hăn ndrel đă me mbŏ kon se, kon se hăn leo, vơt ri dâk ƀah ngai 20 mét. Ƀư ân đăp mpăn hăn trong tâm mpông, tâm mông ôi geh Ban Giám hiệu, nti ntĭm, nŭih mât njrăng ndrel kon se nti njrăng tâm ăp pơh, dĭng nar geh Ban Giám hiệu, nai ntĭm, nŭih mât njrăng gay leo kon se hăn nti tĭng trong đah me, ndrel lôch ti ndrel hăn sĭt ri ăp nau ntĭm nti mơ dơi sĭt”.

            Ăp rmôt mât njrăng êng đăp mpăn hăn trong nsôih râng hăn tâm nau kan, rgop n’hao nau blau ân me mbŏ kon se, kon se nti tâm nau kơt tĭng Luật đăp mpăn hăn trong, kơl an đăp mpăn rnôk hăn nti, huch kol trong. Oh Bùi Lương Nguyên, kon se nti Ngih săm ƀŭt THCS Yên Ninh, nkuăl ƀon têh Yên Bái, nkoch:

            ‘Tâm ngih săm ƀŭt hên kŏ geh mbơh ntĭm nau đăp mpăn hăn trong kơt rnôk hăn ncho ndeh ân ndâu môk n’gang bôk, ndrel âk nau ntrŭnh êng ndrel hên kŏ ƀư kơt tĭng đŏng. Rnôk hăn nti, gâp saơ geh ăp nai, ăp kônh wa ndrel ăp kônh công an ntĭm mbơh ri kŏ saơ mpông ngih săm ƀŭt soih lơn, hên hăn nti kŏ geh đăp mpăn”.

            Tâm nkuăl ƀon têh Yên Bái rnôk aơ geh 35 kon se, đah rlau 22 rbăn kon se, tâm nê geh âk ngih săm ƀŭt luh, lăp, chrăng yôk...Ndri ma, N’gâng kan ntĭm nti nkăl ƀon têh Yên Bái vay geh nau ntrŭnh, đă ăp rmôt ngih săm ƀŭt n’hao nau đăp mpăn hăn trong ân kon se. Wa Hà Yên Thái, Groi Jrâu kan ntĭm nti nkuăl ƀon têh Yên Bái, n’gor Yên Bái, mbơh:

            ‘Jrâu kan ntĭm nti nkual ƀon têh vay tâm rgop ngăn đah Rnâng kan mât đăp mpăn hăn trong bah n’gor gay nkoch trêng Luật hăn trong tât kon se nti, rđau ăp ngihs ăm ƀŭt tâm mông hăn nti geh nai ntĭm, kon se tâm đội cờ đỏ dâk tâm ăp mpông gay đăp mpăn pă, nkah kon se luh lăp tâm mpông, ngăn lah tâm ăp mpông ngih săm ƀŭt chrăng ntơm đă kon se ân geh jur, hao, bol ma ndeh vah jâng mô lah ndeh vah jâng điện”.

            Tĭng nau kơp, ntơm bôk năm nti 2023-2024 tât rnôk aơ ê geh nau tâm tom ndeh khuch hô tâm mpông trong ngih săm ƀŭt tâm nkuăl ƀon têh Yên Bái ôh. Yơn bah năp nau âk ndeh kơt rnôk aơ, ngăn lah ndeh ôtô, tâm rnôk trong hăn tâm âk ntŭk mpông ngih săm ƀŭt ê tŏng hvi kơt nau ŭch, hôm ơm nau kon se nti tih Luật hăn trong, ndri ma êng nau nsôih bah Ngih săm ƀŭt, ăp rmôt n’gâng kan, me mbŏ kon se kŏ ân geh n’hao nau mĭn tĭng Luật đăp mpăn hăn trong, vay kơl an, ngăn lah nkah kon se ƀư tĭng ăp nau ntrŭnh mpeh đăp mpăn hăn trong, gay huch ngăn ăp nau khuch tât./.