Na nao âk năm aơ, nkual neh bah Công ty Lâm nghiệp Krông Bông, nkuăl Krông Bông-mpeh bah dâng n’gor Dak Kak, jêng ntŭk hô bah nău phah bri. Âk tiêu khu kâng n’har đah ăp nkuăl Ea Kar, M’Đrắk (n’gor Dak Lak) n’hanh nkuăl Khánh Vĩnh (n’gor Khánh Hòa), lơn lah ăp rnoh neh njong trong cao tốc Khánh Hòa-Buôn Ma Thuột dôl ƀư, bri geh rŭn in hô. Âk lôk bri lĕ geh sreh kăl, su ƀư ŭnh sa. Âk n’gâng tơm si geh ot n’hanh mhe geh su, têh tât du hê ut.

Wa Bùi Quốc Tuấn, Giám đốc Công ty Lâm nghiệp Krông Bông an gĭt, rlău 2.000 rnăk, nklăp 17.000 nuĭh trơn gŭ bah ăp n’gor nkual yôk mpeh bah lơ lăp nkual neh công ty, jêng tât phah bri mô dơi uănh nđôi. Ndrel đah nĕ, âk nău nchrăp ƀư têh mpeh dak bât, trong hăn ƀư ta ntŭk geh sŏk neh gŭ, neh tuch tăm bah ƀon lan yơn mô dơi ƀư uĕh trong kan ndâk ƀư tay ntŭk gŭ, ntŭk tuch tăm, jêng tât nuĭh ƀon lan khuh khah lăp tâm nkual neh bah công ty phah bri, rŭn in neh.

Na nao ăp năm dăch aơ mbơh ƀư âk nău nchrăp kan têh, nĕ lah n’glău Krông Pách thượng, trong Đông Trường Sơn, n’hanh têh ngăn cao tốc Khánh Hòa-Buôn Ma Thuột. Phần ngih sam ƀŭt Ea Tlong lah ntŭk geh jêr âk ngăn bah trong cao tốc lah geh nău ƀon lan krih dak si khĭt tơm si, dŭt jêr đah trong kan mât uănh, njrăng n’gang bri. N’hanh khuch kơt neh ri ƀư roh hŭch bri dŭt ngăch.

Ta mpeh tây bắc bah dak lak, rlău 5.800ha tâm dĭng lĕ 8.800ha Công ty Lâm nghiệp Buôn Ja Wầm (nkuăl Cư M’gar) lĕ mô hôm geh bri. Nklăp 3.000ha hôm ƀa ƀă, dơi kuăl lah geh bri yơn lĕ dŭt nsêng. Aƀaơ, bri ta aơ hôm e geh muih kăl hăch. Gưl geh phah rêng hvi, tă bah ăp ntŭk mât uănh, njrăng n’gang bri 200-300 mét. Wa Trần Hồng Minh, cán bộ Ntŭk mât uănh bri mrô 1, công ty Lâm nghiệp Buôn Ja Wầm an gĭt, ăp nuĭh phah bri dăch aơ dŭt janh n’hanh nŏng. Mô kâp êp mô lah ngai, hôm e bri lah hôm e geh phah. Rnôk geh saơ, ăp nuĭh nchrăp dun plơng, rdôl lơh rmôt mât njrăng bri. Săk wa Minh tă geh âk nuĭh lơh hăn lăp ngih dak si:

Nuĭh ƀon lan trơn gŭ rêh ăp ntŭk tâm bri, khân pơng rŭn in lêng lang jêng he dŭt jêr jŏt. Aƀaơ dŭt jêr, săk oh hăn kan ri khân pơng ji nuih khân pơng hăn tât ntŭk kan khân pơng lơh lăp ngih dak si, khân pơng dŭt nŏng ngăn.

Wa Nguyễn Công Văn, Groi kruanh UBND nkuăl Cư M’gar, n’gor Dak Lak nkoch nău ngăn dôl rvê ta ntŭk rnôk nuĭh ƀon lan geh trơn gŭ dah rŏng khuh khah phah bri, rŭn in neh. Tâm rnôk mpet ta bri nar lơ têh ri rnôk rmôt mât njrăng bri lŏ mĭn tay âk nău. Âk nuĭh tơm bri aƀaơ lĕ mô dơi mât njrăng bri. Bri ta nkuăl geh nău jŭt jăng lơi.

Geh âk nuĭh lĕ ntlơi nău kan jêng tât ăp công ty nông lâm trường ta nkuăl Cư M’gar bơi kơt lĕ roh lĕ rngôch dơi mât uănh, njrăng bri. Ta nkuăl Cư M’gar ri bri uănh kơt lĕ phah ƀhiău. Uănh nđôi na nê̆ bri lĕ roh bah rnôk mô dơi gĭt năl.

Tâm rnôk bri geh phah hô, âk nuĭh tơm bri ta Dak Lak lŏ dôl pơk hvi mât uănh. Đê̆ đŏng, yor klach trơn dơn nău kan, âk tơm bri mô mbơh nu nău ngăn, jêng tât rnôk ngih pah kan dơi kan lăp, bri lĕ nsoih dơm, neh bri lĕ geh tuch tăm, dŭt jêr mkro. Wa Lê Văn Nuôi, Groi Kruanh UBND nkuăl Buôn Đôn, n’gor Dak Lak, nkoch nău ngăn.

Bôk năp lah mô dơi gĭt, hăn uănh nđôi mô lĕ, tal 2 lah mpôn nău tih. Nău ƀon lan trơn gŭ dah rŏng phah bri tă aơ 10 năm jêng aƀaơ mư saơ, ri na nê̆ nuĭh tơm bri klach nău tih jêng mô janh mbơh đah n’gâng kan ƀon lan, đah ăp nău kan way kan bah n’gor gay mĭn joi trong mkra, Rnôk saơ kơt nĕ ri mô gĭt mpeh nuĭh trok, jêh nĕ tâm nduih nău kan ndrel.

Năm 2023 rmôt kan dơi kan Dak Lak saơ, ƀư sam ƀŭt rhăch nău 1.036 nău yor tih pháp luật mpeh lâm nghiệp, 246 ha bri geh phah. rnoh nău n’hanh rnoh neh bri geh phah dơi kơp, mô lah n’hêl na nê̆. UBND n’gor Dak Lak uănh dơn, trong kan saơ, njrăng n’gang, rmal ăp nău tih pháp luật Lâm nghiệp hôm e geh âk nău mô hŏ dơi ƀư. Nu nău joi, rwăt tăch, rdêng si mô tâm di, rŭn tuch tăm, rŭn in n’hanh rŭn in tay bri, rŭn in neh bri hô lĕ rngôch geh ta ăp nkuăl. Nău khuch bah nău aơ dŭt têh yơn n’gor mô geh trong mkra rjăp, an tât trung ương uănh tât ntop kơl.

Dŭt âk nkual hôm e nu nău ƀon lan trơn gŭ dah rŏng mo dơi dăp, đăp mpăn ƀư dŭt âk khuch kơt phah bri, run in neh tih. Ta năp nu nău aơ, n’gor lĕ ntĭm rđău ăp n’gâng kan nău kan, ăp ntŭk ndâk ƀư ăp nău nchrăp đăp mpăn ƀon lan gŭ âm dah rŏng. Yơn lah, aƀaơ dôl mâp âk jêr jŏt, tơm prăk bah Trung ương ntuih kơl an ăp bôk nău kan đăp mpăn ƀon lan gŭ âm dah rŏng hôm e đêt.

Đah nău ngăn bri geh muih kăl nsêng, nuĭh phah bri uănh mô khlay pahps luật, tâm rnôk nĕ, âk nuĭh tơm bri thơ tha mât uănh, âk nuĭh tơm bri roh mô dơi mât njrăng bri, âk ntŭk bah n’gor Dak Lak bri geh jŭt jăng lơi.