Tâm nchră đah nău tât râng bah ntơh măt ăp N’gâng kan bah lơ, Viện, nhih nti, n’gor geh dak lêng ƀư tâm rnôk Chính phủ mhe n’gluh an dŏng Nghị quyết mbrô 218 mpeh bôk nău kan tĭng ƀư Nghị quyết mbrô 20 bah Ban Chấp hành Trung ương Đảng khóa XIV mpeh rdâk njêng, hun hao Việt Nam jêng neh dak geh dak lêng dăng. Khoa học, công nghệ, rgâl blău njêng mhe n’hanh rgâl mbrô mô dơn rgop khlay tâm trong ntop kơl ma hôm dơi năl lah ngoăy tâm ăp jâng nsing gay n’hao nău dơi kan neh dak mpeh dak lêng.

Wa Trần Tuấn Anh, Groi Kruanh Viện Hàn lâm Khoa học n’hanh Công nghệ Việt Nam an lah, du neh dak geh dak lêng dăng mô dơn geh âk ndrâm dak lêng, duk mpan mô lah têh kuâng wăng sa dak lêng, ma ân wât, nchroh n’hanh mât dơi dak lêng, mât dŏng tơm ndơ mpêt khlay n’hanh ƀư tơm ăp công nghệ dak lêng têh dăng mhe.

“Ân rdâk njêng du rêng gŭ mĭn dak lêng gưl neh dak, du neh dak geh dak lêng dăng mô dơi nsing tâm du viện gŭ mĭn mô lah du n’gâng kan nê nơh dơm ôh. Ndru tơm gŭ mĭn dak lêng geh nău tât râng bah ăp viện gŭ mĭn, ăp nhih nti đại học, ăp N’gâng kan mât bôk kan ngih dak, ăp mpôl kan ta dak lêng, ăp n’gor meng dak lêng, ăp doanh nghiệp mât dŏng dak lêng n’hanh ăp băl tâm boh”.

Lah n’gor dơh geh mha êng mpeh dak lêng, Khánh Hòa geh bơi 490 km kơh dak lêng, rlău 200 gôl dak lêng, ăp kuel dak jru Vân Phong, Nha Trang, Cam Ranh n’hanh đặc khu Trường Sa, ndrel ăp ndơ gŭ mĭn, ntĭm nti way nkô̆ jru. Wa Nguyễn Thanh Hà, Groi kruanh UBND n’gor Khánh Hoà an gĭt, tĭng ƀư Nghị quyết 20 ân rgâl dăng bah mât dŏng dak lêng jêng mât bôk kan ntŭr neh dak lêng têh dăng mhe, nsing tâm nău gĭt blău n’hanh công nghệ. Khánh Hòa dăn đă Trung ương uănh khlay ntuh kơl ăp ndơ dŏng gŭ mĭn nsum gưl neh dak kơt tàu gŭ mĭn dak lêng jru, jrô rlong ƀư tơm khlay, ntŭk weh năl dak lêng rgum lăp nsum; nkre mĭn uănh ndơ̆ Ntŭk rgum Gŭ mĭn gưl neh dak mpeh công nghệ ntŭr dak lêng ta Khánh Hòa tâm dăp rgum ăp ntŭk gŭ mĭn gưl neh dak mpeh công nghệ têh jong.

“N’gor Khánh Hòa ton ntêm tơm ndơ an lor dŭt âk, nchrăp ăp tŏng neh soih, trong tĭng, ntŭk ntô ndơ dŏng tâm ban kơt kan nsum lhăt đah ăp viện, nhih nti ta n’gor gay wơt dơn, an ƀư geh nău tam ăp trong nchrăp gŭ mĭn, ndơ rgâl công nghệ.”

Bộ trưởng Khoa học n’hanh Công nghệ Vũ Hải Quân năl lah, Nghị quyết 20 ndơ̆ luh njuat ndơ̆ rgâl tơm đah khoa học, công nghệ dak lêng. Bộ Khoa học n’hanh Công nghệ mbra nsŏng kơl an Chính phủ trong nchrăp an ƀư Nghị quyết 20, rgum sơch ăp nău kan khoa học, công nghệ, rgâl blău ƀư mhe n’hanh rgâl mbrô dak lêng rgum tơm lvang năm 2026-2030.

“Bộ Khoa học- Công nghệ mbra nsŏng kơl na nê̆ an Chính phủ trong nchrăp an ƀư Nghị quyết 20. Păng geh nău tam ngăn, păng geh dŭt âk trong kan dak lêng hvi, păng ntrŭt ntrôl kơt nê ta khoa học công nghệ ri păng dŭt hvi đŏng. Bộ Khoa học, công nghệ mbra nsrôih dăp rgum tĭng trong an ƀư lor gay an ƀư du trong geh nău tam. Geh ăp ntil he ân ƀư jŏ jong, ƀư ăp tŏng rêng yơn geh ăp ntil mbra ntuh kơl gay n’gluh an nău dơi n’glĕ dŭt.”