Ôi dŭt pơh, yuh Siu Pin ndrel ăp nuĭh kan bah rmôt Njrăng, n'gang tăch rvăt nuĭh xã Ia Púch n'hanh cán bộ, tahen Pôih n'har bri Ia Púch tât khâl rnăk vâl oh Siu Thảo. Ntơm nau ntĭm nti, ăp nŭih tâm rmôt kan nkoch tât ăp nŭih geh bu nsŭk nsôr hăn kan tâm dak ba dih, jêh nê geh nhŭp kân, nchâp đă pah kan, mô lah geh bu đă chuai prăk. Tă bah ăp nău nkoch na nê̆, ăp oh dơi gĭt tât njrăng n'gang bah năp nău jă nău kan mô nsing nơm n'hanh ăp nău tâm boh mô ueh tâm mạng xã hội. Siu Thảo mbơh, ăp nar nkoch trêng kơl an oh gĭt kloh lơn mpeh nău tăch rvăt nuĭh n'hanh trong mât njrăng êng săk nơm:"Jêh rnôk djăt nău mbơh bah ăp kônh tahen n'har bri n'hanh cán bộ bu ur nkoch trêng, oh gĭt lah ăp nuĭh aƀaơ geh âk nău ƀư rlăm têh dăng rƀŏng tâm druh ndăm, kơt lah pah kan geh prăk khay âk, mô lah ndơ̆ hăn pah kan ta dak bah dih. Ntơm bah nê oh ndrel ăp băl gĭt mât njrăng săk nơm ueh lơn”.

 Ndâk njêng năm 2010 đah 40 nŭih, Rmôt kan Njrăng, rdâng nau tăch rvăt nuĭh xã Ia Púch mât mbro nkoch trêng rgum ăp năm, nkre tâm pă ăp nŭih tât ăp rnăk rgŏ jă, nkah ntĭnh nuĭh ƀon lan đah nău Jrai n'hanh ăp nău nkoch ngăn ngên dăch dêh, ăp nuĭh kơl kônh wa gĭt saơ nău mplư rlăm, tâm rlŭk, lơn lah nău nchâp đă nău kan jê̆, prăk khay âk gay ma ndơ̆ nuĭh hăn dak bah dih.

Ngoai tâm ăp nău nkoch dơi nkah tay lah nău tih geh ta xă n'har bri Ia O, n'gor Gia Lai, tâm khay 6/2022. Djăt nau jă hăn kan ta Tây Ninh đah rnoh prăk khay 20 rkeh prăk, 7 druh ndăm nuĭh Jrai ta ƀon Kloong geh ndơ̆ hăn tât Campuchia, ntrŭt đă râng rlăm tă bah mạng, geh bu rlăm n'hanh đă kuăl sĭt rnăk wâl đă choai. Geh rnăk ân tăch lŏ, manh gay leo kon sĭt.

Ăp nău nkoch geh ngăn kơl an nuĭh ƀon lan gĭt lah nău tât tăch rvăt nuĭh mbra ntơm bah du nău jă hăn kan, du nău tâm boh ta mạng mô lah nău nsing nơm dơm ta năp ăp nău mbơh đăp mpăn. Ta năp rnôk dơn nău kan ngai, kônh wa an uănh năl na nê̆ kloh nau kan, ntŭk kan, nŭih săch dŏng; mô jao săm ƀŭt ân nŭih mô nâp nâl n'hanh mbơh ma n’gâng kan lah saơ nau mô tâm di.

 Yuh Siu Pin, Kruanh rmôt Bu ur ƀon Goòng, xã Ia Púch, an gĭt, nău nkoch trêng đah nău ngơi rnoi mpôl đê̆, ndrel ma nau kan tâm dăch dơh, kơl an kônh wa nơih gĭt, nơih nkah ndrel n’hao nau njrăng:"Mpôl hên ndrel đah n'gâng kan ta ntŭk, ndrel ăp kônh tahen, nkoch trêng n'hao nău gĭt êng an nuĭh ƀon lan tâm thôn, ƀon, lơn lah bu ur n'hanh kon se nkual rnoi mpôl đê̆. Rmôt kan mpôl hên lah nău ƀư tĭng na nê̆ tâm nau rêh ăp nar bah nuĭh ƀon lan, nkoch trêng ma bar ntil nău ngơi."

Xã Ia Púch dăch n'har bri Campuchia, rlău 70% rnoh nuĭh lah nuĭh rnoi mpôl đê̆. Nău rêh du đêt nuĭh ƀon lan hôm e jêr jŏt, nău dơi gĭt tât nau mhe mô âk, ƀư geh ma nău tât geh mplư rlăm hôm e geh, lơn lah đah ăp nuĭh geh nău ŭch joi nău kan ngai.

Tâm nau kan njrăng rdâng, rmôt bu ur ƀư ueh nau dơi tâm dăch dơh, gĭt nău ngơi n'hanh nău way ơm ta ntŭk; Tahen n'har bri pă an nău lư mpeh trong ƀư, nău ƀư bah nuĭh tih, ntĭm nti nuĭh ƀon lan gĭt năl nău tât n'hanh joi nău kơl an. Ăp ding hôm tâm rgop tâm mbơh nău mpeh ăp nău geh tât bu ur, kon se nchlơi ƀon mô geh mbơh kloh gay ma uănh năl.

 Thượng uý Phan Đình Duy, Kruanh rmôt rgŏ jă ƀon lan, Đồn Biên phòng Ia Púch, n'gor Gia Lai, an gĭt, ta ntŭk kan mât uănh mô hŏ năl geh ndơn nau kan tăch rvăt nŭih, yơn nau kan tâm rgop nkoch trêng, njrăng rdâng hôm geh mât uănh ƀa ƀơ:"Tahen Biên phòng vay tâm rgop đah rmôt kan bu ur xã Ia Púch nkoch trêng kŏ kơt lah tât ăp rnăk nkoch trêng mpeh ăp nau tih. Aƀaơ, ăp nău rlăm lăp tâm nuih n'hâm bu ur, dŏng nău tâm rŏng, nsŭk nsôr, rgŏ jă, jêng tât nau kan tăch rvăt nŭih. Rmôt kan bu ur ƀư nau kan khlay ngăn."

 Bâh ăp nău tâm ngơi ta ăp rnăk vâl tât nău tâm rgop đah ăp rmôt bu ur ndrel tahen Biên phòng, nau kan njrăng, rdâng nau tăch rvăt nŭih ta Ia Púch dôl dơi an ƀư bah dâng. Rnôk nuĭh ƀon lan năl dơi nău tih, gĭt trong ƀư êng mât njrăng n'hanh ƀư tơm mbơh nău an mpôl kan dơi kan, geh ma nău mplư rlăm, tăch rgâl mra dơi nking n'gang bah ơm, rgop mât nâp rnă njrăng, đăp mpăn ntŭk gŭ rêh tâm nkuăl n'har bri./.