Bâh du năm ƀư tĭng nău ntrôl dăng nău kơt nti n'hanh ƀư tĭng nău mĭn, nău kan, nău rêh Hồ Chí Minh, xã căn cứ cách mạng Ea M'Droh, n'gor Dak Lak rgum mbơh ƀư bar nău kan: "Mât rong sŭr neh n'hanh ƀư tĭng nău mpêt nkrem", "Ăp chi bộ hăn ndrel đah rnăk ƀon lan klaih rlău ach o". Cán bộ, đảng viên ntop prăk mpêt nkrem, ăp chi bộ dơn kơl ăp rnăk đah ăp nău kan na nê̆.

 Tâm năm rlău aơ, nău mpêt nkrem 1.000 prăk/nŭh/nar lĕ njêng geh rnoh prăk rlău 99 rkeh prăk. Ntrong ƀư mât sŭr neh năm 2025 rgum geh bơi tât 128 rkeh prăk. Tâm rgop ăp rnoh prăk n'hanh rnoh nŭh kơl êng, xã Ea M'Droh lĕ kơl an 5 nău kan rêh jêng, ƀư mhe n'hanh nkra mhe 5 mlâm jay, kơl an ndal 11 rnăk. Ta rơh rƀŭn nar 12/11, ntoh măt 27 chi bộ tâm Đảng bộ xã ƀư nchah sŭr năm 2026, geh rlău 152 rkeh prăk. Ăp prăk rgop đêt dơi rgum jêng tơm prăk kơl nuĭh jêr jŏt. Wa Nguyễn Văn Hào, Kruanh thôn Hiệp Kết, xã Ea M'Droh nkoch."Ntrong ƀư rong sŭr aơ lah nău kan rgŏ jă dŭt ueh, ăp nuĭh ƀon lan kanŭng an geh mpêt nkrem du nar 1.000 prăk dơm rĭ lĕ geh rnoh prăk dŭt âk gay ma kơl an ăp nuĭh jêr jŏt, nuĭh ach o gŭ êng, nta nău dơh nơih kơl an khân păng gay ma rlet rlău ăp nău jêr jŏt tâm nău rêh. Gâp saơ nău kan aơ lah lĕ an geh trĕ lam hvi lơn".

 Ndrel đah rgop prăk, xă Ea M'Droh rlong ƀư ntrong kan "Ăp chi bộ hăn ndrel đah rnăk ƀon lan klaih rlău ach o" ta 4 chi bộ: Ăp nhih pah kan Đảng, UBND xă, Công an n'hanh Tahen. Ăp chi bộ dơn kơl dŭt đêt du rnăk, joi gĭt nău rêh gay săch trong ntop kơl. Geh rnăk dơi ntop kơl ndrôk ntil, ƀư jay; geh rnăk dơi đảng viên an manh neh tuch tăm gay njêng tay nău geh. Wa Trần Doãn Tới, Bí thư Đảng ủy xã Ea M'Droh an gĭt, lôch n’gul gâl, xã pơk hvi trong leo ƀư jêng ăp rmôt kan, doanh nghiệp hăn ndrel đah rnăk ach o.

"Ntơm bah ntrong ƀư rlong kan nê ri mpôl hên n'glêh an pơk hvi, mô dơn lah mpôl kan Đảng mpeh bah dâng ma luh ăp mpôl chroh rƀŭn, ăp doanh nghiệp, ăp nuĭh lŏng bôk tôr, êng nuĭh tâm n'hanh bah dih xă, tâm n'hanh bah dih n'gor gay ndrel nsum ti đah Ea M'Droh ƀư lôch jêh rnoh tât kan bah Nghị quyết Đại hội Đảng bộ xă lor bôk năp lah tât năm 2030 xă Ea M'Droh mbra mô hôm geh rnăk ach o n'hanh êp ach o"