Ôi 11/11, ta phường Quy Nhơn Nam, n’gor Gia Lai, tă bah mih têh, hang rmưn mét khối neh lŭ ndrel tơm si têh rhung rlâm gâl trong Quốc lộ 1D. Bŏk neh, lŭ rsŭn ta măt trong ƀư kol khan trong hăn nthoi đah n’gor Dak Lak. Lôch nê, nhih pah kan dơi kan n’gor Gia Lai rgum mpôl kan, ndeh nhuĭh neh n’hanh ndơ way dŏng tât ntŭk lơh neh lŭ; nkre nking nchăng, ntĭm nti ndeh rklư hăn tĭng trong êng. Ta trong Quốc lộ 1D, trong sop Quy Hòa dơi nking, mô an ndeh rklư rsong hăn tă bah geh ma nău pĭch rlâm. Mpôl kan kơl nuĭh, dơi tâm pă dăch tât ăp ntŭk rbăn lhơ, nchrăp rdâng lơh, nchrăp ntop kơl ntrơn du nuĭh ƀon lan. Ntơm bah kêng măng 11/11, hang rbăn kon se nti ta phường Quy Nhơn Bắc n’hanh ăp xã Canh Vinh, Tuy Phước hŏ dơi rlu nti tă bah mih têh, dak bŭk hao, lơh klach rvê ta trong hăn tât nhih nti.

Mih têh jŏ tât 2 nar bah năp ƀư dak ta âk dak me, dak jăng ta mpeh luh nar n'gor Dak Lak hao, ƀư dak băm âk nkual ƀon lan gŭ. Ta ăp xã Xuân Lãnh n'hanh Đồng Xuân, n'gâng kan ta ntŭk lĕ ngăch ntrơn du âk ngih ƀon lan n'hanh drăp ndơ tât ntŭk đăp mpăn, nkre nking n'gang ăp ntŭk dak băm ta Quốc lộ 19C. Tâm ăp xã Tuy An Tây n'hanh Đồng Xuân, du đê̆ ngih sam ƀŭt lĕ an kon hŏk rlu nti. Rmôt n’gâng kan dơi pă ta ăp ntŭk khlay, nchrăp rdâng đah ăp nău tât ndal. Ntŭk kan uănh n’ôi mbơh njrăng nău tât mih dak lip, pĭch rlâm neh ta nkual yôk n'hanh dak băm ta ăp nkual rđŭng, dak hoch tâm nkual mpeh luh nar n'gor Dak Lak. N'gâng kan ƀon lan n'hanh ntŭk kan dơi kan đă nuĭh ƀon lan n'hao nău njrăng, mô hăn rlău ăp nkual dak băm jru, dak rchoh ngăch, lơn lah ăp ntŭk nglău, dak bât ta dak me, dak diăng gay đăp mpăn.

 Mih têh ntoch jong ta âk ntŭk n’gor Quảng Ngãi lơh ndâp băm, pĭch rlâm neh, koh gâl âk trong hăn. Ta xã Sơn Tây, trong Trường Sơn Đông ntoh 3 ntŭk pĭch rlâm neh, lơh kol khan ntơm bah nar 11/11. Ta xã Phước Giang, lĕ 10 thôn geh ndâp băm, du đêt nkual dak hao têh rlău 1,5 mét. Ăp mpôl kan hŏ ntop kơl ƀon lan ta ăp nkual băm jru ntrơn du tât ntŭk đăp mpăn. Ta xã Ngọc Linh, n’gâng kan ta ntŭk hŏ ndăn ngăch ntrơn du 115 rnăk đah 393 nuĭh tât ntŭk đăp mpăn gŭ nde.

Dŭt rvê lah nkual Đăk Rế ntoh âk têl đang ta jâng yôk, nkri tât 96 rnăk gŭ rêh ta jâng yôk. Lĕ rngôch ăp rnăk ƀon lan dja hŏ dơi ntrơn du tât hội trường Ủy ban nhân dân xã.