Bâh bôk năm 2026 tât aƀaơ, ta ôi nar poăn ăp pơh, UBND xã Hàm Tân, n’gor Lâm Đồng geh ƀư rơh “Djăt nău n’hanh tâm ngơi đah ƀon lan” ta ntŭk kan xã. Wa Trương Quang Lập, guĭt ta xã Hàm Tân nkoch, ntrong kan aơ dŭt ueh khlăy ngăn, nta nău dơh nơih gay ma ƀon lan geh tâm mbơh ngơi đah nuĭh leo kan ta ntŭk. "Ăp ntil săm ƀŭt geh tât neh ntu rĭ geh ji nuih ngăn, yơn ma bâh geh nar poăn ăp pơh nău kan tâm ngơi đah ƀon lan, rĭ geh nuĭh leo kan ta ba lơ ntĭm mbơh na nê̆ an hên ăp nău kan an dơh ngăch lơn”.

Hôm wa Lê Văn Hoà rnê âk ueh nău kơl kan bâh cán bộ ntŭk kan ba dâng.  "Uănh nsum, cán bộ ta aơ dŭt ngăch ngăr đah nău kan, yơn ma yor mhe geh rgâl jêng hôm mô năn ƀư. Nău ngăn, ăp nuĭh kan jăp da dê. Gâp tât ta aơ ƀư săm ƀŭt neh ntu, lôch nĕ ăp nău kan geh tât phung chroh, uănh nsum lah nău tâm kơl kan dŭt âk, gâp saơ lah ueh ngăn.

Bâh ntơm geh mbơh ƀư nău kan tât aƀaơ, n’gâng kan ta xã Hàm Tân lĕ geh dơn rlău 320 nău tâm rgop rdâk njêng n’gâng kan n’hanh doh rklaih sŏng dăng tât âk nău kŏ văk bâh ƀon lan ta trong ƀư tĭng ăp ntil trong kan hành chính.

Mô dơn ta Hàm Tân, ôi nar prăm ăp pơh bâh khay 7 mhe nơh, phường Phú Thuỷ lĕ geh rơh bôk năp mbơh nău kan “Cà phê ôi đah nuĭh leo kan phường đah ƀon lan”. Nău kan geh âk nău mât kơl bâh âk ntŭk rêh jêng.

N’gâng kan phường Phú Thuỷ an gĭt nău kan nchrăp geh leo ƀư “Cà phê ôi” ăp khay du tơ̆, tâm pleh ƀư ta 12 rmôt dân phố ta ntŭk. Wa Nguyễn Thị Minh Ngọc, Kruanh Uỷ ban MTTQ Việt Nam phường Phú Thuỷ lah na nê̆, nkô̆ ŭch bâh nău kan lah geh ƀư răng dăng gay ma trong kan “dăch ƀon lan, dăch ntŭk kan ba dâng” geh ƀư.  "Đah ăp nkô̆ nău mbra dơi geh tâm mbơh kan n’hanh doh rklaih dâl rĭ nuĭh leo kan lĕ geh ntĭm đă ăp ntŭk kan n’gâng kan way kan pă sŏng dăng tâm ngơi ta rơh aơ. Hôm đah ăp nău an geh mĭn uănh săm ƀŭt rhŏ kan rĭ rnâng kan way kan bât mặt trận rgum tay n’hanh ndơ mbơh ăp nkô̆ nău geh tât ntŭk dơi kan doh rklaih bâh ăp ntŭk kan n’gâng kan way kan gay ma rgum lĕ n’hanh ntĭm đă doh rklaih ngăch ndăn an ƀon lan”.

Đah nău mĭn sŏk nău ŭch rŏng bâh ƀon lan n’hanh doanh nghiệp ƀư mâng veh dôl geh trĕ lam dŭt ngăch. Ăp ôi ngêt cà phê, mô lah ăp rơh djăt ƀon lan ngơi dôl ntop bun dăp tay nău knơm, rdâk njêng du n’gâng kan hành chính sŏk nău tâm di ŭch bâh ƀon lan ƀư ndơ veh kơp.