Mpôl hăn ôp uănh lĕ pah kan ta ƀon Kli A (phường Buôn Hồ), ƀon Tuôr (xã Hòa Phú), ƀon Tơng Jú (xã Ea Kao) n'hanh ƀon Akŏ Dhông (phường Buôn Ma Thuột). Bâh nău uănh nđôi an saơ, lôch geh ngih dak kơl an, âk rnăk ƀon lan lĕ nchrăp ndơ dŏng, pơk hvi nău ntuh kơl, njêng ăp nău kan rlong gĭt đah văn hóa way ơm, nău kan way ơm n'hanh pah kan tuch tăm, ăp njoat njêng nău rêh an ƀon lan ta ntŭk.

Ăp ntŭk kŏ đă lŏ ƀư jêh nau kan tĭng trong n'hao nau ntĭm nti, kơl an nau nkoch mbơh, ndâk njêng ndơ geh ƀư ueh, n'hao nau blau ƀư nau kan pâl n'aih, nau ngơi dak ba dih ndrel ntrŭt dăng nau tâm rgop đah ăp rnăk ƀon lan râng nau kan pâl n'aih nsum mpôl. Wa Y Kle Knul, groi kruanh jrâu kan văn hoá xã Hoà Phú mbơh nau:  “An geh mât uănh tay nău kơl an rnoh mât rbăy ngih jong way ơm, nău kan cheh tanh, ntŭk văn hóa chĭng gong, ăp nău way ơm n'hanh rdâk njêng ndơ nsoh way ơm geh nău ueh êng văn hóa ta ntŭk. N'hao nău kan mbơh tơih, mbơh tơih, rdâk njêng tour tâm rgop Buôn Tuôr đah ăp ntŭk pâl nđaih ta n'gor gay ma pơk hvi ntŭk tăch rgâl năch n'hanh n'hao nău geh dŏng ăp ntil ndơ pâl nđaih nsum mpôl".

Tĭng wa Đỗ Thị Như Tình, Kruanh ban Dân tộc HĐND n'gor Dak Lak, pâl nđaih nsum mpôl kanŭng dơi hun hao nâp nâl rnôk nuĭh ƀon lan ngăn ngên lah nuĭh tơm râng, ndrel geh nău dơi bah nău kan pâl nđaih. Nău dŏng di trong ăp rnoh khlay văn hóa way ơm mô dơn rgop mât ndray drăp ndơ ơm yău ntlơi an tay ma hôm njêng suan wăch rgum, n'hao rnoh khlay ăp ntŭk tât bah Dak Lak. Lôch jêh ôp uănh mbra lah ntŭk nsing khlay gay nhih pah kan dơi kan uănh năl săk rnglăy trong kơl aƀaơ n'hanh dăn đă trong nkra tâm di tâm rơh mhe. “Mpôl hăn ôp uănh kơp dơn ăp nău mbơh na nê̆ tâm rnôk mbơh ƀư tĭng nghị quyết n'hanh ăp nău kơl ta ntŭk. Ta meng nĕ ri mbra mĭn uănh dăn đă mbơh ƀư du nghị quyết mhe mpeh hun hao pâl nđaih ntŭk gŭ rêh hăn ndrel đah mât ndrăy n'hanh mpư n'hao săk tơm văn hóa tâm rơh mhe ri mbra nsĭt tay săk rnglăy lơn".”./.