Rnoh hvi mhe bah lễ hội pơk luh ntŭk têh hvi lơn gay Dak Lak nkoch n'hơ n'gâng kan sầu riêng, buăt nthoi nkra njêng đah ntŭk tăch rgâl, nkre nkoch ăp nău khlay văn hóa, pâl nđaih bah nkual yôk prêh n'hanh duyên hải. Lah ta rnôk ntơm pơk, wa Đỗ Hữu Huy, Kruanh UBND n'gor Dak Lak an gĭt, lam n'gor aƀaơ geh bơi 41.000 ha sầu riêng, rnoh âk yan năm 2026 nchrăp nklăp 500.000 tấn, êng năm 2025 rnoh khlay tăch n'gluh rlău 1.1 rmen USD. Bah meng nău dơh uĕh dja, Dak Lak ntrŏng ân n'hao rnoh khlay n'gâng kan đah trong rƀŏng nkre đah tuch tăm đah n'hao săk kah, joi tu tơm, nkret njêng jru, logistics n'hanh ntŭk tăch. "Mpôl hên mĭn lah ân rgâl dăng bah nău mĭn mât uănh rnoh âk geh ndơ tuch tăm jêng mât uănh rnoh khlay ndơ tuch tăm; mô dơn mât uănh nkra njêng dơi moh rnoh âk, ma ân mât uănh ăp héc-ta njêng luh moh rnoh khlay, nuĭh ƀon lan dơi geh moh rnoh khlay, doanh nghiệp râng dơi moh rnoh tâm rgop n'hanh săk ntơ lư Dak Lak dơi mĭn kơt nê̆ ta ntŭk tăch rgâl lam ntŭr neh."

Nuih n'hâm n'hao rnoh khlay n'gâng kan ndơ geh ƀư dơi mpơl ma trong leo ƀư bah Lễ hội sầu riêng Dak Lak 2026. Bah meng nău tâm nchră buăt nthoi nkra njêng, tăch rgâl sầu riêng n'hanh ntŭk mpla nsơ n'gâng kan, lễ hội geh ăp nău ƀư ntrŭt ngăch tăch rgâl, tâm rlong n'hanh tăch rgâl sầu riêng ta mir, hăn uănh pâl jay mir, lễ hội ndơ ngêt sa đah 102 ndơ sa tâm rgop sầu riêng.Ta rơh ntơm pơk, Dak Lak hôm dơi an 2 Kỷ lục Việt Nam geh "Ntrong ƀư ndơ sầu riêng têh ngăn Việt Nam" n'hanh "Nău ƀư nkret njêng n'hanh công diễn ăp ndơ sa bah sầu riêng đah rnoh âk ngăn Việt Nam". Ăp nău kan aơ an saơ lễ hội dôl dơi pơk hvi bah mpla nsơ ndơ tuch tăm tât buăt nthoi tăch rgâl, văn hóa n'hanh pâl nđaih. Đah ăp nuĭh ƀon lan Dak Lak, nău lor bôk năp ƀư lễ hội ta rnoh têh gưl n'gor lah rnôk gay sầu riêng dơi gĭt tât lam hvi lơn, pơk tay ntŭk tăch rgâl n'hanh njêng suan ntrôl hun hao n'gâng kan. Wa Bùi Văn Duy, phường Buôn Ma Thuột nkoch:  "Năch bah ăp ntŭk tât âk n'hanh nuih n'hâm bah kônh wa dŭt lah rhơn nđơr wơt lễ hội nar aơ. Sầu riêng dja dôl geh nău uănh khlay mô dơn ta Việt Nam ma ăp dak ta wăr he đŏng, jêng ân geh trong gay hun hao dŭt têh gay rdâk njêng wăng sa nar lơn ma hao."

Tâm nđur play Sầu riêng Dak Lak năm 2026 yor kơt nê̆ mô dơn lah du nău ƀư mbơh n'hơ ndơ geh ƀư, ma dơi mpŏng jêng ntơm bôk năp gay ma ntŭk kan n'hao nău kan, pơk hvi nău tâm rgop n'hanh ăp nhoat njêng du lễ hội geh nău trĕ lam têh hvi lơn tâm ăp năm tât.