Container cà phê tăch n'gluh rơh aơ geh rlău 3.4 tấn cà phê kah khlay, đah rnoh khlay rnoh nklăp 120.000 Đô la Mỹ, lah ndơ bah Công ty Trách nhiệm hữu hạn Aeroco Coffee. Aơ lah ntŭk ntoh lư tâm rnôk tăch rgâl Fine Robusta, rgâl bah rơh mbơh, uănh năl uĕh kah ndơ tât hun hao nău tâm nchră tăch rgâl ta Hoa Kỳ - ngoay tâm ăp ntŭk tăch cà phê têh n'hanh geh rnoh tâm rlong âk ta lam ntur neh.

Wa Nguyễn Tấn Vinh, nuĭh rnâng kan cà phê kah uĕh uănh lah, cà phê kah uĕh ta Dak Lak lĕ geh nhoat hun hao dŭt âk. Ntoh lư lah Rơh tâm rlong Cà phê kah khlay Việt Nam - Amazing Cup, bah rlău 50 ntil ndơ tâm rlong tâm ăp năm bôk năp ƀư năm 2019, tât aƀaơ lĕ hao rlău 200 ntil. Ăp ntŭk ƀư nau kan lĕ râng jru lơn tâm nău kan aơ n'hanh tĭng kơn ndơ̆ cà phê kah khlay luh ntŭk tăch lam ntŭr neh. Tĭng wa Vinh, Dak Lak geh âk nău dơh nơih gay ma n'hao nău khlăy n'gâng kan cà phê: "Ăp nău dơi gay hun hao cà phê kah khlay ta Dak Lak hŏ geh bah ơm, nê lah săk ntơ lư bah Buôn Ma Thuột. Tal bar lah ta Dak Lak geh viện mĭn njêng mpeh cà phê Robusta. Tal 3 lah neh ntu tâm ban kơt nau way tuch tăm đŏng nau vay ơm bah nuĭh ƀon lan. Ăp nău dơh gay hun hao n'gâng kan cà phê kah khlay hŏ dơi rgum tŏng ăp. Khlay ngăn lah aƀaơ Dak Lak mbra nkoch trêng, rƀŏng trong n'hanh geh nău mât uănh ngih dak mhâm ƀư gay n'gâng kan hŏ hun hao dăng n'hanh rjăp lơn."

 Ta rơh tăch n'gluh cà phê kah khlay tĭng trong me tât Hoa Kỳ, wa Đỗ Đức Hà, Kruanh UBND phường Ea Kao, mpŏng trong leo ƀư nkra njêng, nkret njêng cà phê kah mra ƀư dơi ân ntŭk kan tâm boh nsum, ntŭk kan gŭ mĭn, kơt nti, pơk hvi, nta joi nău kan n'hanh n'hao nău geh an nuĭh tăm cà phê.

Phường Ea Kao dơi năl lah ngoăy tâm ăp ntŭk tât pâl n’aih bah n'gor Dak Lak, yor nê nkuăl rƀŏng trong tâm rgop ăp ntŭk tuch tăm cà phê đah nau kan pâl n'aih, rgop ntŭk nkoch mbơh rup gui cà phê Dak Lak tât năch pâl n’aih n'hanh băl mpôl dak bah dih:"Mpôl hên mpŏng ŭch nău ntơ cà phê Aeroco lah êng n'hanh ăp ndơ cà phê êng bah Ea Kao lah nsum mra hăn ndrel đah ăp nău kan nkra njêng nău tăch cà phê bah n'gor Dak Lak dăch tât gay rgop mpla n'hơ rup ndah cà phê bah Dak Lak tât ntŭk tăch rgâl dak bah dih”./.