Nkhêp nkah ndray 95 năm Nar njêng Đoàn Druh ndăm Cộng sản Hồ Chí Minh, druh ndăm ăp rnoi nuĭh Tây Nguyên hŏ n’hanh dôl ntik n’hao suan dăng nuih n’hâm chŏl lor, dâk hăn kơl êng ma âk nău kan ngăn ngăn, rƀŏng sĭt tât tâm dâng, lơn lah nkual n’har bri, rgop ring lam dơn kan, nđơr n’groh an nsum mpôl n’hanh neh dak.

Ta xã n’har bri Ia Pnôn (n’gor Gia Lai), Ban Chỉ huy Tahen n’har bri n’gor ƀư bôk nău kan “Khay Pe druh ndăm – Khay pe n’har bri” đah âk nkô̆ hôr khlay kơt kơl an n’gâng ŭnh mpoh ang, leo ƀư ntŭk pâl uĕh an kon se nti. Ntŭk rgum tơm lah rơh tâm rlong “Rung chuông vàng” đah 20 nău ôp, kơl kon se nti Nhih nti Tiểu học n’hanh THCS Lương Thế Vinh wât kloh lơn mpeh n’har bri neh dak, Luật n’har bri Việt Nam tâm ban kơt nău khlay bah mpôl Tahen n’har bri. Bah nê, rgop n’hao nău gĭt êng pháp luật, kơi năp nti nuih n’hâm rŏng dak n’hanh nău gĭt dơn êng nău kan mât njrăng ƀư tơm neh dak ntơm bah rnôk hôm gŭ ta nsưng nhih nti. Tâm trôm bôk nău kan, pôih hôm kơl an kônh wa ƀon Triêl du ntŭk ƀư “N’gâng ŭnh mpoh ang nkual n’har bri đŏng” rnoh khlay rlău 75 rkeh prăk, ndrel 50 nklâm ndơ an kon se nti geh nău rêh jêr jŏt. Oh Rơ Lan H’Hương, kon se nti jrô 9, Nhih nti Tiểu học n’hanh THCS Lương Thế Vinh nkoch:  

“Gâp dŭt rhơn yor dơi râng bôk nău kan khay Pe druh ndăm- Khay pe n’har bri” n’hanh dơi joi gĭt mpeh n’har bri neh dak n’hanh Luật Biên phòng Việt Nam. Gâp mbra nsrôih kơt nti ân dŭt jăp gay mpơl nuih n’hâm rŏng dak bah rơh kơn mpôl hên”.

Ndrel đah nê, ta Dak Lak, Tahen n’har bri n’gor ƀư Tâm nchră đah nkô̆ “Druh ndăm tahen n’har bri n’gor Dak Lak nâp nuih n’hâm nsing nơm Đảng”, nkre đah mpư rnê ăp druh ndăm ntoh lư, mpŏng hun hao năm 2025. Ta rơh lễ, cán bộ, đoàn viên druh ndăm n’hơr an kao ta Ndah rup Wa Hồ đah Tahen n’har bri, mpơl nuih n’hâm nkah gĭt Kruanh Hồ Chí Minh, nkre lah rjăp nău nsrôih kơt nti tay, ƀư tĭng nău mĭn, nuih n’hâm uĕh lŏng, trong gŭ rêh bah Wa, ntik n’hao nău way ơm mpôl tahen. Ta rơh tâm nchră, ăp đại biểu hŏ tâm ôp nău tă ơm gĭt kan, trong ƀư uĕh, lah rjăp tay nău khlay chŏl lor, ƀư blău mhe druh ndăm tâm mât njrăng ƀư tơm n’har bri. Nkhêp geh rnôk dja, pôih mpư rnê 10 “Nuĭh ntoh lư”, 7 “Druh ndăm mpŏng hun hao” năm 2025, nkre nkhôm rnê 1 mpôl n’hanh 2 nuĭh geh nău dơi dŭt ngăch prăl. Đại tá Đỗ Quang Thấm, Chính ủy Ban Chỉ huy Tahen n’har bri n’gor Dak Lak lah rjăp:

“Nô nău dơn kan mât njrăng ƀư tơm neh dak rnă njrăng n’har bri neh dak ăp cán bộ, tahen, lơn lah mpôl đoàn viên, druh ndăm, ân nsrôih tiăr nti tay an têh jêng lơn đŏng. Dăn đă gưl ủy mât bôk pôih rđău đă tay nta trong dơh gay đoàn viên n’hanh ăp mpôl kan đoàn hun hao dăng jêng ntŭk gŭ rêh khlay gay ntĭm nti tiăr nti n’hanh kơi năp nti rơh mom ndăm bah pôih n’har bri đŏng."

Aƀaơ Mpôl druh ndăm Tahen n’har bri n’gor Dak Lak geh 19 mpôl kan đoàn. Druh ndăm ăp pôih nsrôih kan nsum đah n’gâng kan ta ntŭk tĭng ƀư ăp trong kơl ăp tŏng geh nău rêh, rdâk njêng ƀon lan mhe, ntop kơl ƀon lan nkual n’har bri ma ăp trong ntĭt leo kơt “Ndơl jâng oh tât nhih nti – Kon mât Pôih n’har bri”, “Nai ntĭm grat ư̆r”, “ATM dak kloh rsang n’har bri”, “Ŭnh chrat ang nkual n’har bri”…

Nkhêp geh rnôk dja, Tỉnh đoàn Dak Lak hŏ ƀư Lễ nkah ndray 95 năm Nar njêng Đoàn druh ndăm Cộng sản Hồ Chí Minh đah bôk moh “Druh ndăm ăp rnoi mpôl đê̆ Dak Lak – Nđơr nsan hao ndrel neh dak”, nkre nkhôm rnê 56 nuĭh ntoh lư lvang năm 2020 - 2025. Ntơh măt ăp rơh kơn cán bộ Đoàn n’hanh kon se jê̆ râng tâm nđŭr đah nkô̆ “Druh ndăm ăp rnoi nuĭh Dak Lak- nđơr nsan hao ndrel neh dak”, rgop rêng lam nuih n’hâm nđơn tay nău way ơm, rdâk tay nău dơn kan n’hanh nău nđơr n’groh an. Nkhêp geh rnôk dja, Ban Thường vụ Tỉnh đoàn nkhôm rnê 56 mpôl, ăp nuĭh ntoh lư; ndơ̆ ndơ Nkhôm rnê Lý Tự Trọng năm 2026 an yuh Lê Hiếu Vy, Bí thư Đoàn Nhih nti THPT Ngô Gia Tự. Nô Lương Minh Tùng, Bí thư Tỉnh đoàn Dak Lak lah rjăp:

“Aơ lah rnôk sinh hoạt chính trị khlay bah mpôl kan Đoàn, gay ăp băl druh ndăm rchong, kon se jê̆ kơt tĭng yuh nô hăn dâk leo lor bôk năp, tĭng ƀư jăp nău dơn kan bah he, nsrôih dơi n’glăp tâm Đoàn; nkre rdâk nâp dăng mpôl kan Đoàn, râng rdâk njêng Đảng, n’gâng kan nar lơn ma nâp dăng.”

Ăp nău kan khuh n’gôr, ngăn ngăn tâm Khay druh ndăm năm aơ mô dơn gay mpơl kloh nău khlay chŏl lor, hăn kơl êng bah druh ndăm ăp rnoi nuĭh Tây Nguyên, ma hôm rgop bun dăp nău mĭn cách mạng, hŭr nuih n’hâm rŏng dak, nău dơn kan đah nsum mpôl, nsum ti rdâk njêng n’hanh mât njrăng nâp ƀư tơm n’har bri neh dak tâm nô nău mhe.