Ndrel đah lam dak, ăp n’gor Tây Nguyên dôl lăp tâm du rơh rgâl n’har mô hŏ tă geh: glêh tam nuĭh kan, n’glăp n’gor, plơ̆ tâm n’guăk tay n’har neh n’hanh nuĭh kan. Ta nkual neh bri dak têh hvi mpeh nhâp nar neh dak – aƀaơ, nău dơn kan ndơ̆ luh đah ăp n’gor mô dơn lah dăp rgum tay nuĭh kan, njêng jâng nsing mât bôk kan geh nău tam, ma hôm lah dăp rgum tay nău rêh, rnăk wâl, nău kan let năp tay bah hang rbăn cán bộ. Hăn rlău yôk, chuah dak ngai rhiăng kilômét tât ntŭk pah kan mhe, mbra lah maih rlong ma ŭnh, ntul rlong nău dơi blău, han săk bah nuĭh cán bộ ndrel lam n’gâng kan, nsum mpôl ngăn. Rmôt phóng viên Radio nău ngơi Việt Nam ta nkual Tây Nguyên ƀư du rut nău nchih “Trong ƀư glêh tam nuĭh kan, maih rlong ma ŭnh, krit jêr rlong cán bộ.

Nău nchih bôk năp pơk nar aơ geh bôk moh “Ăp nuĭh gŭ chăm bah kơi rhot hăn rlău bah năp”, nchih nkoch nău nsrôih bah hang rbăn bu ur cán bộ, công chức, viên chức ta Tây Nguyên, dôl nsrôih gân tâm ban lĕ ma nău kan ngih dak, nău kan rnăk wâl, tâm du njăr trong hăn pah kan ta nklang ntŭk nhih pah kan mhe – ngai hang rhiăng kilômét.

Yuh Chu Thị Bắc - chuyên viên Jrô kan mât uănh ntĭm nti Tiểu học n’hanh Mầm non, Sở Giáo dục n’hanh Đào tạo n’gor Gia Lai, lah ngoăy tâm hang rbăn cán bộ, viên chức mpeh săk nuĭh ntrơn hăn pah kan bah nkual ƀon têh Pleiku jŭt nkual ƀon têh Quy Nhơn, n’gor Bình Định tĭng trong n’glăp n’gor. Yuh Bắc an gĭt, trong hăn pah kan mhe ngai rlău 160km, sop prêh 800m dơn lah du gâl ntul rlong ma he mbra hăn rlău dơm. Nău manh jay gŭ ta nkual ƀon têh têh, nău nti ren bah oh kon lah nău jêr nkra ma yuh ndrel sai păng dôl joi trong rblang ơh, gay đăp mpăn wat jêh uĕh nău dơn  kan:

“Prăk khay dah nê dơm ma rnoh khlay gŭ rêh n’hanh nhih jay đŏng ri nklăp jêr ngăn. Yor nău kan ri he ân hăn dơm. Hôm nău rvăt neh ƀư jay, mô lah gŭ jŏ jong ri ân hôm nsing tâm nău geh wăng sa đŏng. Rnoh khlay neh ta nkual ƀon têh Quy Nhơn kơt Cát Tiến, Nhơn Hội aƀaơ hŏ hao âk rlău bar tơ̆ hôm”.

Tâm nuih n’hâm nchrăp lor đŏng, yuh Nguyễn Mộng Thường - cán bộ Prăk nkrem mât njrăng n’hanh hun hao bri n’gor Gia Lai dôl ndăn dăp rgum nău kan tâm rnăk wâl gay dơn nău đă rgum hăn kan đŏng. Yuh nchrăp njuăl kon an rnăk u che mpeh bơ̆ mât chăm gay dăp rgum dơi nău rêh ta ntŭk pah kan mhe, lôch nê mbra ƀư siƀŭt rgâl nhih nti n’hanh wơt kon hăn tĭng nkre.

“Me du ntŭk, kon du ntŭk ri ri học kỳ bôk năp ân kon gŭ ta nkual ƀon têh Pleiku n’hanh u păng. Ta aơ nsĭt geh wăng sa đêt, yơn gâp nha hôm mpêt nkrem gay an hăn nti tay đŏng. Aƀaơ jŭr ta nkual ƀon têh Quy Nhơn manh jay, âk nkô̆ nău prăk kaih êt chăp ri nklăp mô geh rmeh, pah pât âk. Nklăp gâp ân đă rnăk wâl, kônh wa du mông nar bôk năp mơ”.

Ta ăp n’gor Gia Lai, Kon Tum, âk cán bộ bu ur êng ƀa ƀă, ăp nuĭh du nău rêh, dôl nsrôih dăp rgum rnăk wâl da dê, tŏng di đah nău ŭch geh dơn kan. Khân păng ntrŏng kloh nuih n’hâm nchrăp hăn yor ma nău kan, nchrăp ăp dăp tĭng njuat ngoăy. Kơt yuh Hà Thị Hạnh – Groi kruanh Jrô kan Tổ chức - Hành chính, Sở Giáo dục n’hanh Đào tạo n’gor Kon Tum, hŏ ntrŏng njuăl kon an u che mpeh bơ̆:

“Ăp kon mbơh lah mpôl hên mbra gŭ tay ta Kon Tum nti yor hŏ bên nhih nti hôm, bên jrô nti, bên ntŭk gŭ rêh hôm. Gâp saơ aơ lah ntul rlong dŭt têh đah săk gâp nơm. Nău mô dơi leo ăp kon hăn, mô dơi dăch dêh mât chăm ăp oh kon”.

Tâm ban kơt yuh Thái Thị Hoàn, Groi kruanh Ban Phong trào, Tỉnh Đoàn Kon Tum ri jêr jŏt âk lơn. Sai hăn kan ta Lào, mô geh nuĭh gay đă nơm, yuh hŏ ơm nchroh năl na nê̆ mô kâp “dak tât jâng mơ dĭng nsăt”:

“Săk gâp nơm mĭn lah mbra manh jay trọ lôch nê leo ăp kon jŭr ơm gay  ăp kon tât dơi đah ntŭk gŭ rêh ta du ntŭk mhe. Rlău ma nê ăp kon klach lah mô wât dơi nău nai ntĭm nti. Aƀaơ gĭt lah pơk mbrô ƀoh rup bah Quảng Ngãi gay djăt an way bên nău ngơi đŏng”.

Ta ăp n’gor n’glăp nsum, geh hang rhiăng bu ur cán bộ kơt yuh Bắc, yuh Thường, yuh Hạnh, yuh Hoàn đŏng... Khân păng dôl mbrôn suan trong joi luh an pah kan n’hanh nău rêh, kơt nuĭh hăn, nuĭh gŭ tay; moh kon I tĭng me n’hanh moh kon I njuăl gŭ tay an kônh wa bah kơi. Tât ntŭk pah kan mhe, mbra ntŭk hăn joi jay trọ, dăn nti an kon ta ah nhih nti…

Nkoch nău rvê đah cán bộ bah he, âk n’gâng kan hŏ dăn đă n’hanh rdâk njêng trong ntop kơl na nê̆, kơt ntop kơl prăk manh gŭ, ntop kơl prăk rsong hăn, ntop kơl manh jay gŭ tâm 3 năm bôk năp... Wa Phạm Thị Trung - Giám đốc Sở Giáo dục n’hanh Đào tạo n’gor Kon Tum, an gĭt:

“Sở Giáo dục n’hanh Đào tạo lor nchrăp nchih rgum nău ŭch geh nklăp 600 kon se nti geh cán bộ công chức, viên chức ŭch tĭng me bơ̆ sĭt nti ta n’gor Quảng Ngãi. Sở hŏ njuăl nău lư tât Sở Giáo dục n’hanh Đào tạo n’gor Quảng Ngãi tâm ban kơt nău mbơh UBND n’gor n’hanh Ban Thường vụ Tỉnh uỷ gay rhŏ dŏng tâm ăp rơh pah kan, đăp mpăn ăp nău geh an cán bộ công chức mô rvê tâm rnôk leo ƀư n’glăp nsum”.

Dơn hôm rlău 1 khay tay đŏng, ăp n’gor mbra n’glăp tĭng Đề án hŏ dơi uănh an dŏng. Maih rlong ma ŭnh, krit jêr rlong cán bộ dôl mpơl dŭt khuh n’gôr ta ăp n’gor Tây Nguyên. Đah ăp bu ur dôl tui mbăk bar ding mblik – nău kan ngih dak, nău kan rnăk wâl, khân păng dôl nsrôih rlău dơi ntul rlong, nchrăp ăp dăp gay ƀư wat jêh nău dơn kan tâm ăp rnôk krit jêr. Bu ur cán bộ, ăp nuĭh gŭ chăm bah kơi ta ăp rnăk wâl, dôl mbrơi hăn rhot rlău bôk năp, kơl suan an rơh ƀư dơh glêh nuĭh kan ta n’gor he nơm.