Tĭng trong leo ƀư jut jăng jay truh sat, nkưp nde bah Chính phủ, Bộ Công an hŏ kuăl jă ăp ntŭk rgop, ntop kơl n’gor Dak Nông mon 500 mblâm jay đah lĕ rngôch tơm prăk dŏng ƀư rlău 30 rmen prăk. Aƀaơ lĕ rngôch 500 mblâm jay hŏ dơi ntơm rdâk ƀư n’hanh rlău 100 mblâm jay hŏ ƀư wat jêh. Đah nuih n’hâm “Mơ̆ mih găng nar” dôl dơi Công an Dak Nông mpơl dŭt kloh, n’gluh nău ŭch tât mbra ƀư wat jêh lĕ rngôch rnoh jay ndơ̆ jao an ăp rnăk dŏng tâm khay 6 dja.  

Mih ndal ta nkual n’har bri Dak Nông mhe sưt bah, ăp oh nô Công an xã Quảng Trực, nkuâl Tuy Đức luh hăn tay ndrel mpôl mon jay, ntop kơl du rnăk ta ƀon Bu Prăng 1A. Thiếu tá Nguyễn Văn Dũng, Groi kruanh Công an xã Quảng Trực, an gĭt gay đăp mpăn rnoh ngăch, nâp uĕh bah ăp mblâm jay ntop kơl nuĭh ƀon  lan, nkre mât dơi tĭng ƀư nău dơn kan mât rnă njrăng  đăp mpăn ta ntŭk, lĕ rngôch 31 cán bộ, tahen bah đơn vị hŏ tâm pleh dơn mât uănh nău kan ta ntŭk mon jay.

“Công an xã hŏ tâm pă nău kan an tĭng ăp rmôt mon jay tĭng ƀon, thôn geh ăp rnăk ach  o, dăch kêng ach o dơi geh dŏng bôk nău kan jut jăng jay truh sat. Oh  nô mpôl hên grêt dăch tĭng rnoh tât ƀư "3 nâp" lah: Mpir nâp, jâng jay nâp n’hanh chor nâp mô geh truh mih. Mpeh rnoh ngăch, tâm pă mpôl kan grêt tĭng ăp rmôt, ăp mpôl rdâk mon jay đă khân păng mon ƀư di kỹ thuật.”

Yuh Thị Thướt, 36 năm deh, nuĭh Bu Nong ta ƀon Bu Prăng 1A, lah me rêh ni mât bar mblâm kon jê̆. Sai roh ơm tă bah nău ji jru, du hê yuh mbăk anh nău kan rnăk wâl đah bar sào cà phê n’hanh nău kan thuê rgoh n’gơ. 3 me kon gŭ nde tâm jay đar ƀơch rgơm bah u che, hvi mô hŏ tât 20 m², mpir rmŭ ôm, chor tôn chai găm. Mhe aơ,  Thướt lah ngoăy tâm bơi jât rnăk ta ƀon dơi ntop kơl mon jay. Yuh Thươt nkoch, dơi ntop kơl ƀư jay, me kon yuh dŭt geh nău lap.

“Sai gâp roh năm 2023, du hê ân rvê 2 hê kon, nău rêh jêr jŏt ngăn, lah rnăk dŭt ach  o ta ƀon. Dơi mpeh Công an ntop kơl mon jay 3 me kon rhơn ngăn. Tât lăp jay mhe tay mô hôm rvê truh mih, sial mpruh tâm khay  mih, n’huk, duh tâm khay wai đŏng ôh. Aƀaơ he dơn rvê ƀư mir dơm, hăn kan mât ăp oh kon dơm. Lah uĕh Bộ Công an, ăp gưl, ăp n’gâng kan.”

Tĭng nar rgŏ jă bah Chính phủ mpeh jut jăng jay truh sat, nkưp nde an rnăk ach o, dăch kêng ach o n’hanh rnăk dơi kơl, rnoi mpôl đê̆, ntơm bah năm 2024 tât aƀaơ, Bộ Công an hŏ rgop, rgŏ jă mon hang rbăn mblâm jay ta ăp n’gor Tây Nguyên.

Êng ta Dak Nông, năm 2025 geh 500 mblâm jay dơi tâm pă prăk ƀư bơi 30 rmen prăk, jao Công an n’gor ƀư. Lôch dơn prăk ƀư, Công an Dak Nông njêng 5 rmôt pah kan tă bah Ban Giám đốc mât uănh na nê̆, rgŏ jă trong leo tâm rlong 56 nar măng 12/5 - 30/6 wat jêh.

Tĭng Công an n’gor Dak Nông, bol rnôk an ƀư dôl tâm rnôk khay mih, rdôl mpeh rdâk njêng jêng nău joi nuĭh blău mon jay dŭt jêr jŏt ngăn đŏng, rnoh khlay lŭ loih choih xi măng, lơn lah choih mon jay hao khlay n’hanh mpêt ndrôm... Yơn đah nău rđău đă lĕ n’hâm suan bah Đảng ủy, kruanh rđău kan Công an n’gor, bah Rmôt pah kan, nău lăp kan lĕ n’hâm suan bah lam trong kan chính trị ndrel đah nău nsrôih chính trị dŭt âk bah mpôl Công an lam n’gor, tâm nê geh nău khlay n’gâng tơm Công an gưl xã, lôch nklăp 3 pơh an ƀư, lĕ rngôch 500 mblâm jay hŏ dơi ntơm rdâk ƀư, rlău 100 mblâm jay wat jêh, geh tât rlău 30% rnoh âk nău kan.  Đại tá Trần Văn Dũng, Groi Giám đốc Công an n’gor Dak Nông, nkoch âk trong ƀư gay rlău ăp mpêr n’gar nking kol tâm rnôk tĭng ƀư; đơn vị nha hôm nsrôih ƀư wat jêh bah năp nar 20/6 dja, rlău rnoh ngăch 10 nar.

“Nô nău mpêt ndrôm choih, mpôl hên hŏ jao rmôt way kan, công an ăp xã, rgŏ jă ntŭk tăch têh, ăp ntŭk tơm rhôp choih ntop kơl mô kơp deh prăk kon. Khân păng wât n’hanh ŭch  dơn, yor aơ lah trong ntop kơl nuĭh ach o geh kơl. Ban Giám đốc dŭt nsrôih lĕ n’hâm suan rgum lĕ rngôch công an ăp xã; nsŏng kơl tât UBND ăp xã rgum nuĭh tâm rnăk wâl, ăp mpôl kan ndrel râng ntop kơl mon jay an ăp rnăk dơi kơl. Ntĭt kơt, rnôk khân păng mô tŏng nuĭh rơih jay ơm, mpôl hên rgum oh nô tât tung nchuăn; mô tŏng geh nuĭh mon jay, mpôl hên sơch cán bộ tahen gĭt kan râng ntop kơl đŏng.”

Ăp mblâm jay nâp uĕh dôl mbrơi hon luh nklang khay mih Tây Nguyên mô dơn lah ntŭk gŭ nde đăp mpăn an ăp rnăk ach o, ma hôm lah ndơ an saơ nău rêh uĕh an nuih n’hâm “Yor ƀon lan rhŏ dŏng” bah mpôl Công an. Ntơm bah trong nchrăp têh bah Chính phủ tât hăn dâk kan na nê̆, ngăn ngăn bah Bộ Công an n’hanh Công an n’gor Dak Nông, bôk nău  kan jut jăng jay truh sat, nkưp nde hŏ ring lam ngăn n’hâm duh răm bah nău tâm rŏng kon nuĭh, mpoh ang nău nsing nơm tâm du nău rêh let năp tay đăp mpăn n’hanh dŭt uĕh  lăng an kônh wa ntŭk nkual jru, nkual ngai n’har bri. Ăp mblâm gạch, ăp chor jay mô dơn rdâk ƀư ma klo đŏng ôh, ma hôm đah nău tâm rŏng, nău dơn kan n’hanh nău nsrôih ndrel hăn ƀon lan ta njăr trong hăn n’hŭch ach o, đăp mpăn nău rêh, nău kan.