Ntơm bah nar 1/7, lĕ rngôch 135 ntŭk rgum kan gưl xã, phường ta n’gor Gia Lai (mhe) ntơm lăp dŏng kan ngăn. Aơ lah njuat an ƀư ăp kôp trong leo ƀư n’gâng kan bar gưl, rƀŏng tât rhŏ dŏng an nuĭh ƀon lan geh nău dơi lơn. Ăp n’gâng kan n’gor Gia Lai hŏ đă cán bộ way rnâng kan sĭt ntop kơl ƀư siƀŭt neh ntu ta ăp xã, phường ntơm bah 2/7 tât 30/8.

Cán bộ mbra pah kan tay ta ntŭk rgum gay ntĭm nti công chức n’hanh nuĭh ƀon lan tĭng ƀư di rêng, nkre rblang quy định pháp luật mhe. N’gor dŏng công nghệ gay groi nđôi lam lĕ rngôch nău kan tâm dâng đŏng. Bah năp nê, ntơm bah nar 20 tât 25/6, lĕ rngôch 135 ntŭk rgum kan hŏ dơi rlong n’glăp dŏng lor. Lôch jêh rlong dŏng an saơ lam trong kan đăp mpăn, nkra hang rhiăng hồ sơ ma mô geh ntoh kol bêng mô lah mbrơi nkai.