Lơ 5/11, ta Hà Nội, UBND n’gor Lâm Đồng tâm rgop đah N’gâng kan Văn hóa Thể thao-Pâl nđaih ƀư Rƀŭn mbơh Festival Nkao Đà Lạt rơh tal 10 năm 2024. Đah bôk nău “Nkao Đà Lạt-Bản giao hưởng sắc màu”, Festival Nkao Đà Lạt rơh tal 10 ƀư bah lơ 5 tât 31/12. Festival Nkao Đà Lạt rơh aơ geh âk nău ƀư êng lơn nkôp đah 9 rơh ƀư bah năp đah têh hvi; lam hvi ta n’gor; âk nău ƀư geh ƀa ƀơ tâm năm n’hanh bôk nău kan khlay dơi ƀư tâm khay 12/2024; nkô̆ nău rgâl mhe; âk nău ƀư văn hóa, nghệ thuật mhe tâm ban lam ntŭr neh.

Lơn lah, nău uĕh bah Festival Nkao Đà Lạt rơh tal 10-năm 2024 lah ntŭk ntô nkao mbra dơi pơk hvi ta lam nkual ƀon têh. Bah ntŭk ntô nkao ntơr uĕh yor ăp yăng nkao ta măt n’glău dak n’hanh kiău ma n’glău Xuân Hương đah ntrong ƀư uĕh, geh ntĭt mpơl êng bah nkual ƀon têh Đà Lạt an tât ăp công viên, tơm si jêt, trong nkual ƀon têh, nkual ƀon lan gŭ, nkual pâl nđaih ta lam nkual ƀon têh Đà Lạt n’hanh nkual kiău ma.