Lôch 4 năm an ƀư, bah meng ăp săk rnglăy dơi geh, nău ƀư tĭng luật ta Lâm Đồng hôm e geh du đêt nău mô hŏ dơi ƀư. Nău mbơh tơih, sŏk nău rgop, uănh nđôi, groi uănh n'hanh rmal nău dăn đă mô hŏ ƀa ƀơ; nău kan bâh rnâng kan Groi nđôi ƀon lan, rnâng kan uănh nđôi ntuh kơl bâh ntŭk rêh jêng mô hŏ tâm ban. Dôl uănh, nău tât râng bâh ƀon lan tâm du đê̆ nău kan hôm e đê̆, tâm rnôk nău ntrŭnh mpeh nău mhal đah nău ƀư tih nău dơn kan mbơh tơih, nking n'gang uănh nđôi mô lah mô ƀư tĭng nău dăn đă lôch uănh nđôi ê hŏ na nê̆.

Jêr jŏt mpơl na nê̆ ta ăp ntŭk jêh nglăp nsum thôn, tổ dân phố. Rnôk rnoh rnăk ƀon lan hao âk, nău ƀư rƀŭn nchră n'hanh sŏk nău rgop na nê̆ đă âk mông nar, nuĭh kan n'hanh trong ƀư tâm di. Wa Nguyễn Văn Dũng, Groi kruanh UBND xã Hiệp Thạnh, n'gor Lâm Đồng, an gĭt: "Ntŭk ntô mpôl hên jêh rnôk nglăp nsum hŭch 50% knŭng hôm 9 thôn. Yơn lah rnoh âk nuĭh dŭt âk nklăp 54.000 nuĭh, thôn dŭt đêt lah rlău 800 rnăk, jêng nău ma mpôl hên sŏk nău rgop mô lah ăp nkô̆ tâm nchră na nê̆ đah ƀon lan dŭt jêr jŏt. Rơh săch kruanh thôn mhe aơ mpeh xă mpôl hên mbơh ƀư tĭng Luật n'hanh tĭng nău ntrŭnh bah n'gor, jêng lah nău ƀư săch yor ƀon lan ntrŭnh. Nău bôk năp lah rƀŭn gay sŏk nău rgop ƀon lan na nê̆. Yơn lah ri mô tŏng. Thôn nklăp 1.000 rnăk jă dŭt âk ri dơi 100 rnăk geh măt".

Nău ngăn aơ ân saơ, ƀư nău kan ƀon lan ƀư tơm tâm dâng mô êng lah ƀư ăp rơh rƀŭn tâm di nău ntrŭnh, ma hôm ân geh đăp mpăn nŭih ƀon lan geh nau dơi râng, rgop nău ndrel ntrŭnh ăp nău kan geh tât nău dơi. Rnôk nău kan ƀư ê tâm di đah rnoh nŭih ƀon lan ndrel ntŭk jêh nglăp nsum, nău ƀư nău dơi ƀon lan ƀư tơm mbra mâp nău jêr.

Bâh nău ngăn ta ntŭk, n'gor Lâm Đồng dăn đă rgâl mhe, ntop tay ăp nău ntrŭnh gay ma mât đăp mpăn tâm ban tâm nău ƀư tĭng ƀon lan ƀư tơm ta doanh nghiệp; rdâk njêng phần mềm n'gâng tơm, tâm ban kơt nău mpŏng kan, nău way kan n'hanh nău mât prăp samƀŭt samtra gay ma ăp ntŭk dŏng kan, tâm rgop đah nău kan Trung ương. N'gor hôm nha dăn đă n'gâng kan Nội vụ rdâk njêng săm ƀŭt ntĭm nti n'hanh ntĭm nti nău kan an mpôl kan ƀư tĭng na nê̆.