Tâm 6 khay bôk năm 2025, n’gor Gia Lai (mhe) năl geh ăp nău dơi ntoh lư lĕ mpeh hun hao wăng sa nđăp ma sŏk geh ngân sách ngih dak. Yơn lah, nău mha êng mpeh trong mât bôk kan, ndơ dŏng mô hŏ ăp kôp n’hanh ntul rlong bah rnôk mât dŏng nău kan mhe dôl n’gluh du trong jêr nkra têh an n’gâng kan mhe.

Tĭng UBND n’gor Gia Lai, tâm n’gul bôk năm 2025, lĕ rngôch ndơ geh ƀư ta n’gor (GRDP) rnoh hun hao bơi tât 7,5%. Aơ lah rnoh di ma rhơn rnê, lơn lah rnôk n’gor mhe n’glăp dơn ngoăy nhih pah kan, ân geh mông nar đăp mpăn nuĭh kan n’hanh trong mât bôk kan.

 Mpeh prăk ngân sách, lĕ rngôch nsĭt geh prăk ngân sách Ngih dak geh rlău 13.600 rmen prăk, hao âk rđĭl đah ndrel khay dja năm e nơh. Dŭt njrăng uănh khlay lah, nău rgop bah n’gor Bình Định âk rlău 10.000 rmen prăk, tâm rnôk Gia Lai ơm geh 3.600 rmen prăk. Nsĭt geh tăch n’gluh lam n’gor bơi 1,7 rmen USD, hao âk. Êng Gia Lai (ơm) nsĭt geh tăch n’gluh hao âk bơi rlău bar tơ̆, lơn âk lah nơm geh cà phê, njêng suan ntrôl têh an n’gâng kan tuch tăm.

Nău mpơl uĕh an n’gor Gia Lai mhe hôm tât bah trong nchrăp têh đŏng kơt trong cao tốc Quy Nhơn – Pleiku, ndrâm dak lêng Phù Mỹ, n’hanh trong jŭr nsan mpăr mbrô 2 tach ndeh păr Phù Cát.  Ăp ndơ dja mô dơn rgop khlay tâm hun hao wăng sa ma hôm rgop n’hao nău dơi geh ntung trong, logistics, wăch rgum ntuh kơl tâm n’hanh bah dih dak.

Yơn lah, tĭng  wa Hồ Quốc Dũng, Bí thư Tỉnh ủy Gia Lai, n’gor lôch n’glăp nsum geh âk ntul rlong, mpăng đêt. Ntoh lư tâm nê lah ntung trong, dak bât, dak si n’hanh ntĭm nti nha mô hŏ ăp kôp ơm. Nău mha êng mpeh trong mât bôk kan đah bar n’gor ơm geh khuch tât nău nsĭt geh mât bôk kan bah n’gor Gia Lai (mhe). Gay nkra bah ăp nău khoah dja, n’gor Gia Lai hŏ n’gluh an dŏng nkô̆ nău way mât dŏng mhe, sŏk trong rƀŏng “Gĭt kloh nuĭh- kloh nău kan – Kloh ndơ geh ƀư – Kloh rnoh ngăch – Kloh nău dơn kan – Kloh n’glĕ nău dơi nkra” ƀư trong sro. Tĭng nê, rnoh tât geh hun hao wăng sa- rêh jêng kon nuĭh dơi jao na nê̆ tât tĭng xã, phường, lơn lah an ƀư lor ăp nkual jêr jŏt.  Wa Hồ Quốc Dũng lah rjăp:

“Nsrôih lah năm aơ ân hun hao tât 8%. Ra uănh tay lam lĕ rngôch jêr jŏt kŏ kol, ăp soih lhoi gay mbluh aih. Ân rgâl âk nău mĭn trong mât dŏng nuĭh kan ntơm bah nău mĭn mât bôk kan jêng  n’gâng kan nta trong dơh, rhŏ dŏng an nuĭh ƀon  lan, lĕ rngôch ăp nău kan bah ƀon lan n’hanh doanh nghiệp lah ân nkra bah tâm dâng. Sŏk nău dơi nău kan n’hanh nău di nuih n’hâm bah ƀon lan ƀư mâng weh an nău dơi bah he nơm”

UBND n’gor Gia Lai hŏ n’gluh ăp trong nkra na nê̆ gay rgâl nău dơi mât bôk kan n’hanh ƀĭt juet. Ntŭk rgum tơm tâm nê lah ntrôl dăng dŏng keh mbrô n’hanh điện tử lam trong mât bôk kan. Ăp nkô̆ mât bôk kan n’hanh rnoh tât hun hao wăng sa- rêh jêng kon nuĭh dơi dŏng keh mbrô mbra kơl ăp xã, phường dơh pơk joi n’hanh an ƀư nău kan na nê̆. Wa Phạm Anh Tuấn, Kruanh UBND n’gor Gia Lai lah kloh:  

“Ăp n’gâng kan rgum đăp mpăn tâm pă nău kan n’hanh tâm pă rnoh tât kan na nê̆ ta tĭng ntil trong kan an tĭng n’gâng kan tâm dâng. Lơn lah giám đốc, groi giám đốc ăp n’gâng kan ân dơn nău lôch lêh  n’glĕ dŭt bah n’gâng kan he tĭng rnoh tât hŏ dơi jao, ntĭm nti n’hanh đă leo ăp n’gâng kan tâm dâng trong an ƀư lĕ ma nkra nău  kan an ƀon  lan n’hanh hun hao wăng sa rêh jêng kon nuĭh. Ăp nkô̆ dja ân dơi ƀư  ma điện tử lĕ, dơi keh mbrô lĕ gay ăp xã phường nsing tâm tĭng du n’gâng kan ngoăy, uănh tâm nê gay gĭt trong nkra nău kan” .