Ăp nar dja, lam dak dôl rƀŏng sĭt Quảng trường Ba Đình (Hà Nội) – ntŭk dôl ƀư ăp rơh n’glăp nti nsum bah ăp mpôl tahen râng n’grĭng, hăn tahen Nkah ndray 80 năm Cách mạng khay Pham n’hanh Quốc khánh 2-9.

Ăp nar djang khay 8 dja, Hà Nội mprang lam cờ gŭr mănh êr. Mông nar khuh n’gôr lơn rnôk ƀư ăp rơh rgum n’glăp nsum tiăr nti n’grĭng hăn tahen ta Quảng trường Ba Đình lịch sử. Ta ăp njăr trong mpôl tahen n’grĭng hăn rlău, nuĭh ƀon lan hŏ rgum dŭt mpưm ơm bah ôi. Geh dŭt âk nuĭh ƀon lan bah ăp n’gor ngai tât ơm bah nar bah năp n’hanh dâk ơm joi ntŭk gŭ mpơl uĕh gay uănh saơ mpôl tahen n’grĭng hăn rlău. Oh Mai Hương tât bah Quảng Ninh nkoch:

“Gâp dâk bah 5h30 mpôl hên hăn dŭt ơm gay sơch geh ăp ntŭk gŭ mpơl dŭt uĕh gay ndrel ăp nuĭh n’gơr uănh saơ trong nkual ƀon têh n’hanh uănh saơ ăp mpôl tahen n’grĭng hăn rlău”.

Rơh rgum tiăr nti tâl 2 ƀư măng 24/8 mhe aơ đah nău tât râng bah rlău 16.300 tahen n’hanh đah 43 mpôl hăn, 18 mpôl prĭp dâk; 6 mpôl ndeh pháo tahen bah Mpôl tahen ƀon lan Việt Nam n’hanh 8 mpôl ndeh đặc chủng Công an. Lơn lah, đah nău tât râng bah tahen ăp dak băl Nga, Lào n’hanh Campuchia hŏ rgop mpơl uĕh gung trong tâm boh njrăng n’gang neh dak Việt Nam. Rhơn n’hao êng dâk tâm mbor “Bu ur tahen thông tin” n’grĭng tahen rnôk dja, Thiếu tá Nguyễn Thị Mùi, quân nhân chuyên nghiệp nkoch nău rhơn lôch âk khay tiăr nti gay dơi chuat jâng hăn ta quảng trường Ba Đình:

“Jâng chuat ta quảng trường Ba Đình, gâp n’hao êng nuih n’hâm ngăn, kơt dơi ntop tay suan dăng ma njuat jâng dăng, chuat ăp njuat hăn jăp. Hăn rlău khán đài ma mpôl hên dơi rle măt mpeh quảng trường, lơn lah mpeh Lăng Wa, đah muh măt n’hanh năl saơ nuih n’hâm rhơn răm, n’hao êng săk”.

Rơh rgum n’glăp tiăr nti hŏ wăch nău uănh khlay mha êng bah ƀon lan Thủ đô n’hanh năch pâl nđaih. Ta ăp njăr trong nkual ƀon têh ntŭk mpôl tahen hăn rlău, mprang uĕh cờ gŭr mănh êr mpăr lhêt lhơt tĭng nău ntroh n’gôr. Tĭng njuat jâng chuat dăng, rmôt rĭng grep bah ăp mpôl tahen, công an n’hanh mpôl ƀon lan hŏ ƀư rdâk tay nău n’hao êng săk bah rnoi nuĭh, rdâk tay nău nkah dăng janh bah du neh dak rôih dăng tâm rlăch ndăng, rdâk njêng n’hanh mât njrăng neh dak. Mô đêt nuĭh ƀon  lan bah ăp n’gor nkual ƀon têh ngai ngât, mô dơn nê lĕ ma năch dak bah dih hŏ tât ơm gay uănh saơ nar khlay mha êng dja.

Rơh rgum n’glăp nsum nkah an tay tâm nuih n’hâm nuĭh ƀon lan rngot rhơn, nsing nơm n’hanh n’hao êng săk jru hvi mpeh Tahen ƀon lan, Công an ƀon lan n’hanh suan dăng tâm rnglăp lam rnoi nuĭh Việt Nam.