Groi Thủ tướng Rnâng kan Chính phủ Nguyễn Hòa Bình mhe geh rơh pah kan đah Ban Thường vụ Tỉnh ủy Khánh Hòa mpeh nău rgum droh rklaih jêr jŏt kŏ kol ăp trong nchrăp kan. Tĭng ƀư Nghị quyết bah Tỉnh ủy, UBND n’gor Khánh Hòa dôl rgum rđău đă ndăn ăp trong nchră an ƀư bar n’gâng tơm công nghiệp n’hanh ŭnh nar.

Groi Thủ tướng Nguyễn Hòa Bình hŏ ôp uănh 2 ntŭk nchrăp kan "rbăn rmen prăk" lah Ntŭk nchrăp ƀư ntŭk ƀon lan gŭ Cồn Tân Lập (phường Nha Trang) n’hanh Nkual ntŭk gŭ mhe Mỹ Gia (phường Tây Nha Trang). Ntŭk nchrăp ƀư nkual ƀon lan gŭ Cồn Tân Lập geh nău tih tâm rnôk tâm rlong ƀư ndranh, âk ndơ ƀư hŏ jŭr djơh bah dŭt ơm. Nuĭh ƀon lan ta ntŭk mpŏng ntŭk nchrăp kan ƀư wat jêh ơm gay rgâl uĕh muh măt nkual ƀon lan gŭ. Ntŭk nchrăp ƀư ntŭk gŭ mhe Mỹ Gia mâp wăk kol mpeh ndơ̆ prăk đŏng, dôl dơi ăp đơn vị ôp uănh tay.

Lam n’gor Khánh Hòa hŏ nduih lah nău dơn kan, dăn đă ăp gưl geh nău dơi kan nkah rmal, sŏk mplơ̆ prăk roh huach 1.100 rmen prăk. Bol ma kơt nê, rnôk nkra bah khuch khat dôl mâp wăk kol đŏng tă bah du đêt ntŭk nchrăp kan mô ƀư tâm rlong ndranh ma sơch nuĭh ntuh kơl, tâm rlong ndranh rnoh khlay ntŭk nchrăp ƀư. Groi Thủ tướng Nguyễn Hòa Bình lah rjăp trong nchrăp bah Chính phủ lah rgum droh rklaih jêr jŏt an ăp trong nchrăp kan ruih nkai gay der mpŭng lir tơm ndơ n’hanh njêng tay tơm suan ntrôl an hun hao:

“Bah nău tă ơm gĭt kan bah nău droh rklaih jêr jŏt tĭng Nghị quyết 170, dŭt âk ntŭk, tâm nê geh lĕ ma Khánh Hòa lĕ ma Khánh Hòa ơm, Ninh Thuận ơm, he ƀư tay ăp trong nchrăp kan êng dŭt kŏ kol đŏng, ân rgum droh rklaih. Lah an nchiăng khan ri ăp tơm ndơ lam mpôl bôk năp lah mpŭng lir mpeh tơm ndơ. Bar lah mpŭng lir mpeh mông nar n’hanh kol khan, nuĭh ƀon lan ri nuih ăl”.

   Công nghiệp n’hanh Ŭnh nar lah 2 tâm rnoh 4 n’gâng tơm hun hao, dơi nkoch ta nghị quyết 01 bah Tỉnh ủy Khánh Hòa. Aƀaơ, lam n’gor hŏ geh 33 rkŭm công nghiệp dơi dăp rgum, lĕ rngôch rnoh hvi rlău 1.400 ha. Ta trong kan ŭnh nar, n’gor hŏ dăp rgum 60 trong nchrăp kan đah lĕ rngôch rnoh dăng rlău 8.525 MW. Wa Hồ Xuân Ninh, Giám đốc Sở Công thương n’gor Khánh Hòa an gĭt, đah nău nkre ra uănh tay, nkre kuăl jă ntuh kơl, n’gor dôl njêng jâng nsing gay công nghiệp n’hanh ŭnh nar jêng bar n’gâng tơm hun hao, rgop n’hao wăng sa ta ntŭk đăt ndal tâm let năp tay.

“N’gor Khánh Hòa dôl rgum nkra, droh rklaih ăp trong nchrăp wăk kol, lơn lah tâm trong kan công nghiệp n’hanh ŭnh nar, kơt lah hŏ nkra bah lĕ. Dơn hôm du đêt trong nchrăp kan, Sở Công Thương mbra nsŏng kơl an UBND n’gor droh rklaih, gay mbluh soih tơm ndơ n’hanh ndơ̆ ăp trong nchrăp kan dja rgop tâm nău hun hao. Rnôk n’glăp nsum bar n’gor Ninh Thuận n’hanh Khánh Hòa, ăp trong nchrăp ân dơi ra uănh tay, rgâl di n’hanh rƀah gĭt ntŭk nsing tâm di gay an ƀư dơh ngăch”.

Nchră trong droh rklaih kŏ yơn, ndơ̆ công nghiệp n’hanh ŭnh nar jêng 2 n’gâng tơm hun hao, UBND n’gor Khánh Hòa đă ăp n’gâng kan ra uănh tay lĕ rngôch ăp nkô̆ nău hun hao, kơt siƀŭt, ndơ dŏng, nuĭh kan, đă ntrơn du; nkre ntrŏng nău dơn kan na nê̆, an lor ăp gâl kan jăch ndăn n’hanh ăp trong nchrăp geh nău dơi njêng luh rnoh khlay gay rgum an ƀư. Ăp đơn vị ân ƀư lĕ n’hâm suan rgâl soih uĕh ntŭk ntuh kơl, lor nchrăp dăn đă trong ƀư ngăn ngăn, nkre dơn nkra ăp jêr jŏt, kŏ kol bah doanh nghiệp, nuĭh ntuh kơl.