Jêh rnôk ƀư rjăp, Đảng bộ n’gor Gia Lai geh 74 ntŭk kan đảng đah rnoh rlau 10.800 đảng viên. Nchră tât nau tă dơi ndrel ê dơi bah năm kan rlau aơ, Đại hội mbơh luh nkô̆ nau tơm ân hun hao tâm năm kan 2025-2030. Tâm nê, hun hao GRDP ăp năm geh rlau 10%; nau geh năm 2030 geh rau 6.300 đôla, lam n’gor mô hôm geh rnăk ach o; rnoh geh tơm prăk soay năm 2030 geh rlau 41 rbăn rmen ndrel rnoh geh tăch luh geh rlau 17 rmen đôla.

            Gay dơi geh nkô̆ nau nchrăp luh, Đảng bộ n’gor Gia Lai năl 5 n’gâng tơm hun hao nê, lah: Rgum tâm nau kan ê nkra, ndâk ƀư, ŭnh nar ndâk mhe, công nghiệp ndrih, bán dẫn ndrel AI. Leo nau kan pâl n’aih jêng văng sa tơm nsing tâm nau geh ê nkra, sinh thái, văn hoá. Rƀŏng tât tuch tăm công nghiệp prêh, tăm bri nâp nâl, njêng ăp nkuăl tăm âk mpeh tuch tăm, tăm tơm si. Njêng ăp ntŭk ntŭk ƀư Logistic njok trong Quốc lộ 19 ndrel Cao tốc Quy Nhơn-Pleiku. Njêng nkuăl têh ngăch ndrel nâp, ndrel ma nau kan tăch neh ntu.

            Wa Hồ Quốc Dũng, Uỷ viên Trung ương Đảng, Bí thư n’gor uỷ Gia Lai đă Đảng bộ UBND n’gor ntoh n’hao nau kan, tâm rnglăp, rgâl mhe, ƀư ueh tâm nau mĭn, nsôih pah kan gay rlet nau jêr, ntul rlong. N’gor rgum ƀư 6 nau kan tơm. Tâm nê, ân geh n’hao nau tâm tâm nchră kan ân n’gor, Rnâng kan n’gor mpeh hun hao văng sa, rêh jêng, neh dak, rnă njrăng ndrel tâm rnglăp lam ntur neh; ndơn tâm di “ntŭk nkol” “ntŭk doh’ gay geh nau kan rgâl mhe doh rklaih, rgum pă tơm prăk ƀư kan, rgum ntuh kơl bah dih prăk ngih dak, tâm nrghoi nkuăl; ntrơn rgâl mrô hun hao geh nsum ma văng sa ndrih, ueh; hun hao văng sa tuch tăm geh dŏng nau kan prêh mhe, nau kan ê nkra, nau dăng ndâk mhe, pâl n’aih; đăp mpăn nau rêh jêng, n’hao nau rêh ân ƀon lan, ngăn lah nkuăl rnoi mpôl đê̆, nkuăl jru, nkuăl ngai. Bí thư N’gor uỷ Gia Lai Hồ Quốc Dũng lah rjăp:

            ‘Đă đảng uỷ UBND n’gor gưl kan mhe ndal ntrŭnh ƀư nau nkoch trêng jru hvi nau ntrŭnh bah Đại hội tât dĭng lĕ ăp cán bộ, đảng viên ndrel ƀon lan ndâk bôk nau ƀư kan ndrel nau nchrăp ntrŭnh ƀư ngăn tĭng ăp nkô̆ nau kan. Năl kloh nkô̆ nar ƀư ndrel nau ntrŭnh, ndâk nau kan mêt uănh, bonh đă ƀa ƀơ, năn doh rklaih nau jêr nkol, đăp mpăn nau ntrŭnh geh lăp ngăn tâm nau rêh, njêng nau ntrơn rgâl kloh tă bah ăp nar bôk năp, khay bôk năp, ăp khay bôk năp bah năm kan”.

            Đah nau vay tâm rnglăp, nau mpŏng hun hao, nuih n’hâm rgâl mhe ndrel nsôih ƀư nau kan, Đảng bộ UBND n’gor Gia Lai mra ƀư ueh nau kan tơm, leo trong rgâl mhe, ƀư ueh nau kan hành chính; nsôih ƀư ân jêh nau dơi bah ăp nkô̆ nau, nau kan bah Nau ntrŭnh Đại hội năm kan 2025-2030, rgop nau ndâk n’gor Gia Lai hun hao ngăch, ndrih, nâp nâl, jêng n’gor hun hao geh nau dơi bah lam dak./.