Ôi 24/6, Hội đồng nhân dân (HĐND) n’gor Dak Lak hŏ ntơm pơk Rơh hop tâl 10, mĭn uănh, n’glêh an âk nkô̆ mpeh n’glĕ nău dơi, bah năp rơh n’gor Dak Lak mhe lăp kan ngăn ntơm bah nar 1/7. Tâm 6 khay bôk năm 2025, n’gor Dak Lak hŏ an ƀư ăp kôp, lam lĕ rngôch n’hanh nsĭt nău dơi tam ăp nghị quyết bah Trung ương Đảng, rđău đă bah Bộ Chính trị, Ban Bí thư mpeh dăp rgum nhih pah kan, leo ƀư trong kan n’gâng kan 2 gưl, glêh tam nuĭh kan.

Bah meng nê, n’gor rgum rđău đă droh rklaih ăp kô̆ yơn tâm nău an ƀư, nkra dŭt bah ăp rơh lah phong âk nuĭh, krit jêr n’hanh ntoch jong. Ta rơh hop dja, HĐND n’gor Dak Lak mĭn uănh n’gluh an dŏng ăp nău mbơh tĭng ƀư hun hao wăng sa- rêh jêng kon nuĭh 6 khay bôk năm, trong rƀŏng nău dơn kan 6 khay  kêng dŭt năm; 17 trong nchrăp nghị quyết geh tât trong kan wăng sa, rêh jêng kon nuĭh, prăk kaih, ntuh kơl, bôk nău kan gưl neh dak, trong ntop kơl, lôch jêh groi nđôi way nkô̆ năm 2025 n’hanh âk nkô̆ khlay êng ƀa ƀă đŏng.