Di kah gĭt 50 năm Nar rklaih đăp mpăn n’gor Phú Yên (1/4), ôi nđaơ (1/4), ta nkual ƀon têh Tuy Hòa, n’gor Phú Yên, Mpôl Pah kan trung ương yor đồng chí Phan Đình Trạc, Kruanh Ban Nội chính Trung ương ƀư Kruanh rmôt lĕ tât mpoh nhang, an nkao ta Rup ndah Núi Nhạn. Tâm mông nar rngêt rngăt, bah năp Rup ndah Núi Nhạn, Kruanh Ban Nội chính Trung ương Phan Đình Trạc ndrel Mpôl pah kan, kruanh n’gor Phú Yên đêp rmên kah gĭt ăp hăt janh khĭt lĕ janh roh nting mham yor nău kan rklaih đăp mpăn rnoi nuĭh, dơn ngoăy neh dak.

Kruanh Ban Nội chính Trung ương Phan Đình Trạc ndrel ăp đại biểu lĕ an nkao, mpoh su nhang ta Rup ndah kah gĭt Núi Nhạn. Tâm jay rup ndah geh 38 n’gâng nchih săk 13.085 tahen khĭt bah Phú Yên n’hanh 4 n’gâng nchih săk 1.000 tahen khĭt ta du đêt n’gor ta lam dak. Tă aơ 50 năm, đah nău rđău bah Đảng, nuĭh ƀon lan n’gor Phú Yên lĕ tĭng hăn ndrel, tâm lơh janh dăng, lơh mprơh tahen Mỹ, ndâk âk nău dơi, rklaih đăp mpăn n’gor Phú Yên n’hanh hăn tât rklaih đăp mpăn miền Nam, kơp dơn neh dak.