Dơn nău jă bâh kruanh rmôt kan  Nghị viện lam ntur neh (IPU) Tulia Ackson n’hanh Tổng thư ký Liên minh Nghị viện lam ntur neh Martin Chungong,Kruanh Quốc hội Armenia Alen Simonyan,Kruanh Quốc hội Trần Thanh Mẫn ndơn kan an nuĭh leo kan Đảng, ngih dak Việt Nam n’hanh i ur tât râng Đại hội đồng tal 150 bâh rmôt kan Nghị viện lam ntur neh (IPU -150), tât khâl ngăn dak Cộng hòa Armenia bâh lơ 2-5/4/2025. Nău Kruanh Quốc hội Trần Thanh Mẫn tât râng Đại hội đồng rmôt kan Nghị viện lam ntur neh tal 150 lah du nău kan dŭt khlăy, an saơ nău nsrôih mhe n’hanh nău tâm ton kan dŭt têh bâh Việt Nam ta rơh tâm mâp nghị viện âk ding dŭt khlăy aơ, tâm rnôk nău ta lam ntur neh aƀaơ an geh ăp ngih dak an nsum ti ndrel tâm nchră, tâm mbơh nău tă kan, ngluh mbơh âk nău mĭn kan gay ma doh rklaih ăp nău ntul rlong nsum. Ta nău kan bar ding, rơh tât khâl ngăn dak CH Armenia bâh kruanh Quốc hội Trần Thanh Mẫn lah rơh tât khâl bôk năp bâh nuĭh leo bôk năp ntŭk kan lập pháp Việt Nam, lah rơh tât khâl gâl têh bâh nuĭh leo kan Việt Nam kơp bâh ntơm bar dak njêng nău tâm boh kan đah bar dak. Mpeh nău kan chính trị- nchră nău đah dak bah dih, Armenia uănh Việt Nam lah dak kan ndrel dŭt khlăy tâm nkual Đông Nam Á. Bar dak mât nău tâm mbơh kan nsum, tâm mâp ăp gâl, geh nđâp nău kan gâl têh.