Ta Ngih sam ƀŭt Đại học Đà Lạt, ăp năm geh rlău 1.000 đề tài khoa học, nău kan, nău nchrăp ƀư dơi ƀư. Âk săk rnglăy geh nău dơi dŏng kơt ntô lĭr dak si, ndơ ƀư uănh năl bức xạ n'hanh nhiễm xạ, trong nkra ƀư ndŏk mbrâm, ăp chế phẩm rhŏ dŏng mât rong tui ka… Tiến sĩ Trần Nhật Thiện, Kruanh jrô kan Khoa học Công nghệ n'hanh tâm kơl dak bah dih, Ngih sam ƀŭt Đại học Đà Lạt an lah, bah nău dơi gŭ mĭn tât dŏng ngăn hôm e du nău tâm ƀah dŭt têh. "Aƀaơ geh dŭt âk ăp nău kan khoa học công nghệ n'hanh rgâl mhe mĭn njêng. Yơn lah gay ƀư jêng ngăn ngăn ăp nău kan nĕ ri he hôm e đêt nĕ lah ntŭk ntô tâm rgop 3 ngih dak he mô hŏ geh."

Nău ngăn an saơ, ăp nău kan khoa học n'hanh công nghệ lĕ dơi n'gor Lâm Đồng mbơh ƀư dŭt âk hôm e jê̆, nchah nchrai; săk rnglăy gŭ mĭn mô hŏ dơi ndơ̆ rgâl lam hvi tâm nău kan. Tâm rnôk nĕ, doanh nghiệp geh nău ŭch rgâl mhe công nghệ lŏ mô hŏ dơh joi nuĭh way kan, nuĭh khoa học mô lah trong mkra tâm di. Wa Mai Thanh Nga, Groi Giám đốc N’gâng kan Khoa học n'hanh Công nghệ n'gor Lâm Đồng, an lah, aơ lah nău mô hŏ dơi têh ngăn tâm nău kan khoa học, công nghệ n'hanh rgâl mhe nău kan bah ta ntŭk. "Năm bah năp nău kan mpeh khoa học công nghệ geh ntrŭnh ƀư dŭt lah jê̆, nchah nchrai ê geh tâm rgop jêng du ntrong kan mô lah jêng du nau kan têh gay ma rklaih nău kan têh bah nkual."

 Bâh nău ngăn aơ, n'gor Lâm Đồng dôl uănh năl du trong mhe: rgâl bah ntơm đah nău ôp: "Mhâm ƀư gay ma mĭn uănh?", jêng: "Ta ntŭk dôl moh nău jêr an geh doh rklaih?". Aơ lŏ lah trong pơk hvi têh an ăp nău kan ma Lâm Đồng geh nău dơi, tâm nĕ geh công nghệ sinh học. Giáo sư, Tiến sĩ Dương Tấn Nhựt, Groi Viện trưởng Viện Khoa học sự sống, Viện Hàn lâm Khoa học n'hanh Công nghệ Việt Nam an lah, công nghệ tế bào, mât rong sêt, công nghệ lôch klêh play… mbra njêng luh ăp ntil ndơ ntoh lư, geh rnoh khlăy hao âk an Lâm Đồng. Yơn gay du công nghệ hăn bah jrô rlong ƀư tât ntŭk tăch rgâl, doanh nghiệp ân râng ntơm bah rnôk hun hao ndơ:"Lah he tâm rgop dơi tay ăp doanh nghiệp ri dơi nsing tâm tơm prăk ntop kơl nê lvang bah ntŭk rlong ƀư luh bah dih mbra uĕh lơn, mbrơi mbrơi mbra jêng ndơ tăch rgâl."

Tiến sĩ Hà Thúc Viên, Groi Hiệu trưởng Đại học Việt Đức uănh năl, gay nău tâm rgop Ngih dak - Ngih sam ƀŭt - Doanh nghiệp geh săk rnglăy ngăn, an tâm pă kloh nău ƀư bah tĭng nuĭh tơm. "Ăp ding geh tât mbra geh du nău dơn kan. Ngih dak ri rdâk njêng mpeh nău kơl, mpeh ntŭk ntô n'hanh ndơ̆ luh nău nchrăp kan, ndơ̆ luh ăp nău đă ăp ngih sam ƀŭt đại học, ăp doanh nghiệp an râng tâm nău kan. Ngih sam ƀŭt đại học ri an rgum tâm nău kan ntĭm nti n'hanh gŭ mĭn. Doanh nghiệp ri rgum tâm nău ntuh kơl n'hanh ndrel đah ăp ntŭk gŭ mĭn gay he rlong ƀư ta ntŭk nĕ lah tăch rgâl."

 Đah Lâm Đồng, ăp "nău mkra" nĕ geh na nê̆ đah ăp n'gâng kan wăng sa geh nău dơi kơt tuch tăm công nghệ mhe, cà phê, biăp, nkao, tơm sa play, dak si, mât rong n'hanh nkret njêng ndơ tuch tăm; wăng sa dak lêng, tui ka; pâl nđaih; ŭnh nar sĭt jêng tay n'hanh nkret njêng khoáng sản. Wa Nguyễn Ngọc Phúc, Groi kruanh UBND n'gor Lâm Đồng an gĭt, gay ăp nău dơi jêng nău dơi tâm rlong, ta ntŭk mbra rgâl dăng bâh nău ƀư tĭng đề tài jêng đă ƀư tĭng nău ŭch ngăn: "Ntơm bah ăp nău đă bah doanh nghiệp mpôl hên mbra ndơ̆ nău nglêh an tay an ăp ngih nti đại học, ăp viện gŭ mĭn n'hanh mpôl hên mbra lah nuĭh tâm pă, pă prăk kaih tâm ban kơt nău kan ƀĭt joet mhâm ƀư an luh geh ndơ n'hanh ndơ nê an geh tăch rgâl."

Tĭng trong nchrăp lvang năm 2026-2030, Lâm Đồng mbra pơk dŏng trong nkra rgâl mhe, boăt nthoi Ngih dak, nuĭh khoa học n'hanh doanh nghiệp gay nkra ăp nău wăk kol ngăn ngên. Aơ lah trong ƀư na nê̆ nău mĭn Nghị quyết 57 bah Bộ Chính trị: ndơ̆ khoa học, công nghệ n'hanh rgâl mhe jêng suan ntrôl tơm bah hun hao. Bah ndơ̆ nău ŭch dăn mĭn njêng tât tăch rgâl, nău ŭch tât n'glĕ dŭt lah njêng luh ndơ, n'hao rnoh khlay n'hanh suan dăng tâm rlong bah wăng sa ta ntŭk.