Ta rơh tâm nchră, Tổng Bí thư, Kruanh dak Tô Lâm lah rjăp Việt Nam uănh khlay tâm boh dăch dêh đah Panama; rnê âk nău khlay kan bah Panama đah ntŭk gŭ kan lah ntŭk boăt nthoi trong dak lêng, trong trôk, ndơ dŏng n'hanh prăk kaih bah nkual. Tổng Bí thư, Kruanh dak Tô Lâm mpơl nău nsing nơm bar dak mbra ntik n'hao tay săk geh tâm boh ta ăp trong kan tăch rgâl, lŏ mir, trong dak lêng, trong trôk, ndơ dŏng, rgâl mbrô, ntrŭt ntrôl tâm boh bar ding hun hao tĭng trong nar lơn ma ngăn ngăn, săk rnglăy n'hanh nâp nâl, yor ma nău geh ƀon lan bar dak.Tổng thống José Raúl Mulino lah rjăp Panama uănh Việt Nam lah dak tâm boh khlay ta nkual châu Á - Thái Bình Dương, mbra ƀư ntung njŏ gay Việt Nam pơk hvi tâm boh đah ăp dak Mỹ Latinh. Bar ding kŏ tâm ban nau n'hao nau tâm boh njrăng, rdâng phung tih dôih rloh rlau neh dak ndrel tâm rgop tâm ăp rơh rƀŭn âk ding. Jêh tâm nchră, bar rđau kan uănh saơ nau pă âk săm ƀŭt tâm boh tâm ăp nau kan nchuăn rdeng dak lêng, tuch tăm, pâl n'aih, trong trôk, hải quan ndrel ntĭm nti.