Nar 31/3, Kruanh UBND n’gor Lâm Đồng hŏ ký n’glêh an ntuh kơl trong cao tốc Bảo Lộc - Liên Khương tĭng trong ƀư tâm boh bah dih tâm trôm ngih dak (Rơh bôk năp 1) đah lĕ rngôch tơm prăk ntuh kơl rlău 17.700 rmen prăk. Trong cao tốc Bảo Lộc – Liên Khương jong bơi 74km, nthoi 2 nkual ƀon têh Bảo Lộc đah Đà Lạt, hăn rlău ăp nkuâl Bảo Lâm, Di Linh n’hanh Đức Trọng bah n’gor Lâm Đồng.

Tâm rlău 17.700 rmen prăk tâm lĕ rngôch rnoh ntuh kơl, geh rlău 7.600 rmen prăk bah tơm prăk ngân sách Ngih dak, hôm ƀa ƀă lah tơm prăk tơm nuĭh ntuh kơl rgum jă. Njăr trong tă bah Công ty Cổ phần Đầu tư Tập đoàn Phương Trang – FUTA GROUP ntơh măt tâm rgop kan nsum đah nuĭh ntuh kơl ƀư. Lam njăr trong geh 51 ntung, tâm nê geh 13 ntung ta trong me, 35 ntung mbăk rlău bah lơ trong cao tốc n’hanh 3 ntung tâm chruh n’glah trong. Ta nău n’glêh an ntuh kơl, wa Trần Hồng Thái, Kruanh UBND n’gor Lâm Đồng đă ăp n’gâng kan, ăp nhih pah kan dơi kan geh tât geh nău dơn kan tĭng ƀư, ntĭm nti, kan nsum, ôp uănh nău tĭng ƀư trong nchrăp kan đăp mpăn tĭng di quy định pháp luật. Nkre, ndăn rdâk njêng ăp nkual gŭ mhe, ƀư ăp siƀŭt trok tâm, đă ntrơn du ntŭk rong ƀư trong gay rdâk ƀư trong tâm let năp tay.