Lễ hội cà phê Buôn Ma Thuột rơh tal 9 mĭn lah tay n’hanh n’hao prêh cà phê Việt Nam ta ntŭk tăch lam ntŭr neh. Bah kơi 50 năm rklaih đăp mpăn, rnoh neh cà phê bah Dak Lak lĕ đăp mpăn ta rnoh  rlău 200 rbăn ha, rnoh geh ăp năm geh rlău 540 rbăn tấn, geh rlău 30% rnoh cà phê lam dak. Cà phê bah n’gor Dak Lak lĕ tăch n’gluh tât hăng rhiăng dak n’hanh nkual neh ta lam ntŭr neh. Năm 2024, cà phê Dak Lak lĕ rgop âk tâm rnoh 1,3 rkeh tấn n’hanh sŏk geh rlău 5 rmen đôlar tăch n’gluh cà phê bah lam dak.

Groi Thủ tướng Trần Hồng Hà mĭn lah: Lễ hội Cà phê Buôn Ma Thuột rơh aơ nău ƀư geh nkô̆ khlay, ƀư di tâm rơh nkah gĭt 50 năm lơh dơi Buôn Ma Thuột (10/3/1975-10/3/2025)-lơh dơi pơk bôk an rơh rdôl lơh têh n’hanh kuăl jă dăng lĕ rngôch yan puh wai năm 1975, rklaih đăp mpăn miền Nam, kơp dơn neh dak. Lễ hội cà phê mô knŭng lah nău ntô̆ n’hao cà phê Việt nam, ma hôm lah rƀŭn nchră lam ntŭr neh, ntŭk ăp dak tăm n’hanh tăch cà phê rgum ăp, ndrel tâm pă trong an du nău rêh rgŏ năp nâp nâl bah nău kan cà phê.

Năm 2024, rơh bôk năp tăch n’gluh cà phê Việt Nam rlet rlău 5 rmen đôlar, mĭn lah tay jâng nsan lah nuĭh pă an cà phê têh tal 2 ta lam ntŭr neh, knŭng bah kơi Brazil. Tâm nĕ, Dak Lak-“Ntŭk cà phê têh bah Việt Nam” rgop an nklăp 18% prăk geh tăch n’gluh; moh êng n’hanh ntĭm ntŭk “Cà phê Buôn Ma Thuột” ntoh lư lĕ geh măt ta rlău 100 dak n’hanh nkual neh ta lam ntŭr neh.

Groi Thủ tướng Trần Hồng Hà đă: năm tât, ăp n’gâng kan, nău kan, ăp ntŭk, Hiệp hội cà phê-ca cao Việt Nam, ăp doanh nghiệp nkra njêng, nkret pâr, tăch rgâl cà phê nkoch nsum trong uănh têh, tâm rgop nău ƀư rjăp gay ndâk njêng nkual tăm cà phê uĕh kah âk, ndŏk nja đêt. Kơt dŏng khoa học công nghệ âk an tăm nkret njêng, n’hŭch khuch tât ntŭk ntô gŭ âm. Ndâk njêng trong khlay nâp nâl tĭng nkô̆ nău tâm rgop đah ƀon lan, hợp tác xã, doanh nghiệp nkret njêng n’hanh tăch n’gluh an đăp mpăn rnoh khlay n’hanh hao nău geh an nuĭh tăm cà phê.

Ndrel đah nĕ, ăp doanh nghiệp an nchrăp ntuh kơl an công nghệ mrô gay tŏng ăp kloh rah wah, ndâk njêng trong mât uănh nâp nâl bah tăm tât nkret njêng n’hanh tăch n’gluh. Groi Thủ tướng Trần Hồng Hà lah rjăp, an mât uănh lơn tay tât mpla nsơ ndơ cà phê Việt Nam.

Ăp N’gâng kan Công thương, Tâm rnglăp nchră nău bah dih, nău kan trong mpăr, pâl nđaih an uănh ntrŭt ngăch pơk hvi ntŭk tăch tâm dak n’hanh lam ntŭr neh, nkoch mbơh ndơ cà phê Việt Nam ta ăp nău ƀư tâm rnglăp nchră nău bah dih, ntŭk pâl nđaih ntoh lư; nkre ăp doanh nghiệp an ndâk ƀư mpla nsơ, marketing, nchrŏng ntŭk moh êng tâm di đah nău geh; pơk hvi trong tâm pă tâm rgop na nê̆ ta ăp ntŭk tăch têh, hun hao tăch rgâl điện tử, âk trong tăch.

Ta Lễ hội rơh aơ, kruanh N’gâng kan Văn hóa, Thể thao n’hanh pâl nđaih lĕ an ntrŭnh kơp dơn “Gĭt blău tăm n’hanh nkret pâr cà phê Dak Lak” lah drăp ndơ mô mpơl saơ lam dak. Tâm bôk nău kan đŏng, nuĭh ƀon lan n’hanh năch lĕ dơi uănh bôk nău ƀư nghệ thuật “Buôn Ma Thuột-Ntŭk tât bah cà phê lam ntŭr neh”. Lĕ rngôch nchih tâm trong hao lôch uĕh n’hanh mĭn lah bah cà phê Buôn Ma Thuột ta lam ntŭr neh. Wa Trương Thanh Bình ta nkuăl Krông Búk, n’gor Dak Lak lah:

Lễ hội nar lơ dơi ntuh kơl n’hanh ƀư tơm lơn, geh nău têh lơn ăp năm bah năp. Aơ lah njoat hăn têh cà phê Buôn Ma Thuột lơ hun hao lơn tay.

Tâm trôm lễ hội cà phê Buôn Ma Thuột rơh tal 9 năm 2025, geh bơi 500 ntŭk rhŏ an cà phê an dơm ta ăp ntŭk, bah ăp ntŭk pĭt trong, ăp ntŭk dăch dơh tât ăp ntŭk têh dơi ntuh kơl uĕh bah ăp ndơ cà phê ntoh lư. Cà phê lĕ jêng nău uĕh ơm wơt năch bah nuĭh Dak Lak rnôk rƀŏng tât ndâk njêng nkual ƀon têh cà phê bah lam ntŭr neh.

Tĭng rơh ngêt cà phê an dơm bah âk ntil ta trong Phan Đình Giót, nkual ƀon têh Buôn Ma Thuột; wa Nguyễn Văn Chất răm rhơn, rơh hăn pâl bôk năm mhe bah n’gor Nghệ An lăp Dak Lak rơh aơ ngăn ngên kơt ka chok cà phê Buôn Ma Thuột.

Kơt aơ lah dŭt uĕh hôm, mô geh ntŭk mưch tay, bah oh nô tacxi tât nuĭh rhŏ an ta ntŭk aơ. Gâp lăp ta aơ dơi geh 3 nar n’hanh dŭt ŭch. Aơ lah ntŭk têh, ntŭk cà phê ri lah cà phê kah hôm, rnôk ôi hăn pâl ntŭk tăch ndơ gâp rwăt bơi 1 rkeh prăk cà phê gay djôt sĭt an mpôl pâl.

Lễ hội cà phê Buôn Ma Thuột rơh tal 9 năm 2025 dơi uănh lah lễ hội uĕh ngăn bah sa ơm tât aƀaơ rnôk di tâm rơh Dak Lak nkah gĭt 50 năm rklaih đăep mpăn Buôn Ma Thuột, saơ du njăr trong ntoh lư n’hanh âk nău lôch uĕh bah n’gor. Tâm rnôk nĕ, nău mbơh rnoh khlay cà phê hôm e “lư” lôch du năm bah năp, đah rnoh khlay âk ngăn bah kăl e (rlău 5.350 đôlar/tấn, tâm ban nklăp 131 rkeh prăk/tấn tâm lơ 10/3), lơ ƀư nuĭh ƀon lan ta ntŭk cà phê âk ntop tay răm rhơn.

Lễ hội cà phê Buôn Ma Thuột rơh tal 9 năm 2025, đah 17 nău ƀư khlay n’hanh âk nău nău ƀư ntop uĕh tay lah rơh ntô̆ n’hao nău kan cà phê, nkre djôt tât âk nău ƀư ngăn uĕh đah ƀô kah n’hanh văn hóa cà phê, nkre pơk luh ăp nău dơi boăt nthoi, hun hao, mĭn lah “Buôn Ma Thuột lah ntŭk tât bah cà phê lam ntŭr neh”.